ରାୟଗଡା : ରାୟଗଡା ଜିଲାର କାଶୀପୁରରେ ଅଜଣା ରୋଗରେ ଗଲା ଆଉ ଜଣଙ୍କ ଜୀବନ । ମଙ୍ଗଳବାର ରାତିରେ ଆଉ ଜଣେ ୧୩ ବର୍ଷୀୟ ଝିଅର ମୃତ୍ୟୁ ହୋଇଥିବା ଖବର ମିଳିଛି । ବର୍ତ୍ତମାନ ମୃତ୍ୟୁ ସଂଖ୍ୟା ୪ରେ ପହଁଞ୍ଚିଛି। ୫ଜଣ ମେଡିକାଲରେ ଚିକିତ୍ସାଧିନ ଥିବାବେଳେ ଦୁଇ ଜଣ ଆକ୍ରାନ୍ତ ଗାଁ ରେ ଥିବା ଜଣାପଡିଛି । ରାୟଗଡା ମେଡିକାଲରେ ଚିକିତ୍ସାଧିନ ଦୁଇ ଶିଶୁଙ୍କୁ ବୁଧବାର ବ୍ରହ୍ମପୁର ଏମକେସିଜିକୁ ସ୍ଥାନାନ୍ତର କରାଯାଇଛି । ଆଜି ଭୁବନେଶ୍ବରରୁ ଆସିଥିବା ଏକ ସ୍ବତନ୍ତ୍ର ଟିମ, କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜର ଏକ ଟିମ ଓ ରାୟଗଡା ଜିଲାରୁ ଏକ ଡାକ୍ତରୀ ଟିମ ମୁନୁଷପଦର ଗାଁ ରେ ପହଞ୍ଚି ସ୍ଥିତି ଅନୁଧ୍ୟାନ କରୁଥିବା ସୂଚନା ରହିଛି । ମିଳିଥିବା ସୂଚନା ଅନୁଯାୟୀ ରାୟଗଡା ଜିଲା କାଶୀପୁରୁ ବ୍ଲକ ଡ଼ଙ୍ଗାସିଲ ପଞ୍ଚୟତର ମୁନୁଷପଦର ଗାଁରେ ଗତ ଏକ ସପ୍ତାହ ହେଲା ଅଜଣା ରୋଗର ଆତଙ୍କ ଦେଖାଦେଇଛି । ଅଜଣା ରୋଗରେ ଆଉ ଜଣଙ୍କର ମୃତ୍ୟୁ ଘଟିଛି। ପୂର୍ବରୁ ୩ ଜଣଙ୍କ ମୃତ୍ୟୁ ହୋଇଥିଲା। ମୃତକ ଜଣକ ୧୩ ବର୍ଷୀୟ ଝିଅ କାଳୀ ମାଝି ବୋଲି ଜଣାପଡିଛି। ଏବେ ବି ଗାଁରେ ଆହୁରି ଦୁଇ ଶିଶୁ ଏଥିରେ ଆକ୍ରାନ୍ତ ହୋଇ ଗାଁରେ ଅଛନ୍ତି । ତେବେ ମନୁଷପଦର ଗାଁରେ ଏଭଳି ରୋଗକୁ ନେଇ ଗ୍ରାମବାସୀଙ୍କ ମଧ୍ୟରେ ଆତଙ୍କ ଖେଳି ଯାଇଛି ।
Comments are closed.