‘ମାନବୀୟ ତ୍ରୁଟିରୁ ହୋଇଛି ଦୁର୍ଘଟଣା’: ୧୦ ଲକ୍ଷ ଟଙ୍କା ସହାୟତା ଘୋଷଣା କଲେ ରେଳମନ୍ତ୍ରୀ

କଲକାତା: ମାନବୀୟ ତ୍ରୁଟି ଯୋଗୁ ଘଟିଛି ପଶ୍ଚିମବଙ୍ଗ ଟ୍ରେନ ଦୁର୍ଘଟଣା। ପ୍ରାଥମିକ ତଦନ୍ତରୁ ଏହା ଜଣାପଡ଼ିଛି ବୋଲି କହିଛି ରେଲୱେ ବୋର୍ଡ। ବୋର୍ଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଜୟା ବର୍ମା ସିହ୍ନା ଗଣମାଧ୍ୟମକୁ ଟ୍ରେନ ଦୁର୍ଘଟଣା ସମ୍ପର୍କରେ ସୂଚନା ଦେଇ କହିଛନ୍ତି ଯେ, ମନୁଷ୍ୟକୃତ ତ୍ରୁଟି ଯୋଗୁ ଏହି ଦୁର୍ଘଟଣା ଘଟିଛି। ସିଗନାଲ ସତ୍ତେ୍ୱ ଡ୍ରାଇଭର ଟ୍ରେନ ଅଟକାଇ ନ ଥିଲେ। ପଛରେ ଆସୁଥିବା ଟ୍ରେନ ଅଟକିବାର ଥିଲା, କିନ୍ତୁ ଡ୍ରାଇଭର ଗାଡ଼ି ଅଟକାଇ ନ ଥିଲେ। ଘଟଣାର ତଦନ୍ତ ଜାରି ରହିଛି। ତଦନ୍ତ ଶେଷ ହେବା ପରେ ପ୍ରକୃତ କାରଣ ଜଣାପଡ଼ିବ ବୋଲି ସିହ୍ନା କହିଛନ୍ତି।

ସେହିପରି ରେଳ ମନ୍ତ୍ରଣାଳୟ ପକ୍ଷରୁ ଏହି ଘଟଣାରେ ପ୍ରାଣ ହରାଇଥିବା ବ୍ୟକ୍ତିଙ୍କ ପରିବାରବର୍ଗଙ୍କୁ ୧୦ ଲକ୍ଷ ଟଙ୍କା ଲେଖାଏ ସହାୟତା ଘୋଷଣା କରାଯାଇଛି। ଏହା ସହିତ ଗୁରୁତର ଆହତଙ୍କୁ ଅଢ଼େଇ ଲକ୍ଷ ଏବଂ ଆହତଙ୍କୁ ୫୦ ହଜାର ଟଙ୍କା ଲେଖାଏ ସହାୟତା ଘୋଷଣା କରାଯାଇଛି। ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଏହି ସହାୟତା ଘୋଷଣା କରିବା ସହିତ ଘଟଣାସ୍ଥଳ ପରିଦର୍ଶନ ପାଇଁ ଜଲପାଇଗୁଡ଼ି ଯାତ୍ରା କରିଛନ୍ତି।

ସୋମବାର ସକାଳେ ବିହାର-ପଶ୍ଚିମବଙ୍ଗ ସୀମାନ୍ତ ନୂଆ ଜଲପାଇଗୁଡ଼ି ଷ୍ଟେଶନ ନିକଟରେ କାଞ୍ଚନଜଙ୍ଗା ଏକ୍ସପ୍ରେସକୁ ଏକ ମାଲଗାଡ଼ି ପଛପଟୁ ଧକ୍କା ଦେଇଥିଲା। ଏହି ଦୁର୍ଘଟଣାରେ ୧୫ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ମାଲବାହୀ ଟ୍ରେନର ଲୋକୋପାଇଲଟ ଏବଂ ସହକାରୀ ଲୋକୋପାଇଲଟ୍‌‌ଙ୍କ ମୃତ୍ୟୁ ଘଟିଛି। ସେହିପରି ଏକ୍ସପ୍ରେସ ଟ୍ରେନର ଗାର୍ଡଙ୍କର ବି ମୃତ୍ୟୁ ହୋଇଛି। ଏହା ସହିତ ୬୦ରୁ ଅଧିକ ଯାତ୍ରୀ ଆହତ ହୋଇଛନ୍ତି। ଅପରାହ୍ନ ୧ଟା ସୁଦ୍ଧା ଉଦ୍ଧାର କାର୍ଯ୍ୟ ଶେଷ ହୋଇଥିବା ରେଲୱେ ବୋର୍ଡ ସିଇଓ ସିହ୍ନା ସୂଚନା ଦେଇଛନ୍ତି।