ତେଲକୋଇ: ଭାଡ଼ିମରା ଗାଁରେ ବିଦ୍ୟୁତ ତାର ଲାଗି ହାତୀ ମୃତ୍ୟୁ ଘଟଣାରେ ବନ ବିଭାଗ ପକ୍ଷରୁ ୫ ଜଣ ଶିକାରୀଙ୍କୁ ଗିରଫ କରିଛି। ଶିକାରୀମାନେ ବାର୍ହା ଶିକାର ପାଇଁ ତାର ବିଛାଇଥିଲେ, ସେହି ତାରରେ ହାତୀ ଲାଗିଯାଇଥିଲା ଏବଂ ବିଦ୍ୟୁତ ତାର ଲାଗି ଯିବାରୁ ହାତୀର ମୃତ୍ୟୁ ହୋଇଯାଇଥିଲା ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
ଗୁରୁବାର ବିଳମ୍ବିତ ରାତିରେ କେନ୍ଦୁଝର ବନଖଣ୍ଡ ତେଲକୋଇ ବନାଞ୍ଚଳ ଗେଳାବନ୍ଧ ଫରେଷ୍ଟ ବିଟ୍ ସଲେଇକେନା ପଞ୍ଚାୟତ ଭାଡିମରା ଗ୍ରାମରେ ଧାନ ଚାଷରୁ ସୁରକ୍ଷା ପାଇଁ ଧାନ କ୍ଷେତ ଚାରିପଟେ ଜଙ୍ଗଲକୁ ଲାଗିଥିବା ସ୍ଥାନରେ ବିଦ୍ୟୁତ୍ ସଂଯୋଗ କରାଯାଇଥିବା ବେଳେ ବିଦ୍ୟୁତ୍ ସଂସ୍ପର୍ଶରେ ଆସି ଏକ ୪୦ବର୍ଷର ଦନ୍ତା ହାତୀ ମୃତ୍ୟୁବରଣ କରିଥିବା କେନ୍ଦୁଝର ବନଖଣ୍ଡ ଅଧିକାରୀ ଧନରା ଏଚ.ଡି ପ୍ରକାଶ କରିଛନ୍ତି।
ବିଦ୍ୟୁତ୍ ବିତରଣ କମ୍ପାନୀ ଟାଟା ପାୱାର କର୍ମଚାରୀ ଓ ଜଏଣ୍ଟ ଟାସ୍କ ଫୋର୍ସ ଅଧିକାରୀ ହିମାଂଶୁ ଶେଖର ମହାନ୍ତିଙ୍କ ସହ ଘଟଣାସ୍ତଳରେ ପହଞ୍ଚି ତଦନ୍ତ କରୁଛନ୍ତି। ଭାରତୀୟ ବନ୍ୟପ୍ରାଣୀ ଟ୍ରଷ୍ଟର ଅଧିକାରୀ ଏବଂ ବନ୍ୟପ୍ରାଣୀ ବିଭାଗ ଅଧିକାରୀଙ୍କ ଉପସ୍ଥିତିରେ ହାତୀଟିର ଶବ ବ୍ୟବଛେଦ ପରେ ହାତୀଟି ବିଦ୍ୟୁତ୍ ସଂସ୍ପର୍ଶରେ ଆସି ମୃତ୍ୟୁବରଣ କରିଥିବା ସ୍ପଷ୍ଟ ହୋଇଛି। ଏହି ଘଟଣାରେ ବନ ବିଭାଗ ପକ୍ଷରୁ ମାମଲା ରୁଜୁ କରାଯାଇ ବନ୍ୟପ୍ରାଣୀ ସୁରକ୍ଷା ଆଇନ ବଳରେ ଅଭିଯୁକ୍ତମାନଙ୍କୁ ଗିରଫ କରାଯିବା ସହିତ ଅଧିକ ତଦନ୍ତ ଜାରି ରହିଥିବା ଡିଏଫଓ ଶ୍ରୀ ଏଚ୍.ଡି କହିଛନ୍ତି।
