ନୂଆଦିଲ୍ଲୀ: ଉନ୍ନାଓ ଦୁଷ୍କର୍ମ ପୀଡ଼ିତାଙ୍କ ପରିବାର ଚାହିଁଲେ ପୀଡ଼ିତାଙ୍କୁ ଲକ୍ଷ୍ନୌରୁ ଦିଲ୍ଲୀ ଏମ୍ସକୁ ଅଧିକ ଚିକିତ୍ସା ପାଇଁ ଆଣିପାରିବେ। ପରିବବର୍ଗଙ୍କ ଉପରେ ନିଷ୍ପତ୍ତି ଛାଡିଛନ୍ତି ସୁପ୍ରିମକୋର୍ଟ। ଶୁକ୍ରବାର ଏହି ମାମଲାର ସୁପ୍ରିମକୋର୍ଟରେ ଶୁଣାଣି ହୋଇଥିଲା ଯେତେବେଳେ ଆଇନଜୀବୀ ବି. ଗିରି କହିଥିଲେ ଯେ ବର୍ତ୍ତମାନ ପୀଡିତା ବେହୋସ ଅଛନ୍ତି ଏବଂ ବିଶେଷ ଶ୍ୱାସକ୍ରିୟା ପ୍ରକ୍ରିୟା ମାଧ୍ୟମରେ ତାଙ୍କର ଚିକିତ୍ସା କରାଯାଉଛି ଯାହା ଫଳରେ ପୀଡ଼ିତାଙ୍କୁ ଦିଲ୍ଲୀ ଆଣିବା ସମ୍ଭବ ନୁହେଁ। ପୀଡ଼ିତାଙ୍କ ସମ୍ପର୍କୀୟ ମଧ୍ୟ ଲକ୍ଷ୍ନୌରେ ଚିକିତ୍ସା କରିବା ସପକ୍ଷରେ ମତ ରଖିଛନ୍ତି ବୋଲି ସେ କହିଛନ୍ତି।
ନ୍ୟାୟାଳୟଙ୍କୁ ଏକଥା ମଧ୍ୟ ଅବଗତ କରାଯାଇଛି, ପୀଡ଼ିତାଙ୍କ ସହ ଥିବା ତାଙ୍କ ଓକିଲଙ୍କୁ ଯଦିଓ ଭେଣ୍ଟିଲେଟରରେ ରଖାଯାଇଛି କିନ୍ତୁ ତାଙ୍କ ଅବସ୍ଥା ସଙ୍କଟାପନ୍ନ ରହିଛି। ତେବେ ପୀଡିତା ଏବଂ ତାଙ୍କ ଓକିଲ ଯେକୌଣସି ସମୟରେ ଚାହିଁଲେ ଦିଲ୍ଲୀ ଏମ୍ସକୁ ଆସିପାରିବେ। ସର୍ବୋଚ୍ଚ ଅଦାଲତ ପୀଡ଼ିତାଙ୍କ ଦାଦାଙ୍କୁ ରାୟବରେଲୀ ଜେଲରୁ ତିହାର ଜେଲକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି। ଗଣମାଧ୍ୟମକୁ ନିର୍ଦ୍ଦେଶ ଜାରି କରି ଉନାଓ ଦୁଷ୍କର୍ମ ପୀଡ଼ିତାଙ୍କ ପରିଚୟ ପ୍ରଚାର ପ୍ରସାର ନ କରିବାକୁ କହିଛନ୍ତି। ଏହି ମାମଲାର ପରବର୍ତ୍ତ ଶୁଣାଣି ସୋମବାର ଦିନ କରାଯିବ ।
