ଚନ୍ଦନେଶ୍ୱର : ଦୀର୍ଘ ୧୨ଦିନ ଧରି ପାଳିତ ହେଉଥିବା ପ୍ରସିଦ୍ଧ ଚନ୍ଦନେଶ୍ୱର ଚଡ଼କ ପର୍ବର ମୁଖ୍ୟ ପାଟଯାତ୍ରା ଶୁକ୍ରବାର ଶୃଙ୍ଖଳାର ସହ ସମ୍ପନ୍ନ ହୋଇଛି। ଏହି ଅବସରରେ ଶ୍ରୀଜୀଉଙ୍କ ଦଶ ନଖି ବେଶକୁ ୫ଲକ୍ଷରୁ ଊର୍ଦ୍ଧ୍ବ ଭକ୍ତ ଦର୍ଶନ କରିଛନ୍ତି। ମାନସିକଧାରୀ ଭକ୍ତ ଜିଭ ଓ କାଖରେ କଣ୍ଟା ଫୋଡିଥିଲେ। ଘଟକୁ ସାନଡଭା ଗାଁର ଗୌରୀ ଶଙ୍କର ପଣ୍ଡିତ ମୁଣ୍ଡରେ ଧାରଣ କରି ବାଡ଼ସରିଷା ହାକାଣ୍ଡ ପୋଖରୀ ନିକଟରୁ ମନ୍ଦିର ପର୍ଯ୍ୟନ୍ତ ନେଇ ଆସିଥିଲେ। ବରବରିଆ ଗାଁର ବାଦ୍ୟକାରଙ୍କ ପାରମ୍ପରିକ ବାଦ୍ୟର ତାଳେ ତାଳେ ସେବାୟତ ମାନେ ନାଚି ନାଚି ମନ୍ଦିରରେ ପହଞ୍ଚିଥିଲେ। ଆଗରେ ଆମ୍ବଚୁଆ ଗାଁର ନାପିତ ସୁକୁମାର ବାରିକ, ଉମାକାନ୍ତ ବାରିକ ଓ ପୂର୍ଣ୍ଣଚନ୍ଦ୍ର ବାରିକ ମଶାଲ ଧରି ଯାଉଥିଲେ। ଶେଷରେ ଚଳିତ ବର୍ଷର ଅନ୍ତିମ ଅର୍ଘ୍ୟ ପ୍ରଦାନ କରାଯାଇଥିଲା। ଶନିବାର ମହା ବିଷୁବ ସଂକ୍ରାନ୍ତି ଅବସରରେ ଶ୍ରୀଜୀଉଙ୍କ ଠାରେ ପଣା ଭୋଗ ଲାଗି କରାଯିବ ବୋଲି ଟ୍ରଷ୍ଟ ବୋର୍ଡର ମୌରସୀ ତପନ କୁମାର ପଣ୍ଡା ସୂଚନା ଦେଇଛନ୍ତି। ଟ୍ରଷ୍ଟ ବୋର୍ଡ ସଭାପତି ବିଧାୟକ ଅନନ୍ତ ଦାସ ଭକ୍ତଙ୍କୁ ଶୁଭେଚ୍ଛା ଜଣାଇଥିଲେ। ଚନ୍ଦନେଶ୍ୱର ଚଡକ ମେଳାରେ ମୁଖ୍ୟ ପାଟଭକ୍ତ ହରିଶ୍ଚନ୍ଦ୍ର ସାହୁ, ଦେଉଳିଆ ଅଜିତ ପାତ୍ର, ଶ୍ରୀବେକଡି ନିରଞ୍ଜନ ଲେଙ୍କା ପ୍ରମୁଖ ପୁରୁଷାନୁକ୍ରମିକ ଭାବେ କାର୍ଯ୍ୟ କରିଥାନ୍ତି। ଅପରାହ୍ନରେ ପାଟଭକ୍ତ, ଦେଉଳିଆ, ଶ୍ରୀବେକଡିଙ୍କ ସମେତ ଉପବୀତ ଧାରୀ ଭକ୍ତ ମାନେ ମନ୍ଦିରରୁ ବାହାରି ହୁଗୁଳି ପଂଚାୟତର ବାଡ଼ସରିଷା ହାକାଣ୍ଡ ପୋଖରୀ ନିକଟରେ ପହଞ୍ଚିଥିଲେ। ସେଠାରେ ପୋଖରୀ ମାର୍ଜନା କରିବା ସହିତ ଦଶନଖି ଘଟକୁ ପାରମ୍ପରିକ ବାଦ୍ୟର ତାଳେ ତାଳେ ଏକ ବିଶାଳ ପଟୁଆରରେ ମନ୍ଦିର ଅଭିମୁଖେ ଯାଇଥିଲେ। ବହୁ ଭକ୍ତ ଜିଭ, ପେଟ, ଗୋଡ, ପିଠି ଆଦିରେ କଣ୍ଟା ଫୋଡି ନାଚି ନାଚି ମନ୍ଦିର ପର୍ଯ୍ୟନ୍ତ ଆସିଥିଲେ। ଏଥିରେ ଟ୍ରଷ୍ଟ ବୋର୍ଡର ନିର୍ବାହୀ ଅଧିକାରୀ ଭୋଗରାଇ ତହସିଲଦାର ହିମାଂଶୁ ଶେଖର ଗିରି, ସେବାୟତ ଗଣେଶ ଲାଲ ପଣ୍ଡା, ଉପ ମୌରସୀ ବୁଦ୍ଧଦେବ ପଣ୍ଡା, ଉପାଧ୍ୟକ୍ଷା ମୀନାରାଣୀ ସାସମଲ, ରମାକାନ୍ତ କରଣ, ଗୌତମବୁଦ୍ଧ ଦାସ, ଭୁବନାନନ୍ଦ ଦାସ ପ୍ରମୁଖ ଯୋଗ ଦେଇଥିଲେ। ଶାନ୍ତି ଶୃଙ୍ଖଳା ଲାଗି ବ୍ୟାପକ ପୁଲିସ ମୁତୟନ ହୋଇଥିଲେ।
Comments are closed.