ଆଦିବାସୀ ମହିଳାଙ୍କୁ ଗଣ ବଳାତ୍କାର, ଜଣେ ଗିରଫ

ଚିତ୍ରଡା: ସହଯୋଗର ହାତ ବଢ଼ାଇ ଜନୈକା ବିବାହିତା ମହିଳାଙ୍କୁ ଗଣ ବଳାତ୍କାର କରିବା ଭଳି ଲଜ୍ୟାଜନକ ଘଟଣା ଘଟିଛି ମୟୂରଭଞ୍ଜ ଜିଲାର ମୋରଡା ଥାନା ଇଲାକାରେ। ଗତ ଶୁକ୍ରବାର ମୋରଡା ଥାନା ଅଞ୍ଚଳର ଉକ୍ତ ମହିଳା ବ୍ୟାଙ୍କ କାମ ପାଇଁ ଚାଲି ଚାଲି ଘରୁ ଚିତ୍ରଡାକୁ ଯାଉଥିଲେ। ତାଙ୍କର ପରିଚିତ ରାଜମିସ୍ତ୍ରୀ ଗୋପିନାଥପୁର ଗ୍ରାମର ସେକ ପୁଟୁକୁ ବାଇକରେ ଆସି ସହାୟତାର ହାତ ବଢାଇ ଚିତ୍ରଡାରେ ଛାଡିଦେବା ପାଇଁ ନେଇଯାଇଥିଲେ। ଚିତ୍ରଡାରେ ଛାଡ଼ିବା ବଦଳରେ ପଶ୍ଚିମବଙ୍ଗ ଅଞ୍ଚଳ ତାଙ୍କ ଭଉଣୀ ଘରକୁ ନେଇ ମୋବାଇଲ ଫୋନ ଜବତ କରି ବାରମ୍ବାର ବଳାତ୍କାର କରିଥିଲେ। ପରେ ପୁଟୁକୁର ବଡଭାଇ ସେକ ସିରାଜ ମହିଳାଙ୍କୁ ଉଦ୍ଧାର କରି ଆଣିବା ପାଇଁ ସହାୟତାର ହାତ ବଢାଇ ବିଳମ୍ବିତ ରାତିରେ ଏକ କାରରେ ସେଠାରେ ପହଞ୍ଚି ମହିଳାଙ୍କୁ ସେଠାରୁ ଉଦ୍ଧାର କରିଥିଲା।
ମହିଳାଙ୍କୁ ଆଣିବା ବାଟରେ କାର ଛିଡା କରି ଚାଳକ ସହ ୩ ଜଣ ଉଦ୍ଧାରକାରୀ ଜଣେ ପରେ ଜଣେ ବଳାତ୍କାର କରିଥିଲେ। ଶନିବାର ଭୋର ସମୟରେ ଚିତ୍ରଡା-ମୋରଡା ରାସ୍ତାର ଜମ୍ଭୀରା ନଦୀକୂଳ ନିକଟରେ ପୀଡିତାଙ୍କୁ ଗାଡିରୁ ଓହ୍ଲାଇ ଦେଇ ସେମାନେ​‌ ପଳାଇଗଲେ। ଲୋକଲଜ୍ୟାକୁ ଡରି ଆତ୍ମହତ୍ୟା କରିବାର ନିଷ୍ପତ୍ତି ନେବାବେଳେ ମୋବାଇଲ ଫୋନଦ୍ବାରା ସେ ସମ୍ପର୍କୀୟଙ୍କୁ ଫୋନ କରି ମନର କଥା ଜଣାଇଥିଲେ। ଖବର ପାଇ ପୀଡିତାଙ୍କ ସ୍ବାମୀ, ପରିବାର ଓ ଗ୍ରାମବାସୀ ତାଙ୍କୁ ଉଦ୍ଧାର କରି ଘରକୁ ନେଇଥିଲେ। ମୋରଡା ଥାନାରେ ଏତଲା ପରେ ଏକ ମାମଲା ରୁଜୁ କରାଯାଇ ଅଭିଯୁକ୍ତ ସେକ ସିରାଜକୁ ପୁଲିସ ଗିରଫ କରିଛି। ଅନ୍ୟ ୩ ଜଣ ଫେରାରଥିବାରୁ ପୁଲିସ ଖୋଜୁଛି। ପୀଡିତା ଜଣେ ୱାର୍ଡ ସଭ୍ୟା ଏବଂ ଏସଏଚଜିର ସଭ୍ୟା ହୋଇଥିବାରୁ ମହିଳା ଆନ୍ଦୋଳନ ଦାନା ବାନ୍ଧୁଥିବା ଜଣାପଡିଛି।