ସମାଜ ଡିଜିଟାଲ ଡେସ୍କ: ପାକିସ୍ତାନରେ ଦୀର୍ଘ ଦିନ ଧରି ଆନ୍ଦୋଳନ ଚଳାଇ ଆସୁଥିବା ବାଲୋଚ ଲିବରେସନ ଆର୍ମି(ବିଏଲଏ)କୁ ଆମେରିକା ଆତଙ୍କବାଦୀ ସଂଗଠନ ଭାବେ ଘୋଷଣା କରିଛି। ବିଏଲଏ ସହିତ ମଜିଦ ବ୍ରିଗେଡ ନାମକ ଅନ୍ୟ ଏକ ସଂଗଠନକୁ ବି ଆମେରିକା ବିଦେଶୀ ଆତଙ୍କୀ ସଂଗଠନ ରୂପେ ଘୋଷଣା କରିଛି। ପାକିସ୍ତାନୀ ସେନା ମୁଖ୍ୟ ଅସିମ ମୁନିର ଆମେରିକା ଗସ୍ତରେ ଯାଇଥିବାବେଳେ ତା’କୁ ଖୁସି କରିବାକୁ ଯାଇ ଆମେରିକା ଏଭଳି ପଦକ୍ଷେପ ନେଇଥିବା କୁହାଯାଉଛି।
ଆମେରିକାର ପରରାଷ୍ଟ୍ର ବିଭାଗ ଦ୍ଵାରା ଜାରି ନିର୍ଦେଶନାମାରେ କୁହାଯାଇଛି ଯେ, ୨୦୧୯ରୁ ବର୍ତ୍ତମାନ ସୁଦ୍ଧା ପାକିସ୍ତାନରେ ସଂଘଠିତ ଅନେକ ଭୟଙ୍କର ଆକ୍ରମଣ ପାଇଁ ବିଏଲଏ ଏବଂ ମଜିଦ ବ୍ରିଗେହ ନିଜକୁ ଦାୟୀ କରିଆସୁଛନ୍ତି। ୨୦୨୪ରେ କରାଚୀ ବିମାନ ବନ୍ଦର ନିକଟରେ ଆତ୍ମଘାତୀ ବିସ୍ଫୋରଣଠାରୁ ଆରମ୍ଭ କରି ଗ୍ବାଦର ବନ୍ଦରରେ ଆକ୍ରମଣ ଏବଂ ଜାଫର ଏକ୍ସପ୍ରେସକୁ ହାଇଜ୍ୟାକ କରି ୩୧ ନାଗରିକ ଏବଂ ସୈନ୍ୟଙ୍କୁ ହତ୍ୟାରେ ଏହି ଦୁଇ ସଂଗଠନ ସମ୍ପୃକ୍ତ ରହିଛନ୍ତି। ତେଣୁ ଇମିଗ୍ରେସନ ଆଣ୍ଡ ନେସନାଲିଟି ଆକ୍ଟ ଆଣ୍ଡ ଏଗଜିକ୍ୟୁଟିଭ ଅର୍ଡର ୧୩୨୨୪ର ସେକ୍ସନ ୨୧୯ ଅନୁସାରେ ବିଭାଗ ଏହି ନିଷ୍ପତ୍ତି ନେଇଥିବା କୁହାଯାଇଛି।
