ନୂଆଦିଲ୍ଲୀ : କରୋନା ମୁକାବିଲା ପାଇଁ ମାର୍ଚ୍ଚ ୨୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୧ ଦିନ ପାଇଁ ଦେଶର ତାଲା ପକାଇବାକୁ ଘୋଷଣା କରିଥିଲେ। ଏହାପରେ ଅତ୍ୟାବଶ୍ୟକ ସାମଗ୍ରୀକୁ ଛାଡ଼ି ସମସ୍ତ ଦୋକାନ ବଜାର ବନ୍ଦ ରହିଛି। ଏହାକୁ ଲକ୍ଷ କରି ଟେଲିକମ୍ ରେଗୁଲେଟୋରୀ ଅଥରିଟି ଅଫ୍ ଇଣ୍ଡିଆ ଅର୍ଥାତ୍ (ଟ୍ରାଇ) ଟେଲିକମ କମ୍ପାନୀମାନଙ୍କୁ ଏକ ଚିଠି ଲେଖିଛନ୍ତି। ଏହି ଚିଠିରେ ସମସ୍ତ ଟେଲିକମ କମ୍ପାନୀମାନେ ନିଜ ପ୍ଲାନର ବୈଧତା ବୃଦ୍ଧି କରିବାକୁ ଟ୍ରାଇ କହିଥିବା ଜଣାପଡ଼ିଛି। ଟ୍ରାଇ କହିଛି ଯେ, ପ୍ରିପେଡ୍ ଯୋଜନାର ବୈଧତା ବୃଦ୍ଧି ହେତୁ ଗ୍ରାହକମାନେ ଲକଡାଉନ୍ ସମୟରେ କୌଣସି ସମସ୍ୟାର ସମ୍ମୁଖୀନ ହେବେ ନାହିଁ । ଗ୍ରାହକମାନେ ଏହି କଠିନ ପରିସ୍ଥିତିରେ ପରସ୍ପର ସହିତ ଯୋଗାଯୋଗ କରିବାରେ ସକ୍ଷମ ହେବେ ।
ରିପୋର୍ଟ ଅନୁଯାୟୀ, ଦେଶର ପ୍ରମୁଖ ଟେଲିକମ୍ କମ୍ପାନୀମାନଙ୍କୁ ଟ୍ରାଇ ଚିଠି ଲେଖିଛି । ଏହି ଚିଠିରେ କମ୍ପାନୀମାନଙ୍କୁ କୁହାଯାଇଛି ଯେ, ସମସ୍ତ ଉପଭୋକ୍ତାଙ୍କର ପ୍ରିପେଡ୍ ଯୋଜନାଗୁଡିକର ବୈଧତା ବୃଦ୍ଧି କରାଯିବା ଉଚିତ। ଯାହାଦ୍ବାରା ସେମାନେ କୌଣସି ପ୍ରକାରର ଅସୁବିଧାର ସମ୍ମୁଖୀନ ହେବେ ନାହିଁ। ଏହା ବ୍ୟତୀତ ଲକଡାଉନ୍ ସମୟରେ ଗ୍ରାହକଙ୍କୁ ବିନା ବାଧାରେ ସେବା ଯୋଗାଇବା ପାଇଁ ଟେଲିକମ କମ୍ପାନୀମାନଙ୍କ ପକ୍ଷରୁ କେଉଁ ପଦକ୍ଷେପ ନିଆଯାଉଛି ସେନେଇ ଟ୍ରାଇ କମ୍ପାନୀମାନଙ୍କୁ ସୂଚନା ମାଗିଛି।
ବର୍ତ୍ତମାନ ସୁଦ୍ଧା ଟେଲିକମ୍ କମ୍ପାନୀଗୁଡିକ ଟ୍ରାଇ ପଠାଇଥିବା ଚିଠିର ପ୍ରତିକ୍ରିୟା ଦେଇନାହାଁନ୍ତି। ଏଥିସହ, ପ୍ରିପେଡ୍ ଯୋଜନାଗୁଡିକର ବୈଧତା ବୃଦ୍ଧି କରିବାକୁ କମ୍ପାନୀଗୁଡିକ ଘୋଷଣା କରି ନାହାଁନ୍ତି । କମ୍ପାନୀଗୁଡିକ ଖୁବ ଶୀଘ୍ର ପ୍ରିପେଡ୍ ଯୋଜନାଗୁଡିକର ବୈଧତା ବୃଦ୍ଧି କରିବାକୁ ଘୋଷଣା କରିବେ ବୋଲି ଆଶା କରାଯାଉଛି । ଯଦି ଟେଲିକମ୍ କମ୍ପାନୀଗୁଡିକ ଏହି ପରିସ୍ଥିତିରେ ପ୍ରିପେଡ୍ ଯୋଜନାଗୁଡିକର ବୈଧତା ବୃଦ୍ଧି କରନ୍ତି, ତେବେ ଗ୍ରାହକମାନେ ଲାଭବାନ ହେବେ ।
