କଣ୍ଟାବାଞ୍ଜି: କଣ୍ଟାବାଞ୍ଜି ପୁଲିସ ୨୮ଟି ଚୋରା ବାଇକ୍ ଜବତ କରିବା ସହ ୬ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ସୂଚନା ଅନୁସାରେ ଗତ ୨୩ ତାରିଖରେ ପରିବା କିଣିବାକୁ ଆସିଥିବା ଜୟପ୍ରତାପ ନାଏକ ନାମକ ଜଣେ ବ୍ୟକ୍ତିଙ୍କ ବାଇକ୍ ଚୋରି ହୋଇଥିଲା । ଏ ସମ୍ପର୍କରେ ସେ କଣ୍ଟାବାଞ୍ଜି ଥାନାରେ ଅଭିଯୋଗ କରିଥିଲେ । ପୁଲିସ ସବ୍ ଇନ୍ସପେକ୍ଟର ଗଙ୍ଗାଧର ମଲ୍ଲିକ ପୂର୍ବରୁ ବାଇକ ଚୋରି ମାମଲାରେ ଜେଲ ଯାଇ ଫେରିଥିବା ମୁକେଶ ବର୍ଗେଙ୍କୁ ସନ୍ଦେହରେ ଥାନାରେ ପଚରା ଉରା କରିଥିଲେ । ଏହାପରେ ବାଇକ୍ ଚୋରି ରାକେଟ ସମ୍ପର୍କରେ ସୂଚନା ମିଳିଥିଲା । ମୁକେଶ ଓ ତାଙ୍କ ସମ୍ପର୍କିୟ ବେଲପଡା ଥାନା ଅନ୍ତର୍ଗତ ଖଲଖଲି ଗ୍ରାମର ସତ୍ୟନାରାୟଣ ମାଝି, ସେହି ଗାଁର ପୀତବାସ ବାଗ, ରମେଶ ମାଝି, ଧୁମାଭଟାର ତ୍ରିଲୋଚନ ରାଉତ ଓ କଣ୍ଟାବାଞ୍ଜି ସତନାମୀ ପଡାର ସଂକିର୍ତ୍ତନ ସତନାମୀ ମିଳିମିଶି ଗୁଡ଼ାଏ ବାଇକ ଚୋରି କରିଥିବା ସୂଚନା ମିଳିଥିଲା। ସେମାନଙ୍କଠାରୁ ୨୮ଟି ବାଇକ ଜବତ ହୋଇଛି । ମାଷ୍ଟର ମାଇଣ୍ଡ ମୁୁକେଶ ବର୍ଗେଙ୍କ ସମେତ ସମ୍ପର୍କିୟ ସତ୍ୟନାରାୟଣ ମାଝୀ ଓ ପୀତବାସ ବାଗଙ୍କୁ ଚୋରି ରେ ସଂପୃକ୍ତ ଥିବା ପ୍ରମାଣ ପରେ ସେମାନଙ୍କୁ ଗିରଫ କରାଯାଇଥିଲା । ଏହା ସହ ବାଇକ୍ଚା ଲାଣରେ ସହାୟତା କରୁଥିବା ରମେଶ ମାଝୀ, ସଙ୍କୀର୍ତ୍ତନ ସତନାମୀ ଓ ତ୍ରିଲୋଚନ ରାଉତଙ୍କୁ ମଧ୍ୟ ପୁଲିସ ଗିରଫ କରିଛି ।
Comments are closed.