ସିମୁଳିଆ : ଚୋରି ସାମଗ୍ରୀ ସହ ୩ ଜଣ ଅଭିଯୁକ୍ତଙ୍କୁ ଗିରଫ କରି ସିମୁଳିଆ ପୁଲିସ କୋର୍ଟ ଚାଲାଣ କରିଛି । ସୂଚନାରୁ ପ୍ରକାଶ ବାଲେଶ୍ବର ଜିଲ୍ଲା ସିମୁଳିଆ ଥାନା ଅନ୍ତର୍ଗତ ଖଇରା ବ୍ଲକର ଗରସଙ୍ଗ ଡାକ୍ତରଖାନାରେ ଗତ ୨୧ ତାରିଖରେ ହୋଇଥିବା ଚୋରି ଘଟଣାରେ ସିମୁଳିଆ ପୁଲିସ ୩ ଜଣକୁ ଗିରଫ କରିଥିଲା । ସେମାନଙ୍କଠାରୁ ଏଲଇଡି ଟିଭି, କମ୍ପ୍ୟୁଟର ମନିଟର, ସିପିୟୁ ଏବଂ ନଗଦ ୯ ଶହ ଟଙ୍କା ଜବତ କରିବା ସହ ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ।
ତେବେ ଉକ୍ତ ମେଡ଼ିକାଲରେ ପୁଣି ଆଉଥରେ ଚଳିତ ମାସ ୨ତାରିଖରେ ଚୋରି ହୋଇଥିବା ନେଇ ସିମୁଳିଆ ଥାନାରେ ଅଭିଯୋଗ ପରେ ସିମୁଳିଆ ଥାନା ଅଧିକାରୀଣୀ ସ୍ଵର୍ଣ୍ଣଲତା ମିଞ୍ଜଙ୍କ ନେତୃତ୍ବରେ ସିମୁଳିଆ ପୁଲିସ ତଦନ୍ତ କରି ପୁଣି ଆଉ ୩ଜଣ ଜାମ୍ମୁଝାଡ଼ି ଅଞ୍ଚଳର ବିଷ୍ଣୁ ପ୍ରଧାନଙ୍କ ପୁଅ ନିରାକାର, ତପନ ଦାସଙ୍କ ପୁଅ ଶିବୁ ଏବଂ ବାଡୁଳି ଗ୍ରାମର ଗୌରହରି ବେହେରାଙ୍କ ପୁଅ କାହ୍ନୁ ଚରଣଙ୍କୁ ଗିରଫ କରିବା ସହ ସେମାନଙ୍କ ଠାରୁ ଗୋଟିଏ ଏସି ଏବଂ ଗୋଟିଏ ପାଣି ମଟର ଜବତ କରିବା ସହ ସେମାନଙ୍କ ନାଁରେ ଏକ ୨୨୬/୨୪ ମାମଲା ରୁଜୁ କରି ଆଜି କୋର୍ଟ ଚାଲାଣ କରିଥିବା ସୂଚନା ମିଳିଛି ।
ଏ ସଂକ୍ରାନ୍ତରେ ବାଲେଶ୍ବର ସଦର ଏସ.ଡି.ପି.ଓ ଶଶାଙ୍କ ଶେଖର ବେଉରା ପ୍ରେସମିଟ ମାଧ୍ୟମରେ ଗଣମାଧ୍ୟମକୁ ସୂଚନା ଦେଇଥିଲେ । ବାରମ୍ବାର ଗରସଙ୍ଗ ଓ ଆଖପାଖ ଅଞ୍ଚଳରେ ଚୋରି ହେଉଥିବାବେଳେ ଲୋକେ ଭୟରେ ଆତଙ୍କିତ ଥିବାବେଳେ ସିମୁଳିଆ ପୁଲିସର ତୁରନ୍ତ ପଦକ୍ଷେପ ସାଧାରଣ ଲୋକମାନଙ୍କୁ ଆଶ୍ୱସ୍ତ କରିଛି ।
