ସମାଜ ଡିଜିଟାଲ ଡେସ୍କ: ଭାରତୀୟ ବଜାରରେ Triumph ଏହାର ଲୋକପ୍ରିୟ ବାଇକ୍ Speed Twin 900କୁ ନୂଆ ଅବତାରରେ ଲଞ୍ଚ୍ କରିଛି। ନୂଆ Speed Twin 900ର ପ୍ରାରମ୍ଭିକ ମୂଲ୍ୟ ୮.୮୯ ଲକ୍ଷ ଟଙ୍କା ରହିଛି। ଏହାକୁ ସମ୍ପୂର୍ଣ୍ଣ ନୂଆ ଡିଜାଇନ୍ ଓ ଉନ୍ନତ ଚେସିସ୍ରେ ପ୍ରସ୍ତୁତ କରାଯାଇଛି।
କମ୍ପାନୀ ଏହି ବାଇକରେ ୯୦୦ ସିସି କ୍ଷମତା ବିଶିଷ୍ଟ ବୋନଭିଲେ ଟ୍ବିନ୍ ଇଞ୍ଜିନର ବ୍ୟବହାର କରିଛି, ଯାହା ୬୫ ପିଏସର ଦମ୍ଦାର ଶକ୍ତି ଓ ୮୦ ନ୍ୟୁଟନ ମିଟରର ଟର୍କ ଉତ୍ପନ୍ନ କରିଥାଏ।
ଏହି ବାଇକରେ ରୋଡ୍ ଓ ରେନ୍ ନାମକ ଦୁଇଟି ରାଇଡିଂ ମୋଡ୍ ଦିଆଯାଇଛି। ଭିନ୍ନ ଭିନ୍ନ ରାସ୍ତାର ଅବସ୍ଥା ଅନୁସାରେ ଏହି ରାଇଡିଂ ମୋଡ୍ ବ୍ୟବହାର କରାଯାଇପାରିବ।
ଏଥିରେ ନୂଆ ଲିନ୍-ସେନ୍ସିଟିଭ୍ ଆଣ୍ଟି ଲକ୍ ବ୍ରେକିଙ୍ଗ୍ ସିଷ୍ଟମ ଏବଂ ଟ୍ରାକ୍ସନ କଂଟ୍ରୋଲ ସିଷ୍ଟମ ଦିଆଯାଇଛି, ଯାହା ବଙ୍କାଣି କିମ୍ବା ମୋଡ଼ ସମୟରେ ଉତ୍ତମ ନିୟନ୍ତ୍ରଣ ଦେଇଥାଏ।
୧୨ ଲିଟରର ତେଲ ଟାଙ୍କି ସହ ଆସିଥିବା ଏହି ବାଇକକୁ ୫-ସ୍ପିଡ୍ ଗିୟରବକ୍ସ ସହ ଯୋଡ଼ା ଯାଇଛି।
ଏଥିରେ ନନ୍ ଆଡ୍ଜଷ୍ଟେବଲ ଅପ୍-ସାଇଡ୍-ଡାଉନ୍(ୟୁଏସଡି) ଫୋର୍କ ଏବଂ ଟ୍ରାୟମ୍ଫ ବ୍ରାଣ୍ଡେଡ୍ ରେଡିଏଲ୍ କ୍ୟାଲିପର ଦିଆଯାଇଛି। ଏହାର ଆକାରରେ ମଧ୍ୟ ସାମାନ୍ୟ ପରିବର୍ତ୍ତନ ଦେଖିବାକୁ ମିଳିଛି।
ଏହାର ସିଟ୍ର ଉଚ୍ଚତାକୁ ମଧ୍ୟ ବଢାଯାଇ ୭୮୦ ମିମି କରାଯାଇଛି, ଯାହାକି ପୁରୁଣା ମଡେଲରେ ପ୍ରାୟ ୭୬୫ ମିମି ଥିଲା।
ଫିଚର ଭାବେ ବାଇକରେ ସିଙ୍ଗଲ ପଡ୍ ଡିଜିଟାଲ-ଆନାଲଗ୍ ଡିସ୍ପ୍ଲେ ଦିଆଯାଇଛି, ଯାହା ଟିଏଫଟି ସ୍କ୍ରିନ୍ ସହ ଆସିଥାଏ।
ଏଥିରେ ବଡ଼ ୩୨୦ ମିମିର ଆଗ ଡିସ୍କ ବ୍ରେକ୍ ଦିଆଯାଇଛି। କମ୍ପାନୀ ଦାବି କରିଛି ଯେ, ଏହା ସବୁ ପ୍ରକାର ରାସ୍ତା ଅବସ୍ଥାରେ ଉଚିତ ବ୍ରେକିଂ ପ୍ରଦାନ କରିଥାଏ।
Speed Twin 900କୁ କମ୍ପାନୀ ମୋଟ୍ ୩ଟି ରଙ୍ଗରେ ଲଞ୍ଚ୍ କରିଛି। ୨୦୨୫ ମସିହା ଜାନୁଆରୀ ମାସରୁ ଏହାର ଡେଲିଭରୀ ଆରମ୍ଭ ହେବ।
