ନୂଆଦିଲ୍ଲୀ – ସନାତନ ଧର୍ମ ବିଷୟରେ ବିବାଦୀୟ ଟିପ୍ପଣୀ ମାମଲାରେ ତାମିଲନାଡୁର ମନ୍ତ୍ରୀ ଉଦୟନିଧି ମାରାନ୍ ଏବଂ ଏ ରାଜାଙ୍କୁ ସୁପ୍ରିମକୋର୍ଟଙ୍କ ପକ୍ଷରୁ ନୋଟିସ୍ ଜାରି କରାଯାଇଛି । ଅଦାଲତ ଉଦୟନିଧି ମାରନଙ୍କୁ ଏପରି ବୟାନ କାହିଁକି ଦେଇଛ ବୋଲି ପ୍ରଶ୍ନ କରିଛନ୍ତି । ଏପରି ବୟାନ ଦେବାର କଅଣ ଆବଶ୍ୟକତା ଥିଲା ବୋଲି ପଚାରିଛନ୍ତି । ସୁପ୍ରିମକୋର୍ଟରେ ମାଡ୍ରାସ ହାଇକୋର୍ଟର ଜଣେ ଆଇନଜୀବୀଙ୍କ ପକ୍ଷରୁ ଦାୟର ମାମଲାରେ ଅଦାଲତ ଏହି ନିର୍ଦେଶ ଦେଇଛନ୍ତି ।
ତାମିଲନାଡୁର ଶାସକଦଳ ଡିଏମ୍କେକୁ ମଧ୍ୟ ଜବାବ ତଲବ କରାଯାଇଛି । ଜଷ୍ଟିସ ଅନିରୁଦ୍ଧ ବୋସ ଏବଂ ଏମ୍ ତ୍ରିବେଦୀଙ୍କୁ ନେଇ ଗଠିତ ସୁପ୍ରିମକୋର୍ଟଙ୍କ ଖଣ୍ଡପୀଠ ଏହି ନୋଟିସ୍ ଜାରି କରିଛନ୍ତି ।
ମାମଲା ଦାୟର କରିଥିବା ଆଇନଜୀବୀଙ୍କୁ ପ୍ରଥମେ କାହିଁକି ହାଇକୋର୍ଟ ଯାଇନାହଁ ବୋଲି ଏହି ଖଣ୍ଡପୀଠ ପ୍ରଶ୍ନ କରିଥିଲେ । ଏହି ମାମଲାରେ ଏଫ୍ଆଇଆର୍ ଦାୟର ହେବା ଦରକାର ବୋଲି କହିଥିଲେ ।
ଉଦୟନିଧି ଷ୍ଟାଲିନ୍ ଚେନ୍ନାଇରେ ଆୟୋଜିତ ଏକ ସମ୍ମିଳନୀରେ ସନାତନ ଧର୍ମ ବିରୋଧରେ ଅତି ଖରାପ ମନ୍ତବ୍ୟ ଦେଇଥିଲେ । ଏହାକୁ ନେଇ ସାରା ଦେଶରେ ପ୍ରତିକ୍ରିୟା ପ୍ରକାଶ ପାଇଥିଲା । ତାଙ୍କର ଏହି ମନ୍ତବ୍ୟକୁ ପୂର୍ବତନ କେନ୍ଦ୍ର ମନ୍ତ୍ରୀ ଏ ରାଜା ସମର୍ଥନ ଦେଇଥିଲେ ।
