ମହିଳାଙ୍କ ସମେତ ସମସ୍ତ କର୍ମଚାରୀ କାର୍ଯ୍ୟକ୍ଷେତ୍ରକୁ ଫେରିବାକୁ ତାଲିବାନର ଆହ୍ୱାନ

କାବୁଲ: ସମୁଦାୟ ଆଫଗାନିସ୍ତାନ ଦଖଲ କରିବା ପରେ ଦେଶର ସରକାରୀ କର୍ମଚାରୀମାନେ ନିଜ ନିଜ କାର୍ଯ୍ୟକ୍ଷେତ୍ରକୁ ଫେରିଆସିବାକୁ ତାଲିବାନ ଆତଙ୍କି ଗୋଷ୍ଠୀ ଆହ୍ୱାନ ଦେଇଛି। ଏପରିକି ସରକାରୀ ଚାକିରି କରିଥିବା ମହିଳାମାନେ ମଧ୍ୟ ସେମାନଙ୍କ କାର୍ଯ୍ୟସ୍ଥଳକୁ ଆସିବାକୁ ତାଲିବାନ ପକ୍ଷରୁ କୁହାଯାଇଛି। ଆଫଗାନିସ୍ତାନରେ ତାଲିବାନର ଗୋଟିଏ ଗୋଟିଏ ଅଞ୍ଚଳ ଦଖଲ ପରେ ଅନେକ ସରକାରୀ କର୍ମଚାରୀ ଜୀବନ ଭୟରେ କାର୍ଯ୍ୟକ୍ଷେତ୍ରକୁ ଯିବା ବନ୍ଦ କରିଦେଇଛନ୍ତି। ଏଥିସହିତ ମହିଳାମାନେ ଆଉ ଘରୁ ଗୋଡ କାଢିବାକୁ ସାହସ କରୁନାହାନ୍ତି। ପ୍ରତିଟି ସମୟରେ ସେମାନଙ୍କ ଜୀବନ ପ୍ରତି ବିପଦ ରହିଥିବା ସେମାନେ ମନେ କରୁଛନ୍ତି। ତାଲିବାନ ଆତଙ୍କିମାନେ ଘରକୁ ଘର ଯାଇ କମ୍‍ ବୟସର ବାଳିକା, ଯୁବତୀ, ବିଧବାମାନଙ୍କୁ ବଳପୂର୍ବକ ଉଠାଇ ନେଇ ସେମାନଙ୍କୁ ବିବାହ କରୁଛନ୍ତି ଅଥବା ଯୋ÷ନଦାସୀ କରି ରଖୁଛନ୍ତି। ଆଫଗାନିସ୍ତାନ ଛାଡି ଅନ୍ୟ ରାଷ୍ଟ୍ରକୁ ଚାଲିଯାଇଥିବା ଆଫଗାନ ମହିଳାଙ୍କ କହିବା ଅନୁଯାୟୀ ସେମାନଙ୍କ ପାଇଁ ଆଫଗାନିସ୍ତାନ ସଂପ୍ରତି ନର୍କଠାରୁ ହୀନ ପାଲଟିଯାଇଛି।