ସଂଘବଦ୍ଧ ଆକ୍ରମଣରେ ମୃତ୍ୟୁ ଘଟଣା, ଭାଇରାଲ ହେଲା ନବଘନର ମୃତ୍ୟୁ ପୂର୍ବର ବୟାନ

ବାସୁଦେବପୁର : ନାୟକାଣିଡିହି ଥାନା କରଞ୍ଜଆଡିଆ ଗାଁରେ ସଂଘବଦ୍ଧ ଆକ୍ରମଣରେ ନବଘନ ମଲିକଙ୍କ ମୃତ୍ୟୁକୁ ନେଇ ଗତ ମଙ୍ଗଳବାର ସନ୍ଧ୍ୟାରେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା। ପୁଲିସର ଅବହେଳା ଦର୍ଶାଇ ହଜାର ହଜାର ଲୋକେ ଥାନା ପରିସରକୁ ଧସେଇ ପଶିଥିଲେ । ଥାନା ବାରଣ୍ଡାରେ ମୃତଦେହ ରଖି ସାରା ରାତି ପରିବାର ଲୋକ ଓ ସମ୍ପର୍କୀୟ ଧାରଣାରେ ବସିଥିଲେ । ଦୋଷୀକୁ କଠୋରରୁ କଠୋର ଦଣ୍ଡ ଦେବାକୁ ସମସ୍ତେ ଦାବି କରିଥିଲେ । ଏବେ ଗଣମାଧ୍ୟମରେ ନବଘନର ମୃତ୍ୟୁକାଳୀନ ବୟାନ ଭାଇରାଲ ହେଉଛି । ଏହି ଭିଡିଓରେ ସେ ଆକ୍ରମଣକାରୀଙ୍କ ନାଁ କହୁଥିବାବେଳେ ଏହାକୁ ରେକଡ଼ିଂ କରି ରଖିବାକୁ କହୁଥିବା ସହିତ ପ୍ରତିଶୋଧ ନେବାପାଇଁ କହୁଛନ୍ତି । ଭିଡିଓଟି ଏବେ ସାମ୍ନାକୁ ଆସିବା ପରେ ପରିସ୍ଥିତି ଅଧିକ ଭୟଙ୍କର ମୋଡ ନେବାକୁ ବସିଛି । ଅନ୍ୟପଟେ ପୁଲିସ ଘଟଣାର ତଦନ୍ତ ଚଳାଉଥିବା ସୂଚନା ଦେଇଛି ।