ଭୁବନେଶ୍ୱର: ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେଡି ପ୍ରତିଷ୍ଠା ଦିବସରେ ମହିଳାମାନଙ୍କ ଲାଗି ୩୩ ପ୍ରତିଶତ ସଂରକ୍ଷଣ କଥା କହିବା ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଏବଂ କୁମ୍ଭୀର କାନ୍ଦଣା ସଦୃଶ ବୋଲି ମହିଳା କଂଗ୍ରେସ ଅଭିଯୋଗ କରିଛି। ଆଜି କଂଗ୍ରେସ ଭବନ ଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ କଂଗ୍ରେସ ନେତ୍ରୀ ସ୍ମୃତିରେଖା ପହି ସିଧାସଳଖ ଭାବରେ ବିଜେଡି ମହିଳାଙ୍କୁ ନେଇ କେବଳ ରାଜନୀତି କରୁଛି ଏବଂ ମହିଳାମାନଙ୍କ ପ୍ରତି ଟିକେ ବି ଦରଦ ନାହିଁ, ଯଦି ତାହା ଥାନ୍ତା ଖୋଦ୍ ମୁଖ୍ୟମନ୍ତ୍ରୀଙ୍କ ଦାୟିତ୍ୱରେ ଥିବା ଗୃହ ବିଭାଗରେ ମହିଳାମାନଙ୍କ ଉପସ୍ଥିତି ଏତେ ଦୟନୀୟ ସ୍ଥିତିରେ ନଥାନ୍ତା ବୋଲି ଅଭିଯୋଗ କରିଛନ୍ତି।
ସେ କହିଛନ୍ତି ଯେ ମୁଖ୍ୟମନ୍ତ୍ରୀ ଲୋକସଭା ଓ ବିଧାନସଭାରେ ମହିଳାମାନଙ୍କ ପାଇଁ ୩୩ ପ୍ରତିଶତ ସଂରକ୍ଷଣ କଥା କହୁଥିବା ବେଳେ ନିଜ ବିଭାଗରେ ମହିଳାମାନଙ୍କୁ ୧୦% ରୁ ଅଧିକ ନିଯୁକ୍ତି ନଦେବା, କଥା ଓ କାର୍ଯ୍ୟ ଭିତରେ କେତେ ପାର୍ଥକ୍ୟ ତାହା ଜଳ ଜଳ ହୋଇ ଜଣାପଡୁଛି। ସେହିଭଳି ଓଡିଶା ବାଟାଲିଅନରେ ମହିଳା କମାଣ୍ଡୋ ନିଯୁକ୍ତି ପାଇନାହାନ୍ତି। ଯଦି ଆମ୍ଭେ ଅନ୍ୟ ରାଜ୍ୟମାନଙ୍କ ସହିତ ଓଡିଶାକୁ ତୁଳନା କରିବା ତେବେ ଏହା ୨୦ ପ୍ରତିଶତ ପାର୍ଥକ୍ୟ ଦେଖିବା। ରାଜ୍ୟରେ ଏ ସରକାର ଟ୍ରାଫିକ୍ ବିଭାଗରେ ମଧ୍ୟ ମହିଳା ଏ.ଏସ୍.ଆଇ ଓ ମହିଳା ପୋଲିସ ଡିଜିଙ୍କୁ ନିଯୁକ୍ତି ଦେଇନାହାନ୍ତି। କଂଗ୍ରେସ ଏକମାତ୍ର ଦଳ ଯିଏକି ରାଜ୍ୟରେ ମୁଖ୍ୟମନ୍ତ୍ରୀ ଭାବରେ ଏବଂ ଦେଶରେ ପ୍ରଧାନମନ୍ତ୍ରୀ ଭାବରେ ମହିଳାଙ୍କୁ ଦାୟିତ୍ୱ ଦେଇଛି। କଂଗ୍ରେସ ଶାସିତ ଛତିଶଗଡ ଏବଂ ଝାଡଖଣ୍ଡରେ ମହିଳାମାନଙ୍କୁ ନିଯୁକ୍ତି କ୍ଷେତ୍ରରେ ଅଧିକ ଗୁରୁତ୍ୱ ଦିଆଯାଉଥିବା ବେଳେ ଓଡିଶାରେ ମୁଖ୍ୟମନ୍ତ୍ରୀ କେତେ ପ୍ରତିଶତ ମହିଳାଙ୍କୁ ନିଯୁକ୍ତି ଦେଇଛନ୍ତି ତାହା ସ୍ପଷ୍ଟ କରନ୍ତୁ ବୋଲି ଶ୍ରୀମତୀ ପହି ପ୍ରଶ୍ନ କରିଛନ୍ତି। ରାଜ୍ୟରେ ନିଯୁକ୍ତି କ୍ଷେତ୍ରରେ ମହିଳାମାନଙ୍କୁ କେତେ ପ୍ରତିଶତ ନିଯୁକ୍ତି ମିଳିଛି ବିଜେପି ସ୍ପଷ୍ଟ କରୁ। ନାରୀ ନିର୍ଯ୍ୟାତନା, ଶିଶୁ ନିଖୋଜ ଏବଂ ଅତ୍ୟାଚାରରେ ରାଜ୍ୟର ସାଧାରଣ ଜନତା ଏବଂ ମହିଳାମାନେ ଅତିଷ୍ଠ ହୋଇପଡିଛନ୍ତି। ଏଥିରୁ ନଜର ହଟାଇବା ପାଇଁ ବିଜୁ ଜନତା ଦଳ ମହିଳାମାନଙ୍କୁ ୩୩ % ସଂରକ୍ଷଣ ବାର୍ତା ଏକ କୁମ୍ଭୀର କାନ୍ଦଣା ବୋଲି ଶ୍ରୀମତୀ ପହି ଅଭିଯୋଗ କରିଛନ୍ତି।
ପୂର୍ବତନ ଭୁବନେଶ୍ୱର ଜିଲ୍ଲା କଂଗ୍ରେସ କାର୍ଯ୍ୟକାରୀ ସଭାପତି ରଶ୍ମି ମହାପାତ୍ର କହିଲେ ଯେ ବର୍ତମାନ ବିଜେପି ମଧ୍ୟ ମହିଳାମାନଙ୍କ ପାଇଁ କୁମ୍ଭୀର କାନ୍ଦଣା କାନ୍ଦୁଛି। ୨୧ ବର୍ଷ ଶାସନ ମଧ୍ୟରେ ବିଜେଡି ସହିତ ବିଜେପି ୯ ବର୍ଷ କାଳ ମେଂଟ ସରକାର ଭାବରେ ସରକାରରେ ଥିଲେ। ସେତେବେଳେ ମହିଳାମାନଙ୍କ ପାଇଁ ରାଜ୍ୟରେ କ’ଣ କରାଯାଇଛି ବୋଲି ଶ୍ରୀମତୀ ମହାପାତ୍ର ପ୍ରଶ୍ନ କରିଥିଲେ। ପ୍ରଥମେ ତତ୍କାଳିନ ଉପାସରକାର ମହିଳାମାନଙ୍କ ସଂରକ୍ଷଣ ପ୍ରତି ଗୁରୁତ୍ୱ ଦେଇଥିଲେ। ଆଜି ବିଜେଡି ସରକାର ମହିଳା ଓ ଶିଶୁମାନଙ୍କ ପାଇଁ ଥାନାରେ କରିଥିବା ହେଲ୍ପ ଡେସ୍କ ନିଷ୍କ୍ରିୟ। ସେହିଭଳି ମହିଳାମାନଙ୍କ ପାଇଁ ପିଙ୍କ୍ ଅଟୋ ସେବା, ଗୁଗୁଲ୍ରେ ଉପଲବ୍ଧ ମହିଳା ହେଲପ୍ ଲାଇନ୍ ଆପ୍ ମଧ୍ୟ ଅକାମୀ ବୋଲି ଶ୍ରୀମତୀ ମହାପାତ୍ର କହିଥିଲେ।
ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ କଂଗ୍ରେସ ନେତ୍ରୀ ଶ୍ରୀମତୀ ସ୍ୱାଧିନବାଳା ଦାସ ଓ କୁସୁମ ପ୍ରଧାନ ଉପସ୍ଥିତ ଥିଲେ।
Comments are closed.