ଦୀର୍ଘ ନିରବତା ପରେ ଭାରତୀୟ କ୍ରିକେଟର ଅନ୍ୟତମ ସଫଳ ଖେଳାଳି ଯୁବରାଜ ସିଂହ ଖୋଲିଛନ୍ତି ମୁହଁ । କର୍କଟ ରୋଗରୁ ମୁକ୍ତ ହେବା ପରେ ଦଳକୁ ତାଙ୍କର ପ୍ରତ୍ୟାବର୍ତନ କରିବାରେ ବିରାଟ କୋହଲିଙ୍କର ବଡ଼ ଯୋଗଦାନ ରହିଥିଲା । କୋହଲିଙ୍କ ବିନା ସମର୍ଥନରେ ସେ ଦଳକୁ କେବେ ବି ଫେରି ପାରି ନଥାନ୍ତେ ବୋଲି କହିଛନ୍ତି ଯୁବରାଜ ।
ଭାରତର ଏହି ପୂର୍ବତନ ଅଲରାଉଣ୍ଡର ଯୁବରାଜ ସିଂହ ଏକଦା ଥିଲେ କ୍ରିକେଟର ସେନ୍ସେସନ । ତାଙ୍କର ଆକାଶଛୁଆଁ ଛକ୍କା ଓ ରକେଟ୍ ଗତିରେ ସୀମା ପାର ହେଉଥିବା ଚୌକା ଦେଖିବାକୁ କ୍ରିକେଟ୍ ପ୍ରଶଂସକମାନେ ବାଉଳା ହୋଇ ଯାଉଥିଲେ । ୨୦୦୭ରେ ଟି-୨୦ ବିଶ୍ଵକପ୍ ଓ ୨୦୧୧ ବିଶ୍ଵକପ୍ ବିଜୟର ନାୟକ ଥିଲେ ଯୁବରାଜ । ମାତ୍ର କର୍କଟ ତାଙ୍କର କ୍ରିକେଟ ଜୀବନ ଉପରେ କଳା ବାଦଲ ଢ଼ାଙ୍କି ଦେଇଥିଲା । ୨୦୧୭ରେ ସେ ୱେଷ୍ଟଇଣ୍ଡିଜ୍ ବିରୋଧରେ ଶେଷ ମ୍ୟାଚ ଖେଳିଥିଲେ । ସେହିବର୍ଷ ଇଂଲଣ୍ଡ ବିପକ୍ଷରେ ତାଙ୍କ କ୍ୟାରିଅରର ଶ୍ରେଷ୍ଠ ସ୍କୋର କରିବାକୁ ସକ୍ଷମ ହୋଇଥିଲେ ।
ପ୍ରାୟ ୩ ବର୍ଷ ପରେ ଯୁବରାଜ ଭାରତୀୟ ଦଳକୁ ଫେରିଥିଲେ । କଟକରେ ସେ ଦିନିକିଆ ମ୍ୟାଚରେ ୧୫୦ ରନ୍ ସଂଗ୍ରହ କରି ତାଙ୍କ ପ୍ରତ୍ୟାବର୍ତନର ସଫଳତା ସାବ୍ୟସ୍ତ କରିଥିଲେ । ତାଙ୍କର ଏହି ପ୍ରତ୍ୟାବର୍ତନ ନିମନ୍ତେ ଅଧିନାୟକ କୋହଲି ହିଁ ସମର୍ଥନ କରିଥିଲେ ବୋଲି ନ୍ୟୁଜ୍ ୧୮କୁ ଏକ ସାକ୍ଷାତକାରରେ କହିଛନ୍ତି ଯୁବରାଜ ସିଂହ । ତେବେ ଏହି ଅବସରରେ ସେ ଧୋନିଙ୍କ ସମ୍ପର୍କରେ ମଧ୍ୟ ଟୀପ୍ପଣୀ ଦେଇଛନ୍ତି । ସେ କହିଛନ୍ତି ଏକଦା ଧୋନୀ ତାଙ୍କୁ ବେଶ୍ ଭଲ ପାଉଥିଲେ ଓ ଦଳରେ ତାଙ୍କର ଭବିଷ୍ୟତ ସମ୍ପର୍କରେ ଚିତ୍ର ଆଗୁଆ ଦେଖାଇ ଦେଇଥିଲେ ।
ଯୁବରାଜ କହିଛନ୍ତି ଯେତେବେଳେ ମୁଁ ପ୍ରତ୍ୟାବର୍ତ୍ତନ କଲି, ବିରାଟ କୋହଲି ମୋତେ ସମର୍ଥନ କରିଥିଲେ। ଯଦି ସେ ମୋତେ ସମର୍ଥନ କରିନଥାନ୍ତେ ତେବେ ମୁଁ ପ୍ରତ୍ୟାବର୍ତ୍ତନ କରିନଥା’ନ୍ତି । କିନ୍ତୁ ସେତେବେଳେ ଧୋନି ହିଁ ମୋତେ ୨୦୧୯ ବିଶ୍ୱକପ ବିଷୟରେ ସଠିକ୍ ଚିତ୍ର ଦେଖାଇଥିଲେ । ଚୟନକର୍ତାମାନେ ତାଙ୍କୁ ୨୦୧୯ ବିଶ୍ଵକପ ପାଇଁ ମନୋନୀତ କରିବେ ସେ ବିଶ୍ଵାସ ଧୋନୀଙ୍କର ନ ଥିଲା ।
ଯୁବରାଜ ମଧ୍ୟ ୨୦୧୭ ଚାମ୍ପିଅନ୍ସ ଟ୍ରଫି ଦଳର ସଦସ୍ୟ ଥିଲେ । ଏହି ପ୍ରତିଯୋଗୀତାରେ ସେମାନେ ଭଲ ପ୍ରଦର୍ଶନ କରି ପାରି ନ ଥିଲେ । ପାକିସ୍ଥାନ ବିରୋଧରେ ୫୩ ରନ୍ ବ୍ୟତୀତ ସେ ସେପରି ଭଲ ପ୍ରଦର୍ଶନ କରିପାରି ନ ଥିଲେ । ମାତ୍ର ୨୦୧୧ ବିଶ୍ଵକପ୍ ପର୍ଯ୍ୟନ୍ତ ସେ ଧୋନୀଙ୍କର ବେଶ୍ ନିକଟତର ଥିଲେ । ଏପରିକି ଧୋନୀ ତାଙ୍କୁ ଦଳର ପ୍ରମୁଖ ଖେଳାଳି ବୋଲି କହୁଥିଲେ । ତାଙ୍କ ଉପରେ ପୁରା ବିଶ୍ଵାସ ସ୍ଥାପନ କରୁଥିଲେ । ମାତ୍ର ଅସୁସ୍ଥତାରୁ ସୁସ୍ଥ ହୋଇ ଫେରିବା ପରେ ଖେଳ ବଦଳି ଯାଇଥିଲା ଓ ତାଙ୍କ ସ୍ଥାନ ନେବା ପାଇଁ ଆଉ କେହି ଚାଲି ଆସିଥିଲେ ବୋଲି କହିଛନ୍ତି ଯୁବରାଜ ।
