ଭୁବନେଶ୍ବର: ଚଳିତ ବର୍ଷ ବନ୍ୟା ଓଡ଼ିଶା ପାଇଁ ଆଣିଛି ବିଭୀଷିକା । ବନ୍ୟାରେ ୧୭ ଜଣଙ୍କ ମୃତ୍ୟୁ ଘଟିଥିବାବେଳେ ୨୦ ଜିଲାର ୧୧୨ଟି ବ୍ଲକ୍ ପ୍ରଭାବିତ ହୋଇଛି । ୫ଟି ଜିଲାର ବିିଭିନ୍ନ ନଦୀବନ୍ଧରେ ୩୨ଟି ଘାଇ ସୃଷ୍ଟି ହେବା ଯୋଗୁଁ ବ୍ୟାପକ କ୍ଷୟକ୍ଷତି ଘଟିଛି ।
ସରକାରଙ୍କ ସୂତ୍ରରୁ ମିଳିଥିବା ସୂଚନା ଅନୁସାରେ ଚଳିତ ବର୍ଷ ବନ୍ୟାରେ ଅନୁଗୋଳ, ବାଲେଶ୍ବର, ବରଗଡ଼, ଭଦ୍ରକ, ବୌଦ୍ଧ, କଟକ, ଢ଼େଙ୍କାନାଳ, ଜଗତସିଂହପୁର, ଯାଜପୁର,ଝାରସୁଗୁଡ଼ା, କେନ୍ଦ୍ରାପଡ଼ା, କେନ୍ଦୁଝର, ଖୋର୍ଧା, ମୟୂରଭଞ୍ଜ, ନୟାଗଡ଼, ନୂଆପଡ଼ା, ପୁରୀ, ସମ୍ବଲପୁର, ସୋନପୁର ଓ ସୁନ୍ଦରଗଡ଼ ଜିଲାର ୧୧୨ଟି ବ୍ଲକ ଅନ୍ତର୍ଗତ ୮୯୬ ପଞ୍ଚାୟତର ୩୨୫୬ ଗାଁ ପ୍ରଭାବିତ ହୋଇଛି । ଏଥିରେ ୨୧ଟି ପୌରାଞ୍ଚଳର ୭୫ ୱାର୍ଡ଼ ମଧ୍ୟ ବନ୍ୟାରେ କ୍ଷତିଗ୍ରସ୍ତ ହୋଇଛନ୍ତି ।
ଏହି ବନ୍ୟା ଯୋଗୁଁ ୧୪.୩୨ ଲକ୍ଷ ଲୋକ ପ୍ରଭାବିତ ହୋଇଛନ୍ତି ଏବଂ ୩୪୦ ଗାଁକୁ ଯୋଗାଯୋଗ ବିଚ୍ଛିନ୍ନ ହୋଇଛି ଏବଂ ୧୦୩୮୨ ଘର ନଷ୍ଟ ହୋଇଛି । ଏହାବ୍ୟତୀତ ୧,୬୮,୯୦୪ ହେକ୍ଟର ଜମିର ଫସଲ ନଷ୍ଟ ହୋଇଥିବା ପ୍ରାଥମିକ ଭାବରେ ଆକଳନ କରାଯାଇଛି ।
ବନ୍ୟା ମୁକାବିଲା ନିମନ୍ତେ ସରକାରଙ୍କ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି । ଉଦ୍ଧାର କାର୍ଯ୍ୟ ନିମନ୍ତେ ୧୪ଟି ଏନଡ଼ିଆରଏଫ୍, ୧୭ ଓଡ଼ିଆରଏଫ୍ ଓ ୨୨ଟି ଅଗ୍ନିଶମ ବାହିନୀକୁ ନିୟୋଜିତ କରାଯାଇଛି। ୨୫୪ଟି ରବର ବୋଟ ସହାୟତାରେ ବିଭିନ୍ନ ସ୍ତାନରେ ଲୋକମାନଙ୍କୁ ଜଳବନ୍ଦୀ ଘେରରୁ ବାହାରକୁ ଅଣାଯାଇଛି । ସେହିପରି ଲୋକଙ୍କୁ ସ୍ବାସ୍ଥ୍ୟ ସୁବିଧାଯୋଗାଇ ଦେବା ପାଇଁ ୪୫ଟି ଡ଼ାକ୍ତରୀ ଦଳ ଓ ଗୋରୁଗାଈଙ୍କ ଚିକିତ୍ସା ନିମନ୍ତେ ୪୨ଟି ପଶୁ ଚିକିତ୍ସକ ଦଳଙ୍କୁ ନିଯୁକ୍ତି ଦିଆଯାଇଥିବା ସୂଚନା ମିଳିଛି ।
Comments are closed.