ୱାଶିଂଟନ୍: ଖାଦ୍ୟ ସ୍ବାଦିଷ୍ଟ ନ ହେବାରୁ ଜଣେ ମହିଳାଙ୍କୁ ଆତଙ୍କବାଦୀମାନେ ଜୀବନ୍ତ ଜାଳି ଦେଇଛନ୍ତି। ଏଭଳି ଅଭିଯୋଗ କରିଛନ୍ତି ସମ୍ପ୍ରତି ଆମେରିକାରେ ବାସ କରୁଥିବା ଦେଶର ଜଣେ ଆଗଧାଡ଼ିର ଆଇନଜୀବୀ ନାଜଲା ଆୟୁବି। ସେ କହିଛନ୍ତି ଯେ ତାଲିବାନ ଆତଙ୍କବାଦୀମାନେ ଜଣେ ମହିଳାଙ୍କ ଘରେ ପଶି ତାଙ୍କୁ ଖାଦ୍ୟ ରାନ୍ଧିବା ପାଇଁ ବାଧ୍ୟ କରିଥିଲେ। ସେ ଖାଦ୍ୟ ପରଷିବା ପରେ ଏହାର ସ୍ବାଦ ଠିକ୍ ନ ଥିବା ଦର୍ଶାଇ ତାଙ୍କୁ ଜାଳି ମାରିଦେଇଥିଲେ। ଉତ୍ତରାଞ୍ଚଳରେ ତାଲିବାନମାନେ ଏଭଳି ନାରକୀୟ କାଣ୍ଡ ଘଟାଇଥିବା ସେ କହିଛନ୍ତି। ଆତଙ୍କବାଦୀ ସେତିକିରେ ଅଟକି ନ ଥିଲେ। ମୃତ ମହିଳାଙ୍କ ଝିଅଙ୍କୁ ସେମାନଙ୍କ ସହିତ ବିବାହ କରିବାକୁ ପରିବାର ସଦସ୍ୟଙ୍କୁ ବାଧ୍ୟ କରିଥିଲେ ବୋଲି ଆୟୁବି କହିଛନ୍ତି।
ତାଲିବାନମାନେ କ୍ଷମତା ଦଖଲ ପରଠାରୁ ଘଟାଇଥିବା ଏଭଳି କେତେକ ବର୍ବର କାଣ୍ଡର ଦୃଷ୍ଟାନ୍ତ ସେ ଗଣମାଧ୍ୟମରେ ଉପସ୍ଥାପନ କରିଛନ୍ତି। କେତେକ ଯୁବତୀଙ୍କୁ ଯୌନଦାସୀ କରିବା ଉଦ୍ଦେଶ୍ୟରେ ସେମାନେ ବିଭିନ୍ନ ସ୍ଥାନକୁ ପଠାଉଛନ୍ତି। ଏମିତି କି ଶବ ରହିବା ପାଇଁ ବ୍ୟବହୃତ କଫିନ୍ରେ ଯୁବତୀଙ୍କୁ ପଡ଼ୋଶୀ ରାଷ୍ଟ୍ରକୁ ଚାଲାଣ ହେଉଥିବା ସେ କହିଛନ୍ତି। ମହିଳାଙ୍କ ଅଧିକାର ସୁରକ୍ଷା କ୍ଷେତ୍ରରେ କାର୍ଯ୍ୟ କରୁଥିବା ଯୋଗୁଁ ତାଲିବାନମାନେ ତାଙ୍କୁ ବଳପୂର୍ବକ ଦେଶରୁ ବାହାର କରିଦେଇଛନ୍ତି ବୋଲି ଆୟୁବି କହିଛନ୍ତି। ସେହିପରି ତାଲିବାନମାନେ ଜଣେ ଆଫଗାନ୍ ଖ୍ରୀଷ୍ଟିଆନ୍ଙ୍କୁ ହତ୍ୟାକରି ଖୁଣ୍ଟରେ ଝୁଲାଇଦେବା ସହ ଜୀବନ୍ତ ଜାଳିଦେଇଥିବା ଆମେରିକାର ପୂର୍ବତନ କଂଗ୍ରେସ ସଦସ୍ୟ ମାର୍କ ୱାକର ଅଭିଯୋଗ କରିଛନ୍ତି। ସେ କହିଛନ୍ତି ଯେ ଏହାଦ୍ବାରା ଆଫଗାନିସ୍ତାନରେ ବାସ କରୁଥିବା ଖ୍ରୀଷ୍ଟିଆନ୍ମାନେ ଆତଙ୍କିତ ହୋଇପଡ଼ିଛନ୍ତି।
