ସମାଜ ଡିଜିଟାଲ ଡେସ୍କ: ବିବାଦୀୟ ଭାରତୀୟ ପ୍ରଶାସନିକ ସେବା (ଆଇଏଏସ) ଅଧିକାରୀ ପୂଜା ଖେଡକରଙ୍କ ମା’ ମନୋରମା ଖେଡକରଙ୍କୁ ପୁଣେ ପୁଲିସ ଗୁରୁବାର ଗିରଫ କରିଛି। ଚାଷୀଙ୍କୁ ନିଜର ବନ୍ଧୁକ ଦେଖାଇ ଧମକାଉଥିବା ନେଇ ଏକ ଭିଡିଓ ସାମାଜିକ ଗଣମାଧ୍ୟମରେ ପ୍ରଘଟ ହୋଇଥିଲା। ଏହି ଘଟଣାରେ ପୁଲିସ ତାଙ୍କୁ ରାଇଗଡ଼ର ଏକ ହୋଟେଲରୁ ଗିରଫ କରିଥିବା ସୂଚନା ମିଳିଛି। ଉକ୍ତ ଭିଡିଓ ସାମ୍ନାକୁ ଆସିବା ପରେ ପୁଣେ ଗ୍ରାମାଞ୍ଚଳ ପୁଲିସର ୩ଟି ଟିମ୍ ତାଙ୍କୁ ଖୋଜୁଥିଲା। ମନୋରମା ମହଦ ଅଞ୍ଚଳରେ ଏକ ହୋଟେଲରେ ଆତ୍ମଗୋପନ କରିଥିବା ଖବର ପାଇ ପୁଲିସ ସେଠାରେ ଚଢ଼ାଉ କରି ତାଙ୍କୁ ଗିରଫ କରିଛି। ସେଠାରୁ ତାଙ୍କୁ ପୁଣେ ଅଣାଯାଉଥିବା ସୂଚନା ମିଳିଛି।
ଆଇଏଏସ ଚାକିରି ପାଇବା ପରେ ପୂଜା ନିଜ ଅଡି କାରରେ ନାଲିବତୀ ଲଗାଇବା ଏବଂ ଶିକ୍ଷାନବିସ ଭାବେ କାର୍ଯ୍ୟ କରୁଥିବାବେଳେ ସହକର୍ମୀଙ୍କ କାର୍ଯ୍ୟାଳୟକୁ ଜୋରଜବରଦସ୍ତ ମାଡ଼ି ବସିବା ଘଟଣା ସାମ୍ନାକୁ ଆସିବା ପରେ ସେ ବିବାଦ ଘେରକୁ ଆସିଥିଲେ। ଅଧିକ ଖୋଳତାଡ଼ ହେବାରୁ ଧୀରେ ଧୀରେ ସେ ଏବଂ ତାଙ୍କ ପରିବାରର କଳା କାରନାମା ପଦାକୁ ଆସିଥିଲା। ପୂଜାଙ୍କ ବାପା ଜଣେ ଅବସରପ୍ରାପ୍ତ ସରକାରୀ ଅଧିକାରୀ ଥିବାବେଳେ ସେ ବି କାର୍ଯ୍ୟକାଳୟ ସମୟରେ ଲାଞ୍ଚ ନେଇ ୨ ଥର ଧରାପଡ଼ିଥିଲେ। ପୂଜା ବି ଚାକିରି ପାଇଁ ଜାଲ ପ୍ରମାଣପତ୍ର ଦେଇଥିବା ଅଭିଯୋଗ ହୋଇଥିଲା। ସେ ୨୧ କୋଟି ଟଙ୍କାର ମାଲିକ ହୋଇ ବି ପଛୁଆ ବର୍ଗ କୋଟାରେ ଚାକିରି ପାଇଛନ୍ତି। ଏସବୁ ଘଟଣାର ତଦନ୍ତ ଚାଲିଥିବାବେଳେ ପୂଜାଙ୍କୁ ମସୌରୀ ଫେରାଇ ନିଆଯାଇଛି।
