ମୁମ୍ବଇ: ବଲିଉଡ଼ ଅଭିନେତା ଜନ୍ ଆବ୍ରାହମ୍ ନିଜ ଆଗାମୀ ଚଳଚ୍ଚିତ୍ରକୁ ନେଇ ଚର୍ଚ୍ଚାରେ। ଏବେ ସେ ‘ଏକ୍ ଭିଲେନ୍ ରିଟର୍ନସ୍’ର ପ୍ରମୋସନ କରୁଛନ୍ତି, ଯେଉଁଥିରେ ଅର୍ଜୁନ କପୁର, ତାର ସୁତାରିଆ ଏବଂ ଦିଶା ପଟାନି ତାଙ୍କ ସହ ନଜର ଆସିବେ। ଇତି ମଧ୍ୟରେ ଜନ୍ ଆଉ ଏକ ଚଳଚ୍ଚିତ୍ର ପାଇଁ ମଧ୍ୟ ପ୍ରସ୍ତୁତି ଆରମ୍ଭ କରିଛନ୍ତି। ଖୁବଶୀଘ୍ର ଜନ୍ ଆକ୍ସନ୍ ଥ୍ରୀଲର ଫିଲ୍ମ ‘ତେହରାନ’ରେ ନଜର ଆସିବେ। ସେ ଏହି ଚଳଚ୍ଚିତ୍ରର ଶୁଟିଂ ଆରମ୍ଭ କରି ଦେଇଛନ୍ତି ଏବଂ ଆଜି ଏହି ଫିଲ୍ମରୁ ଜନ୍ଙ୍କ ପ୍ରଥମ ଲୁକ୍ ସାମ୍ନାକୁ ଆସିଛି। ମେଡକ୍ ଫିଲ୍ମସ୍ ଜନ୍ ଆବ୍ରାହମ୍ଙ୍କ ଆଗାମୀ ଚଳଚ୍ଚିତ୍ରର ଘୋଷଣା କରି ଟ୍ବିଟରରେ ଏକ ଭିଡିଓ ଶେୟାର କରିଛି, ଯେଉଁଥିରେ ଅଭିନେତାଙ୍କ ପ୍ରଥମ ଲୁକ୍ ଦେଖିବାକୁ ମିଳିଛି। ମାତ୍ର କିଛି ସେକେଣ୍ଡର ଏହି ଭିଡିଓରେ ଜନ୍ କଡ଼ା ସ୍ବଭାବ ସହ ନଜର ଆସିଛନ୍ତି। ତାଙ୍କର ଏହି ଲୁକ୍ ମଧ୍ୟ କାହାକୁ ଭୟଭୀତ କରିବା ପାଇଁ ଯଥେଷ୍ଟ।
ମେଡକ୍ ଫିଲ୍ମସ୍ ଜନ୍ଙ୍କ ପ୍ରଥମ ଲୁକ୍ ଶେୟାର କରି ଲେଖିଛନ୍ତି, ‘‘ଲାଇଟ୍, କ୍ୟାମେରା ଓ ହାଲ୍କା ଆକ୍ସନ ସହ ତେହରାନ୍ର ଶୁଟିଂ ଆରମ୍ଭ।’’ ଜନ୍ ମଧ୍ୟ ଇନ୍ଷ୍ଟାଗ୍ରାମରେ ଏହି ଭିଡିଓ ଶେୟାର କରିଛନ୍ତି, ଯାହାକୁ ପ୍ରଶଂସକ ଖୁବ୍ ପସନ୍ଦ କରିଛନ୍ତି।
ସତ୍ୟ ଘଟଣା ଉପରେ ଆଧାରିତ ଜନ୍ଙ୍କ ଆକ୍ସନ୍ ଥ୍ରୀଲର ଚଳଚ୍ଚିତ୍ର ‘ତେହରାନ’ ଅରୁଣ ଗୋପାଳନଙ୍କ ଦ୍ୱାରା ନିର୍ଦ୍ଦେଶିତ ଏବଂ ଇରାନରେ ଏହାର ଶୁଟିଂ କରାଯିବ। ଏହି ଚଳଚ୍ଚିତ୍ରର କାହାଣୀ ରିତେଶ ଶାହ ଏବଂ ଆଶିଷ ପ୍ରକାଶ ବର୍ମା ଲେଖିଛନ୍ତି। ଆସନ୍ତା ବର୍ଷ ସାଧାରଣତନ୍ତ୍ର ଦିବସ ଅବସରରେ ଏହି ଚଳଚ୍ଚିତ୍ର ମୁକ୍ତିଲାଭ କରିବ।
Comments are closed.