ନୂଆଦିଲ୍ଲୀ: ରାସ୍ତାରେ ପଡ଼ିଥିଲା ୫ଶହ ଟଙ୍କିଆ ନୋଟ୍ । ଘଣ୍ଟାଘଣ୍ଟା ଟଙ୍କା ପଡ଼ିଥିଲେ ବି କେହି ଉଠାଇଲେ ନାହିଁ । ଓଲଟି ପୁଲିସକୁଖବର ଦେଲେ । ପୁଲିସ ହାତରେ ଦସ୍ତାନା ଲଗାଇ ନୋଟକୁ ଉଠାଇ ଲଫାପାରେ ଭର୍ତିକଲା । କାହାର ନୋଟ୍ ଖୋଜିଲା । ଶେଷରେ ନୋଟ ହଜାଇଥିବା ମହିଳାଙ୍କୁ ଟଙ୍କା ହସ୍ତାନ୍ତର କରିବା ବେଳେ ପୁଲିସ ଅଧିକାରୀ କହିଲେ – ସତରେ କଣ ରାମରାଜ୍ୟ ଆସିଗଲା କି ? ଘଟଣାଟି ଘଟିଛି ଦିଲ୍ଲୀରେ ।
ଗୁରୁବାର ଦିନ ଦିଲ୍ଲୀର କେଶଭପୁରମ୍ ଅଞ୍ଚଳରେ ରାସ୍ତାରେ ୫ଶହ ଟଙ୍କିଆ ୩ଟି ନୋଟ୍ ପଡିଥିବାର ଲୋକମାନେ ଦେଖିଥିଲେ । ହେଲେ କେହି ଏହି ଟଙ୍କାକୁ ଉଠାଇଲେ ନାହିଁ । କାଳେ କରୋନା ସଂକ୍ରମଣ ପାଇଁ କେହି ଏହାକୁ ପକାଇଥିବା ଭାବି ଲୋକମାନେ ଏହାକୁ ନେଇ ପୁଲିସକୁ ଖବର ଦେଲେ । ପୁଲିସ ଖବର ପାଇ ଘଟଣାସ୍ଥଳରେ ପହଞ୍ଚିଲା ଏବଂ ଏହାକୁ ଯାଞ୍ଚ ପାଇଁ ନେବା ସହ ସମଗ୍ର ଅଞ୍ଚଳକୁ ସିଲ୍ କରି ଦେଲା ।
ପରେ ଜଣାପଡ଼ିଲା ଟଙ୍କା ଜଣେ ଶିକ୍ଷୟିତ୍ରୀଙ୍କର । ସେ ଟଙ୍କା ଏଟିଏମରୁ ଉଠାଇବା ପରେ କରୋନା ଭୂତାଣୁ ଭୟରେ ତାହାକୁ ସାବୁନ୍ ପାଣିରେ ଧୋଇଥିଲେ । ଧୋଇଥିବା ଓଦା ଟଙ୍କାକୁ ଘରର ବାଲ୍କୋନିରେ ଶୁଖାଇଥିଲେ । ମାତ୍ର ପରେ ଦେଖିବା ବେଳକୁ ସେହି ଟଙ୍କାରୁ ୩ ଖଣ୍ଡ ୫ଶହ ଟଙ୍କିଆ ନୋଟ୍ କେଉଁଆଡ଼େ ଉଡ଼ି ଯାଇଛି । ମହିଳାଙ୍କ କଥା ଶୁଣି ଥାନା ଅଧିକାରୀ ଉଦ୍ଧାର ହୋଇଥିବା ନୋଟ୍ ସିରିଜ୍ ସହ ମହିଳା ଏଟିଏମରୁ ଆଣିଥିବା ନୋଟ୍ ର ସିରିଜ ମିଶାଇଥିଲେ । ମହିଳାଙ୍କ ଏଟିଏମ୍ ର ସ୍ଲିପ୍ ଦେଖିବା ପରେ ଟଙ୍କାକୁ ତାଙ୍କୁ ହସ୍ତାନ୍ତର କରିଥିଲେ ।
ଅନୁରୂପ ଭାବରେ ରାଞ୍ଚିରେ ମଧ୍ୟ ଏକ ଘଟଣା ଦେଖିବାକୁ ମିଳିଛି । ରାସ୍ତାରେ ୫୦୦ ଟଙ୍କିଆ ନୋଟ ପଡ଼ିଥିଲେ ମଧ୍ୟ କେହି ନ ଉଠାଇ ପୁଲିସକୁ ଖବର ଦେଇଛନ୍ତି । ପୁଲିସ ଟଙ୍କାକୁ ଜବତ କରିଛି ।
