ପାଟଣା : ଜାତୀୟ ରାଜପଥ ୨୦ର ଢେଙ୍କିକୋଟ ନିକଟସ୍ଥ ଖଣ୍ଟଘର ଟୋଲ ପ୍ଲାଜା ମେଡିଆନ୍ ଡିଭାଇଡର ଉପରେ ଏକ ୧୬ ଚକିଆ ଟ୍ରକ ଚଢି ଯିବାରୁ ଉକ୍ତ ଲେନରେ ଗାଡି ଚଳାଚଳ ବନ୍ଦ ରହିଛି । ଗତକାଲି ରାତି ପ୍ରାୟ ୧୨ଟା ସମୟରେ ବେପରୁଆ ଗାଡି ଚାଳନା କରି ଟ୍ରକଟି ଟୋଲ ପ୍ଲାଜା ମେଡିଆନ ଡିଭାଇଡର ଉପରେ ଚଢି ଯାଇଥିଲା । ଫଳରେ ଉକ୍ତ ଲେନରେ ଗତକାଲି ରାତିରୁ ଗାଡି ଚଳାଚଳ ବନ୍ଦ ରହିଛି । ଦ୍ରୁତ ଗତିରେ ଟ୍ରକ କେନ୍ଦୁଝର ପଟୁ ଘଟଗାଁ ଆଡକୁ ଯିବା ବେଳେ ଟ୍ରକଟି ଦୁର୍ଘଟଣା ଗ୍ରସ୍ତ ହୋଇଛି । ଖବର ପାଇ ଢେଙ୍କିକୋଟ ପୁଲିସ ଦୁର୍ଘଟଣାଗ୍ରସ୍ତ ଟ୍ରକକୁ ଜବତ କରିଛି ।
ପୁଲିସ ପକ୍ଷରୁ ଜାତୀୟ ରାଜପଥ ୨୦ ରେ ନିୟମିତ ଯାଞ୍ଚ ହେଉନଥିବାରୁ ଭାରୀଯାନ ଗୁଡିକ ଦ୍ରୁତ ଗତିରେ ଗାଡି ଚାଳନା କରୁଥିବାବେଳେ ଅନେକ ସମୟରେ ଦୁର୍ଘଟଣା ହୋଇ ଧନଜୀବନ ହାନୀ ଘଟୁଛି । ବିଶେଷ କରି ମଦ୍ୟପାନ କରି ଗାଡି ଚାଳନା ଏବଂ କମ ବୟସର ଯୁବକ ବିନା ତାଲିମରେ ଭାରୀ ଯାନ ଚଲାଉଥିବାରୁ ଦୁର୍ଘଟଣା ଘଟୁଛି । ସେହିପରି ଏହି ଟୋଲ ପ୍ଲାଜାରେ ୱେ ବ୍ରିଜ ଏବଂ ସେନସର ଥିଲେ ମଧ୍ୟ କାମ କରୁନାହିଁ । ଫଳରେ ଏହି ଟୋଲଗେଟ ଦେଇ ଯାଉଥିବା ଭାରୀଯାନ ବେଧଡକ ଓଭର ଲୋଡ କରି ପରିବହନ କରୁଥିଲେ ମଧ୍ୟ ଧରା ପଡୁନାହାଁନ୍ତି । ଓଭରଲୋଡ ଧରା ପଡୁନଥିବାରୁ ଏନ୍ଏଚ୍ଏଆଇର ବ୍ୟାପକ ରାଜସ୍ୱହାନୀ ହେବା ସହିତ ରାସ୍ତା ମଧ୍ୟ ଖରାପ ହେଉଛି ।
Comments are closed.