କେନ୍ଦୁଝରଗଡ଼ : ବନବାସୀ ଚେତନା ମଣ୍ଡଳ ପକ୍ଷରୁ ବାଂଶପାଳ ବ୍ଲକ ଗୋନାସିକା ଠାରେ ବିଶ୍ୱ ଜଳ ଦିବସ ପାଳିତ ହୋଇଯାଇଛି । ଲକ୍ଷ୍ମୀଧର ଜୁଆଙ୍ଗଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ବୈତରଣୀ ନଦୀ ସଂଘର୍ଷ କେନ୍ଦୁଝରର ସଂଯୋଜକ ବୀରବର ନାଏକ ମୁଖ୍ୟ ଅତିଥି ଭାବେ ଯୋଗଦେଇ ବୈତରଣୀ ନଦୀ ଜଳର ସଂରକ୍ଷଣ, ପରିଚାଳନା ଓ ବ୍ୟବହାର କିଭଳି କରାଗଲେ ଆଗାମୀ ଦିନରେ ଚୀରସ୍ରୋତା ବୈତରଣୀ ନଦିର ଜଳ ଉତ୍ସ ବଜାୟ ରହିବ ସେ ସମ୍ପର୍କରେ ବିସ୍ତୃତ ଭାବେ ଆଲୋକପାତ କରିଥିଲେ। ବୈତରଣୀ ନଦୀର ବିଭିନ୍ନ ସ୍ଥାନରେ ବନ୍ଧ ବନ୍ଧାଯାଇ ଜଳ ଉତ୍ସକୁ ସଂରକ୍ଷିତ କରାଯାଇ ପାରିଲେ ନଦୀର ଜଳ ଉତ୍ସ ରହିବା ସହ ଉଭୟ ପାର୍ଶ୍ବରେ ଥିବା ଚିରସବୁଜ ବନାନୀର ମଧ୍ୟ ସଂରକ୍ଷଣ ହୋଇପାରନ୍ତା ବୋଲି ଶ୍ରୀ ନାଏକ କହିଥିଲେ। ପାନୀୟଜଳ, କୃଷି କାର୍ଯ୍ୟ ଓ ଆନୁସଙ୍ଗିକ ବ୍ୟବହାର ପାଇଁ ନଦୀ, ଝରଣା ଓ ବନ୍ଧର ପାଣିକୁ ବ୍ୟବହାର କରାଯାଇ ପାରିଲେ ଆଗକୁ ଦେଖାଦେବାକୁ ଥିବା ଜଳସଙ୍କଟରୁ ରକ୍ଷା ମିଳି ପାରନ୍ତା ବୋଲି ମତ ପ୍ରକାଶ ପାଇଥିଲା । ପୃଥିବୀର ତୃତୀୟାଂଶ ଜଳ ରହିଥିଲେ ହେଁ ଆଗକୁ କିଭଳି ଜଳସଙ୍କଟ ଉତ୍କଟ ରୂପ ଧାରଣ କରିବାକୁ ଯାଉଛି ସେ ସମ୍ପର୍କରେ ବୈଜ୍ଞାନିକଙ୍କ ଗବେଷଣା ଆମ ସମସ୍ତଙ୍କ ପାଇଁ ସତର୍କ ଘଣ୍ଟି ହୋଇଥିବାରୁ ବେଳ ଥାଉଁ ଥାଉଁ ନଦୀ ଜଳର ସଂରକ୍ଷଣ ଓ ସଠିକ୍ ପରିଚାଳନା କରାଯିବା ନିହାତି ଆବଶ୍ୟକ ହୋଇପଡିଛି ବୋଲି ବକ୍ତାଗଣ କହିଥିଲେ। ଏଥିସହ ନଦୀକୁ କିଭଳି ଶୋଷଣ ଓ ପ୍ରଦୁଷଣରୁ ମକ୍ତ କରାଯାଇ ପାରିବ ସେ ସମ୍ପର୍କରେ ପଦକ୍ଷେପ ଗ୍ରହଣ କରିବା ନିହାତି ଜରୁରୀ ହୋଇପଡିଛି ବୋଲି କହିଥିଲେ। ନଦୀ ଜଳକୁ ସଂରକ୍ଷଣ କରିବାକୁ ହେଲେ ନଦୀ ଉଭୟ ପାର୍ଶ୍ବ ସମେତ ବ୍ୟାପକ ଚାରାରୋପଣ ଉପରେ ଗୁରୁତ୍ୱାରୋପ କରିଥିଲେ।
Comments are closed.