ନୂଆଦିଲ୍ଲୀ : ଯଦି ଆପଣ ଜାତୀୟ ରାଜପଥରେ କାର୍ ବା ବସରେ ଯାତ୍ରା କରୁଛନ୍ତି ତେବେ ଏହି ଖବର ପଢି ଆପଣ ଖୁସି ହୋଇଯିବେ । ଗାଡିର ଟୋଲ ପାଇଁ ଫାଷ୍ଟ୍ୟାଗ୍ ସୁବିଧା ଲାଗୁ ହେବା ପରେ ମଧ୍ୟ ଟୋଲ୍ ପ୍ଲାଜା ଅତିକ୍ରମ କରିବା ପାଇଁ ଅନେକ ସମୟ ଲାଗିଯାଏ । କିନ୍ତୁ ଏବେ ମୋଦୀ ସରକାରଙ୍କ ତୃତୀୟ କାର୍ଯ୍ୟକାଳରେ ଏହି ସମସ୍ୟାରୁ ମୁକ୍ତି ମିଳିବ । ଏନଏଚଏଆଇ ତରଫରୁ ଏମିତି ସୁବିଧା ଉପରେ କାମ କରାଯାଉଛି ଯେଉଁଥିରେ ଆପଣଙ୍କୁ ଟୋଲ୍ ପ୍ଲାଜାରେ ଅଧିକ ସମୟ ଲାଗିବନି ଏବଂ ସହଜରେ ଟୋଲ ପୈଠ ହୋଇଯିବ । ଏହି ସୁବିଧା ଲାଗୁ ହେବା ଫଳରେ ଆପଣଙ୍କୁ ଟୋଲରେ କୌଣସି ପ୍ରକାର ବାଧା ଲାଗିବନି ଏବଂ ଆପଣଙ୍କ ଗାଡି ବିନା ଦ୍ବିଧାରେ ଯାତ୍ରା କରିବ । ଏହାକୁ ନଜରରେ ରଖି ଏନଏଚଏଆଇ ବିଶ୍ବର ଅନେକ ଦେଶରୁ ନୂଆ କୌଶଳ ମଗାଉଛି ।
ବୈଦୁତିକ କର ଆଦାୟ କରିବା ଏହାର ଉଦ୍ଦେଶ୍ୟ । ଏହା ଗ୍ଲୋବାଲ ନେଭିଗେସନ ସାଟେଲାଇଟ୍ ସିଷ୍ଟମ(ଜିଏନଏସ୍ଏସ୍) ଉପରେ ଆଧାରିତ ହେବ । ଏହା ଫଳରେ ଗାଡିରୁ କର ଆଦାୟ କାମ ସରଳ ହୋଇଯିବ । ପ୍ରାରମ୍ଭରେ ଉଭୟ ସୁବିଧା ଏକାଠି କାମ କରିବେ । ଅର୍ଥାତ୍ ଗାଡିରେ ଏବେ ଯେଉଁ ଫାଷ୍ଟ୍ୟାଗ୍ ଲାଗିଛି ତା ମଧ୍ୟ କାମ କରିବ ଏବଂ ନୂଆ ଜିଏନଏସଏସ୍ ବିଶିଷ୍ଟ ସୁବିଧା ମଧ୍ୟ ବ୍ୟବହାର ହେବ । ଯେଉଁ ଗାଡିରେ ଜିଏନଏସଏସ୍ ଆଧାରିତ ସୁବିଧା ସକ୍ରିୟ ହେବ ସେହି ଗାଡିପାଇଁ ଟୋଲ ପ୍ଲାଜାରେ ଅଲଗା ଲେନ୍ ହେବ । ଏହି ଲେନରେ କାର୍ ଯାତ୍ରା କରିବା ସମୟରେ ଅଟକିବା ଦରକାର ପଡିବନି । ଧିରେ ଧିରେ ପୁରୁଣା ଲେନ୍ ସମାପ୍ତ କରି ସବୁଆଡେ ଜିଏନଏସଏସ୍ ଲେନ୍ ପ୍ରସ୍ତୁତ ହେବ ।
Comments are closed.