ଫୁଲବାଣୀ: କନ୍ଧମାଳ ଜିଲା ଫିରିଙ୍ଗିଆ ବ୍ଲକ ଡିଣ୍ଡିରାଗାଁ ଗ୍ରାମ ପଞ୍ଚାୟତ ଟେଲାପାଲି ଗ୍ରାମ ନଦୀ ନିକଟରୁ ଏକ ବିରଳ ପ୍ରଜାତିର ଶାଗୁଣା ଉଦ୍ଧାର କରାଯାଇଛି । ସକାଳୁ ସକାଳୁ ଗାଁ ନିକଟରେ ଥିବା ନଦୀକୁ ଶୌଚ ହେବା ପାଇଁ ଯାଇଥିବା ବେଳେ ଟେଲାପାଲି ଗ୍ରାମର ୪ଜଣ ଯୁବକ ସୁନୀଲ ରଣା, ବିକାଶ ରଣା, ସିକୁ ରଣା ଏବଂ ନୀଳକଣ୍ଠ ରଣା ନାଳରେ ଏକ ବିରଳ ପ୍ରଜାତିର ପକ୍ଷୀଟିଏ ବସିଥିବା ଦେଖି ପ୍ରଥମେ ଭୟଭୀତ ହୋଇଥିଲେ । ପକ୍ଷୀଟି ଗୋଟାଏ ଜାଗାରେ ବସି ରହିଥିବା ବେଳେ ଉଡି ପାରୁନଥିଲା । ଯୁବକମାନେ ପକ୍ଷୀ ନିକଟକୁ ଯାଇ ତାକୁ ସୁରକ୍ଷିତ ଭାବରେ ଉଦ୍ଧାର କରିବା ସହ ଫିରିଙ୍ଗିଆ ଗଣମାଧ୍ୟମ ପ୍ରତିନିଧିମାନଙ୍କୁ ଜଣାଇଥିଲେ । ପକ୍ଷୀଟି ଉଦ୍ଧାର ହୋଇଥିବା ନେଇ ବନ ବିଭାଗକୁ ଜଣାଇଥିବା ବେଳେ ପକ୍ଷୀଟି ବିରଳ ପ୍ରଜାତିର ଶାଗୁଣା ଏବଂ ଏହି ପ୍ରଜାତି ବିଲୁପ୍ତ ପ୍ରାୟ ବୋଲି ଜଣା ପଡିଥିଲା। ଖବର ପାଇ ଘଟଣା ସ୍ଥଳରେ ସଙ୍ଗେ ସଙ୍ଗେ ବନାଞ୍ଚଳ ଅଧିକାରୀ ରବୀନ୍ଦ୍ର ପାତ୍ର, ବନପାଳ ପ୍ରବୀଣ କୁମାର ଦାଶ, ବନରଖି ସୁଜିତ କୁମାର ପ୍ରଧାନ ଓ ବନ ବିଭାଗ ଟିମ ପହଞ୍ଚି ପକ୍ଷୀଟିକୁ ଉଦ୍ଧାର କରିବା ସହ ଏକ ଅଟୋରେ ସୁରକ୍ଷିତ ଭାବେ ଫୁଲବାଣୀକୁ ନେଇଥିବା ଜଣା ପଡିଛି ।
ଉଦ୍ଧାର ହୋଇଥିବା ପକ୍ଷୀର ମୁଣ୍ଡରେ କୌଣସି କାରଣ ବଶତଃ ଆଘାତ ରହିଛି। ତେଣୁ ତାକୁ ପ୍ରାଣୀ ଚିକିତ୍ସାଳୟକୁ ନେଇ ଚିକିତ୍ସା କରାଇଥିବା ଜଣା ପଡିଛି । ଅଧିକ ଚିକତ୍ସା ସହିତ ସୁରକ୍ଷା ପାଇଁ ବନ ବିଭାଗ ବରିଷ୍ଠ ଅଧିକାରୀ ମାନଙ୍କର ନିଷ୍ପତ୍ତି ପ୍ରକାରେ ନନ୍ଦନ କାନନରେ ଛାଡିଥିବା ବନବିଭାଗ ସୂତ୍ରରୁ ଜଣା ପଡିଛି। ଅନ୍ୟପଟେ ବିରଳ ପ୍ରଜାତିର ପକ୍ଷୀ ହୋଇଥିବାରୁ ଶତାଧିକ ଲୋକେ ପକ୍ଷୀଟିକୁ ଦେଖିବା ପାଇଁ ଧାଡି ଲମ୍ବୀଥିବା ଦେଖିବାକୁ ମିଳିଥିଲା। ବନ ବିଭାଗର ସୂଚନା ପ୍ରକାରେ , ଏହା ଏକ ବିଲୁପ୍ତ ପ୍ରାୟ ପକ୍ଷୀ, ଯାହାକି ୧୯୯୯ ମସିହା ମହାବାତ୍ୟା ପରେ ସାଧାରଣତଃ ଓଡ଼ିଶାରେ ଦେଖାଯାଉ ନାହାନ୍ତି। ତେବେ କିଭଳି ଭାବେ ପକ୍ଷୀଟି ଉକ୍ତ ଜଙ୍ଗଲକୁ ଆସିଥିଲା ତାହା ସଠିକ୍ ଭାବେ ଜଣାପଡ଼ିନଥିଲେ ମଧ୍ୟ ଆଉ ଅଛନ୍ତିକି ନାହିଁ ସେ ନେଇ ତଦାରଖ ଆରମ୍ଭ ହୋଇଥିବା ଫିରିଙ୍ଗିଆ ବନାଞ୍ଚଳ ଅଧିକାରୀ ଶ୍ରୀ ପାତ୍ର ସୂଚନା ଦେଇଛନ୍ତି।
