ସମାଜ ପୋର୍ଟାଲ ଡେସ୍କ: କରୋନା ଜନିତ ଲକ ଡାଉନ ଯୋଗୁ ରାଜ୍ୟରେ ପରିବହନ ଶ୍ରମିକମାନଙ୍କ ସମସ୍ୟା ଦିନକୁ ଦିନ ବଢ଼ିବାରେ ଲାଗିଛି। ଏ ନେଇ ଅଲ୍ ଓଡିଶା ଟ୍ରାନ୍ସପୋର୍ଟ ୱାର୍କର୍ସ ଫେଡେରେସନ ପକ୍ଷରୁ ରାଜ୍ୟର ସମସ୍ତ ମୋଟର ଚାଳକ, ହେଲପର ଓ କଣ୍ଡକ୍ଟରମାନେ ଆସନ୍ତା କାଲି ଅର୍ଥାତ ଜୁନ୍ ୧ ତାରିଖ ଦିନ ସମସ୍ତ ଜିଲ୍ଲାର ଜିଲ୍ଲାପାଳ ଓ ପ୍ରରିବହନ କମିଶନରଙ୍କୁ ଦାବୀପତ୍ର ପ୍ରଦାନ କରିବେ ଓ ପ୍ରତିବାଦ ଜଣାଇବେ।
ଫେଡେରେସନ ପକ୍ଷରୁ ଜାରି ଏକ ପ୍ରେସ ବିଜ୍ଞପ୍ତିରେ କୁହାଯାଇଛି ଯେ କରୋନା ଜନିତ ଲକ୍ଡାଉନ୍ ଘୋଷଣା ପରେ ରାଜ୍ୟର ବସ୍, ଟ୍ରକ୍, ଡମ୍ଫର, ଟ୍ୟାଙ୍କର, ଟ୍ୟାକ୍ସି ଓ ଅଟୋରିକ୍ସା ଚାଳକମାନଙ୍କ ଅବସ୍ଥା ଦୟନୀୟ ହୋଇଛି। ରୋଜଗାର ଅଭାବରୁ ପରିବହନ ଶ୍ରମିକମାନଙ୍କ ପରିବାର ପୋଷଣ ମଧ୍ୟ ସମ୍ଭବ ହୋଇନାହିଁ। ତେଣୁ ପ୍ରତ୍ୟେକ ପରିବହନ ଶ୍ରମିକଙ୍କୁ କ୍ଷତିପୂରଣ ବାବଦରେ ମାସକୁ ୭୫୦୦ ଟଙ୍କା, ପ୍ରତ୍ୟେକ ପରିବାରକୁ ମୁଣ୍ଡ ପିଛା ମାସକୁ ୧୦ କିଲୋ ଚାଉଳ, ୫୦ ଲକ୍ଷ ଟଙ୍କାର ଜୀବନ ବୀମା ଓ କରୋନା ଯୋଗୁଁ ମୃତ୍ୟୁ ଘଟିଲେ ମୃତ ଶ୍ରମିକ ପରିବାରକୁ ଦୁଇକୋଟି ଟଙ୍କା କ୍ଷତିପୂରଣ ଦେବାକୁ ଫେଡେରେସନ ପକ୍ଷରୁ ଦାବୀ କରାଯାଇଛି।
ରାଜ୍ୟରେ ପରିବହନ ବ୍ୟବସ୍ଥାକୁ ସୁଚାରୁରୂପେ ଚଳାଇବାକୁ ହେଲେ ପରିବହନ ଶ୍ରମିକମାନଙ୍କ ନଗଦ ସମସ୍ୟା ଦୂର କରିବାକୁ ସରକାର ପଦକ୍ଷେପ ନେବାକୁ ଫେଡେରେସନର ସଭାପତି ଜନାର୍ଦ୍ଦନ ପତି ରାଜ୍ୟ ସରକାରଙ୍କୁ ନିବେଦନ ଜଣାଇଛନ୍ତି।
