ନୂଆଦିଲ୍ଲୀ / କୋଲକାତା: ଟେଲିକମ୍ ରେଗୁଲେଟର ଅଥରିଟି (ଟ୍ରାଇ ) ସମସ୍ତ ପ୍ରିପେଡ୍ ପ୍ୟାକର ବୈଧତାକୁ ଅତି କମରେ ମେ ୩ ପର୍ଯ୍ୟନ୍ତ ବୃଦ୍ଧି କରିବାକୁ ଟେଲିକମ କମ୍ପାନୀକୁ କହିଥିବା ଜାଣାପଡିଛି । ମଙ୍ଗଳବାର ଦିନ ସରକାର ଲକ ଡାଉନର ଅବଧି ମେ ୩କୁ ବୃଦ୍ଦି କରିବା ପରେ ଟ୍ରାଇ ପକ୍ଷରୁ ଏହି ପଦକ୍ଷପ ନିଆଯାଇଛି। ଲକ ଡାଉନ ସମୟରେ ଦୋକାନ ବଜାର ବନ୍ଦ ଥିବାରୁ ଉପଭୋକ୍ତାମାନଙ୍କୁ ହଇରାଣ ନ କରି ସମସ୍ତ ପ୍ଲାନ ଅବଧି ବଢ଼ାଇବା ପାଇ ଟେଲିକମ୍ ସେବା ପ୍ରଦାନକାରୀ ଭାରତୀ ଏୟାରଟେଲ୍, ରିଲାଏନ୍ସ ଜିଓ, ଭୋଡାଫୋନ୍ ଆଇଡିଆ ଏବଂ ବିଏସଏନଏଲକୁ ଏହି ନିର୍ଦ୍ଦେଶ ଦିଆଯାଇଛି । ଏହା ପୂର୍ବରୁ ପ୍ରଥମ ପର୍ଯ୍ୟାୟ ୨୧ ଦିନିଆ ଲକ ଡାଉନ ପାଇଁ ସମସ୍ତ ପ୍ରିପେଡ୍ ପ୍ୟାକ୍ର ବୈଧତାକୁ ଏପ୍ରିଲ ୧୪ ପର୍ଯ୍ୟନ୍ତ ବୃଦ୍ଧି କରାଯାଇଥିଲା ।
ସେଲୁଲାର୍ ଅପରେଟର୍ସ ଆସୋସିଏସନ୍ ଅଫ୍ ଇଣ୍ଡିଆ (COAI)ର ମହାନିର୍ଦ୍ଦେଶକ ରାଜନ ଏସ୍ ମାଥ୍ୟୁସ୍ କହିଛନ୍ତି ଯେ ଗ୍ରାହକଙ୍କ ଆବଶ୍ୟକତା ପୂରଣ କରିବା ପାଇଁ ଅପରେଟରମାନେ ପରିସ୍ଥିତି ଉପରେ ନଜର ରଖିବେ ଏବଂ ଉପଯୁକ୍ତ ଉପାୟ ସ୍ଥିର କରିବେ। ସେଲୁଲାର୍ ଅପରେଟର୍ସ ଆସୋସିଏସନ୍ ଅଫ୍ ଇଣ୍ଡିଆ ଅଧିନରେ ଏୟାରଟେଲ୍, ଜିଓ ଏବଂ ଭୋଡାଫୋନ୍ ଆଇଡିଆର ପ୍ରତିନିଧିତ୍ୱ କରୁଛି।
