ଭୁବନେଶ୍ୱର : ଗ୍ୟାଙ୍ଗଷ୍ଟର ଟିଟୋ ଓରଫ୍ ସୟଦ ଉସ୍ମାନ୍ ଅଲ୍ଲୀକୁ ତୃତୀୟ ଥର ଲାଗି ଜିମାରେ ଆଣିବା ପରେ କେତେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଏସ୍ଟିଏଫ ଜେରା କରିଛି। ତା’ ପରିବାର ୧୦ ସଦସ୍ୟଙ୍କୁ ପଚରାଉଚରା ଲାଗି ଏକ ତାଲିକା ପ୍ରସ୍ତୁତ କରିଛି। ସେହିପରି ତଦନ୍ତରେ ଯେପରି କିଛି ତ୍ରୁଟି ନ ରୁହେ ଅନୁଧ୍ୟାନ ଲାଗି କ୍ରାଇମ୍ବ୍ରାଞ୍ଚ ଆଇଜି ଅରୁଣ ବୋଥ୍ରାଙ୍କୁ ଦାୟିତ୍ୱ ଦିଆଯାଇଛି। ଶୁକ୍ରବାର ଆଇଜି ବୋଥ୍ରା ଏହି ମାମଲାର ଅନୁଧ୍ୟାନ ଆରମ୍ଭ ସହିତ ଏସ୍ଟିଏଫ୍ର ଦୁଇ ଏସ୍ପିଙ୍କ ସହିତ ପରାମର୍ଶ କରିଛନ୍ତି। ବୋଥ୍ରାଙ୍କ ନିର୍ଦେଶରେ ଟିଟୋର ପତ୍ନୀ ବେନଜିରଙ୍କୁ ଏକ ଟିମ୍ ୨ ଘଣ୍ଟା ଜେରା କରିଥିଲା। ଜେରା ଏଡାଇବାକୁ ବେନଜିର ଅନେକ ବାହାନା କରିଥିଲେ। ତେବେ ଟିଟୋ ସମେତ ପରିବାରର ଜେରା ହେବାକୁ ଥିବା ୧୦ ଜଣ ମଧ୍ୟରେ ୩ ଭଉଣୀ ଓ ୭ ଭାଇଙ୍କ ନାମ ରହିଛି। ଟିଟୋର ୨ ଭଉଣୀ ଏବେ ଶିକ୍ଷୟିତ୍ରୀ ଅଛନ୍ତି। ସେମାନଙ୍କୁ ଜେରା କରିବାକୁ ଏସଟିଏଫ ନୋଟିସ ଜାରି କରିଛି।
ଟିଟୋର ଦୁଇ ଭାଇ ମାର୍ବଲ ଏବଂ ଟାଇଲ୍ ବ୍ୟବସାୟୀ ସପୁ ଓରଫ ସୟଦ ଇମ୍ରାନ୍ ଅଲ୍ଲୀ ଓ ସିମ୍ରନ୍ ଗାର୍ମେଣ୍ଟ ଦୋକାନ କରିଥିବା ଜି.ବାବୁଙ୍କ ବିରୋଧରେ ଏକାଧିକ ମାମଲା ରହିଛି। ସେମାନେ ମଧ୍ୟ ଗ୍ୟାଙ୍ଗଷ୍ଟର ବୋଲି ଏସ୍ଟିଏଫ କହିଛି । ଟୁଟୁ ଓରଫ୍ ସୟଦ ଫୁରକନ ଅଲ୍ଲୀ ଦିଲାରପୁରସ୍ଥିତ ସର୍ଭିସ ସେଣ୍ଟରର ବ୍ୟବସାୟ ବୁଝୁଥିଲା। ସେହିପରି ପାରାଦୀପ-ହରିଦାସପୁର ରେଳଲାଇନ୍ କାମର ଦାୟିତ୍ୱ ନେଇଥିବା ବାପୁ ଓରଫ୍ ସୟଦ ଦିଲ୍ସାନ୍ ଅଲ୍ଲୀ ବୁଝୁଥିଲା।
ଟୁନା ଓରଫ୍ ସୟଦ ଅଫ୍ସର ଅଲ୍ଲୀ ଆଳୁ ବେପାର କରୁଥିବା ବେଳେ ଜଣେ ଭାଇ ଚିତୋ ଓରଫ୍ ସୟଦ ଇଫ୍ତିକର ଅଲ୍ଲୀ ବେକାର ଥିବା ଏସ୍ଟିଏଫ୍ ଜାଣିବାକୁ ପାଇଛି। ସମସ୍ତଙ୍କୁ ନୋଟିସ୍ ଜାରି ହୋଇଛି। ହେଲେ ଟିଟୋ ଗିରଫ ହେବା ପରେ ଏବେ ତା’ର ଭାଇମାନେ ଫେରାର୍ ହୋଇଯାଇଛନ୍ତି। ପୂର୍ବରୁ ଶ୍ରୀ ବୋଥ୍ରା କେନ୍ଦ୍ରାପଡାର ଏସ୍ପି ଥିଲେ। ତେଣୁ କେନ୍ଦ୍ରାପଡାର ଭୌଗୋଳିକ ସ୍ଥିତି ସମ୍ପର୍କରେ ତାଙ୍କର ବେଶ ଅଭିଜ୍ଞତା ରହିଛି। ତେଣୁ ଟିଟୋ ମାମଲାରେ ଆହୁରି ଅଧିକ ତଥ୍ୟ ପଦାକୁ ଆସିବାର ସମ୍ଭାବନା ନେଇ ଚର୍ଚ୍ଚା ଆରମ୍ଭ ହୋଇଛି।
ଜେରା ହେବେ ଟିଟୋ ପରିବାରର ୧୦ ସଦସ୍ୟ
Popular Categories
Previous article
Next article