ମସ୍କାଟ୍: ଏଠାରେ ଚାଲିଥିବା ଏସିଆନ୍ ଚମ୍ପିଆନ୍ସ ଟ୍ରଫି ପୁରୁଷ ହକି ଟୁର୍ଣ୍ଣାମେଣ୍ଟରେ କ୍ରମାଗତ ୩ୟ ବିଜୟ ହାସଲ କରିଛି ଭାରତ। ରବିବାର ଖେଳା ଯାଇଥିବା ୩ୟ ଲିଗ୍ ମ୍ୟାଚ୍ରେ ଜାପାନକୁ ୯-୦ ଗୋଲ୍ର ବିପୁଳ ବ୍ୟବଧାନରେ ଭାରତ ପରାସ୍ତ କରିଛି। ଏହି ବିଜୟ ସହ ୩ଟି ମ୍ୟାଚ୍ରୁ ୯ ପଏଣ୍ଟ ସହ ଭାରତ ଟେବୁଲ ଶୀର୍ଷରେ ପହଞ୍ଚି ସେମିଫାଇନାଲ ଖେଳିବା ପ୍ରାୟ ନିଶ୍ଚିତ କରିଛି। ୨୩ରେ ମାଲେସିଆ ବିପକ୍ଷରେ ଭାରତ ୪ର୍ଥ ମ୍ୟାଚ୍ ଖେଳିବ। ଗତ ଏସୀୟ କ୍ରୀଡ଼ା ସେମିଫାଇନାଲରେ ମାଲେସିଆଠାରୁ ଭାରତ ପରାସ୍ତ ହୋଇଥିବା ବେଳେ ଏହାର ପ୍ରତିଶୋଧ ନେବା ଲକ୍ଷ୍ୟରେ ଭାରତ ପଡ଼ିଆକୁ ଓହ୍ଲାଇବ।
ଓମାନ୍ ଓ ପାକିସ୍ତାନକୁ ହରାଇଥିବା ଭାରତ ଆତ୍ମବିଶ୍ୱାସର ସହ ଜାପାନ ସହ ଖେଳିଥିଲା। ୪ର୍ଥ ମିନିଟରେ ଗତଥରର ଚମ୍ପିଆନ୍ ଭାରତ ପ୍ରଥମ ଗୋଲ୍ ଦେଇଥିଲା। ଆକାଶଦୀପ ସିଂହଙ୍କ ପାସ୍ରୁ ଲଳିତ ଉପାଧ୍ୟାୟ ଏହି ଗୋଲ୍ ଦେଇଥିଲେ। ୮ମ ମିନିଟରେ ଭାରତକୁ ମିଳିଥିବା ପେନାଲ୍ଟି କର୍ଣ୍ଣରକୁ ଜାପାନ ଗୋଲ୍ରକ୍ଷକ ରୋକିଥିଲେ। ତେବେ ଗୁରଜାନ୍ତ ସିଂହ ବଲ୍କୁ ଗୋଲ୍ ମଧ୍ୟକୁ ପଠାଇ ଦେଇଥିଲେ। ପ୍ରଥମ କ୍ୱାର୍ଟରରେ ଭାରତ ୨-୦ ଗୋଲ୍ରେ ଆଗୁଆ ରହିଥିଲା। ୧୭ ମିନିଟରେ ଗୋଲ୍ ଅଭିମୁଖୀ ବଲ୍ ଜାପାନ ଡିଫେଣ୍ଡରଙ୍କ ଶରୀରରେ ବାଜିବାକୁ ଭାରତକୁ ପେନାଲ୍ଟି ଷ୍ଟ୍ରୋକ୍ ମିଳିଥିଲା। ଏଥିରୁ ହରମନପ୍ରୀତ ସିଂହ ଗୋଲ୍ଦେଇ ଦଳକୁ ୩-୦ରେ ଆଗୁଆ କରିଥିଲେ। ୨୧ ମିନିଟରେ ପେନାଲ୍ଟି କର୍ଣ୍ଣରରୁ ଜୋରଦାର ହିଟ୍ମାରି ହରମନପ୍ରୀତ ସିଂହ ଭାରତ ପାଇଁ ୪ର୍ଥ ଗୋଲ୍ ଦେଇଥିଲେ। ଭାରତ ମଧ୍ୟାନ୍ତର ସୁଦ୍ଧା ୪-୦ ଗୋଲ୍ରେ ଆଗୁଆ ରହିଥିଲା। ୩୫ ମିନିଟରେ ଆକାଶଦୀପ ସିଂହ ଭାରତ ପାଇଁ ୫ମ ଗୋଲ୍ ସ୍କୋର୍ କରିଥିଲେ। ପରେ ଅଳ୍ପ ବ୍ୟବଧାନରେ କୋଥାଜିତ ସିଂହ ଓ ଲଳିତ ଉପାଧ୍ୟାୟ ଆଉ ୨ଟି ଗୋଲ୍ଦେଇ ଭାରତକୁ ୭-୦ ଗୋଲ୍ରେ ଆଗୁଆ କରିଥିଲେ। ୪୯ ମିନିଟରେ ପେନାଲ୍ଟି କର୍ଣ୍ଣରରୁ ବଲ୍ ପାଇ ମନଦୀପ ସିଂହ ଭାରତ ଲାଗି ୮ମ ଗୋଲ୍ ଦେଇଥିଲେ। ପରେ ଜାପାନକୁ କ୍ରମାଗତ ୨ଟି ପେନାଲ୍ଟି କର୍ଣ୍ଣର ମିଳିଥିଲେ ହେଁ ଉଭୟ ବେକାର ହୋଇଥିଲା। ୫୭ ମିନିଟରେ ଅଧିନାୟକ ମନପ୍ରୀତ ସିଂହଙ୍କ ପାସ୍ରୁ ମନଦୀପ ସିଂହ ଦଳ ପାଇଁ ୯ମ ତଥା ବ୍ୟକ୍ତିଗତ ୨ୟ ଗୋଲ୍ ଦେଇଥିଲେ।
ଜାପାନକୁ ୯-୦ ଗୋଲ୍ରେ ହରାଇଲା ଭାରତ
Popular Categories
Previous article
Next article