ନୂଆଦିଲ୍ଲୀ: ଭାରତରେ ଜନ୍ମିତ ବୁକର ପୁରସ୍କାର ବିଜେତା ବ୍ରିଟିଶ ଲେଖକ ସଲମାନ ରୁସ୍ଦିଙ୍କ ବିବାଦୀୟ ଉପନ୍ୟାସ ‘ସାଟାନିକ୍ ଭର୍ସେସ୍’ର ଆମଦାନୀ ଉପରେ ଲାଗୁ କରାଯାଇଥିବା କଟକଣା ଉଠିଯାଇଛି। ସୂଚନାଯୋଗ୍ୟ ଏହି ଉପନ୍ୟାସରେ ଇସଲାମ ଧର୍ମର ପ୍ରତିଷ୍ଠାତା ପ୍ରଫେଟ୍ ମହମ୍ମଦଙ୍କ ସମ୍ପର୍କରେ ଆପତ୍ତିଜନକ ମନ୍ତବ୍ୟ ଦିଆଯାଇଥିବାରୁ ମୁସଲିମ ସଂଗଠନଗୁଡିକ ବିଶ୍ବବ୍ୟାପୀ ଏହାକୁ ବିରୋଧ କରିଥିଲେ। ଫଳରେ ୧୯୮୮ରେ ଭାରତ ସରକାର ଏହି ଉପନ୍ୟାସର ବିକ୍ରି ଓ ଆମଦାନୀ ଉପରେ ନିଷେଧାଜ୍ଞା ଜାରି କରିଥିଲେ। ତେବେ ଏହି ନିର୍ଦେଶନାମା ପ୍ରତିବାଦରେ ୨୦୧୯ରେ ଦିଲ୍ଲୀ ହାଇକୋର୍ଟରେ ଏକ ମାମଲା ରୁଜୁ କରାଯାଇଥିଲା। ଚଳିତମାସ ୫ରେ ମାମଲାର ଶୁଣାଣି ହୋଇଥିବାବେଳେ ଭାରତ ସରକାର ଏହି ଉପନ୍ୟାସ ଉପରେ ଲାଗୁ କରାଯାଇଥିବା କଟକଣା ସମ୍ପର୍କିତ ନିର୍ଦେଶନାମା ଦାଖଲ କରିବାରେ ବିଫଳ ହୋଇଥିଲେ। ଏହାକୁ ଆଧାର କରି ହାଇକୋର୍ଟ କହିଛନ୍ତି ଯେ ନିର୍ଦେଶନାମା ଉପଲବ୍ଧ ହେଉନଥିବା ଅର୍ଥ ଏହି କଟକଣାକୁ ସରକାର ପ୍ରତ୍ୟାହାର କରିନେଇଛନ୍ତି।
୧୯୮୮ ସେପ୍ଟେମ୍ବରରେ ଏହି ଉପନ୍ୟାସ ଉନ୍ମୋଚିତ ହୋଇଥିବାବେଳେ ଭାରତ ସମେତ ବିଭିନ୍ନ ମୁସଲିମ ରାଷ୍ଟ୍ରରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଇରାନର ତତ୍କାଳୀନ ସର୍ବୋଚ୍ଚ ଧର୍ମଗୁରୁ ଆୟାତୋଲ୍ଲା ଖୋମିନି ସେତେବେଳେ ରୁସ୍ଦିଙ୍କୁ ହତ୍ୟା କରିବାକୁ ନିର୍ଦେଶ ଦେଇଥିଲେ, ଯାହାଫଳରେ ରୁସ୍ଦିଙ୍କୁ ଛଅବର୍ଷ ଆତ୍ମଗୋପନ କରିବାକୁୁ ପଡିଥିଲା। ତେବେ ୨୦୨୨ ଅଗଷ୍ଟରେ ନ୍ୟୁୟର୍କରେ ଆୟୋଜିତ ଏକ ଉତ୍ସବରେ ଯୋଗଦେଇଥିବାବେଳେ ରୁସ୍ଦିଙ୍କୁ ମଞ୍ଚ ଉପରେ ଛୁରାମାଡ କରାଯାଇଥିଲା। ଏଥିରେ ତାଙ୍କର ଗୋଟିଏ ଆଖି ସମ୍ପୂର୍ଣ୍ଣ ନଷ୍ଟ ହୋଇପଡିଥିବାବେଳେ ଗୋଟିଏ ହାତ ଅଚଳ ହୋଇପଡିଥିଲା।
Comments are closed.