ନୂଆଦିଲ୍ଲୀ: ବର୍ତ୍ତମାନ ଦିନରେ ଭାରତୀୟ ରେଳବାଇ ମୂଷା ଗାତ ଖୋଜିବାରେ ବ୍ୟସ୍ତ ରହୁଛି। ଜିପିଆର ଜ୍ଞାନକୌଶଳରେ ନିର୍ମିତ ଯନ୍ତ୍ର ଦ୍ୱାରା ରେଳ ରାସ୍ତା ତଳେ ନିର୍ମିତ ମୂଷା ଓ ଠେକୁଆ ଦ୍ୱାରା ନିର୍ମିତ ଗାତ ଖୋଜୁଛି ରେଳବାଇ। ଏହି ସବୁ ଗାତରେ ବର୍ଷା ଦିନରେ ପାଣି ଭର୍ତ୍ତି ହୋଇଯାଇ ଏକାଧିକ ରେଳ ଦୁର୍ଘଟଣା ଘଟୁଥିବାରୁ ରେଳବାଇ ପକ୍ଷରୁ ଏଭଳି ପଦକ୍ଷେପ ଗ୍ରହଣ କରାଯାଇଛି। ରେଳବାଇ ଅଧିକାରୀଙ୍କଠାରୁ ମିଳିଥିବା ସୂଚନା ଅନୁଯାୟୀ ଏହି ଯନ୍ତ୍ର ଦ୍ୱାରା ପ୍ରତି ଦିନ ୧୬୦କିମି ଦୂରତା ପର୍ଯ୍ୟନ୍ତ ରେଳ ରାସ୍ତାର ଅନୁନ୍ଧ୍ୟାନ କରାଯାଇ ପାରିବ। ଏହି ସର୍ଭେ ସମୟରେ ଉକ୍ତ ଯନ୍ତ୍ର ଟ୍ରାକ ଉପରେ ପଡ଼ିଥିବା ପଥରକୁ ସନ୍ତୁଳିତ କରିବା ସହ ତଳେ ଥିବା ମୂଷା ଗାତର ସନ୍ଧାନ ପ୍ରଦାନ କରିବ। ମୂଷା ଗାତ ଠାବ କରିବା ପରେ ଏହି ଯନ୍ତ୍ର ଏହାର ବିସ୍ତୃତ ରିପୋର୍ଟ ପ୍ରଦାନ କରିବ।
ପୂର୍ବରୁ ମଧ୍ୟ ରେଳବାଇ ମୂଷା ମାରିବା ପାଇଁ ଲକ୍ଷ୍ନୌ, ଭଟିଣ୍ଡା ପରି ଜୋନରେ ଲକ୍ଷାଧିକ ମୂଲ୍ୟର ଟେଣ୍ଡର ଦେଇଥିଲେ। ଏହା ଦ୍ୱାରା ମୂଷା ମରିଗଲା କିନ୍ତୁ ମୂଷା ଗାତ ଗୁଡ଼ିକ ଅକ୍ଷତ ରହିଗଲା।
୨୦୧୬-୧୭ରେ ଭାରତୀୟ ରେଳ ବରେଲି ଜଙ୍ଗସନରେ ମୂଷା ମାରିବାକୁ ୩ଲକ୍ଷ ଟଙ୍କାର ଟେଣ୍ଡର ଦେଇଥିଲେ। ସେହିପରି ମଧ୍ୟପ୍ରଦେଶର ରତଲାମ ଜଙ୍ଗସନରେ ମଧ୍ୟ ୪ଲକ୍ଷ ଟଙ୍କାର ଟେଣ୍ଡର ଦିଆଯାଇଛି। ତେବେ ଏହା ସତ୍ତ୍ୱେ ମୂଷା ସଂଖ୍ୟା କମି ନଥିଲା।