ପାଟଣା: ନକଲି ଡାକ୍ତର ସାଜି ଔଷଧ ଦୋକାନୀ ଦେଲେ ଇଞ୍ଜେକ୍ସନ। ୪ ମିନିଟ ଭିତରେ ଉଡ଼ିଗଲା ଛାତ୍ରଙ୍କ ପ୍ରାଣବାୟୁ। ଏଭଳି ଏକ ଦୁଃଖଦ ଘଟଣା ଘଟିଛି କେନ୍ଦୁଝର ଜିଲାର ପାଟଣା ଥାନା ଅଞ୍ଚଳରେ। ଭୁଲ ଇଞ୍ଜେକ୍ସନ ନେଇ ଆଖି ବୁଜିଛନ୍ତି ସାହାରପଡ଼ା ସରସ୍ଵତୀ ଶିଶୁ ବିଦ୍ୟାମନ୍ଦିରରେ ଦଶମ ଶ୍ରେଣୀରେ ପଢୁଥିବା ପଣ୍ଡାପଡା ଗ୍ରାମର ବିଜୟ କୁମାର ମୁଣ୍ଡାଙ୍କ ପୁଅ ଶୁକଦେବ ମୁଣ୍ଡା(୧୫)।
ଘଟଣାରୁ ପ୍ରକାଶ ଯେ, ଶୁକଦେବ ସରସ୍ବତୀ ଶିଶୁ ବିଦ୍ୟାମନ୍ଦିର ହଷ୍ଟେଲରେ ରହି ପଢ଼ୁଥିଲେ। ସେ ଚର୍ମରୋଗରେ ଆକ୍ରାନ୍ତ ହେବାରୁ ଶିକ୍ଷକମାନେ ତାଙ୍କ ବାପା ବିଜୟଙ୍କୁ ଡାକି ପୁଅର ଚିକିତ୍ସା ପାଇଁ ପରାମର୍ଶ ଦେଇଥିଲେ। ଗୁରୁବାର ବିଜୟ ସାହାରପଡାର ଏକ ଔଷଧ ଦୋକାନକୁ ପୁଅକୁ ନେଇଥିଲା। ଚର୍ମରୋଗ ଭଲ ହେବା ପାଇଁ ସେ ଏକ ମଲମ ମାଗିଥିଲେ। ଦୋକାନୀ ଜଣକ ଶୁକଦେବକୁ ମଲମ ଦେବା ବଦଳରେ ଏକ ଇଞ୍ଜେକ୍ସନ ଦେବା ସହ ଚର୍ମରୋଗ ଭଲ ହୋଇଯିବ ବୋଲି କହିଥିଲେ। ହେଲେ ଇଞ୍ଜେକ୍ସନ ନେବା ମାତ୍ରେ ୩ରୁ ୪ମିନିଟ ଭିତରେ ଶୁକଦେବ ବାନ୍ତି କରି ସଂଜ୍ଞାହୀନ ହୋଇପଡ଼ିଥିଲେ। ତୁରନ୍ତ ଆମ୍ବୁଲାନ୍ସ ଯୋଗେ ତାଙ୍କୁ ଡାକ୍ତରଖାନାକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସାହାରପଡ଼ା ପୁଲିସ ଖବରପାଇ ଘଟଣାର ତଦନ୍ତ ଆରମ୍ଭ କରିଛି। ତେବେ ବ୍ୟବଚ୍ଛେଦ ରିପୋର୍ଟ ମିଳିବା ପରେ ମୃତ୍ୟୁର କାରଣ ଜଣାପଡିବ ବୋଲି କୁହାଯାଇଛି।
Comments are closed.