ଆସାମର ଚୂଡ଼ାନ୍ତ ଏନଆରସି ତାଲିକା ପ୍ରକାଶ ତାରିଖ ଅଗଷ୍ଟ ୩୧କୁ ଘୁଞ୍ଚାଇଲେ ସୁପ୍ରିମକୋର୍ଟ

ନୂଆଦିଲ୍ଳୀ : ସୁପ୍ରିମକୋର୍ଟ ମଙ୍ଗଳବାର ଆସାମରେ ଜାତୀୟ ନାଗରିକ ପଞ୍ଜିକା (ଏନଆରସି)ର ଚୂଡ଼ାନ୍ତ ତାଲିକା ପ୍ରକାଶ ତାରିଖ ଜୁଲାଇ ୩୧ରୁ ଅଗଷ୍ଟ ୩୧ ପର୍ଯ୍ୟନ୍ତ ଘୁଞ୍ଚାଇ ଦେଇଛନ୍ତି । ଏହା ପୂର୍ବରୁ ସୁପ୍ରିମକୋର୍ଟ ଏନଆରସିର ଚୂଡ଼ାନ୍ତ ତାଲିକା ଜୁଲାଇ ୩୧ ସୁଦ୍ଧା ପ୍ରକାଶ କରିବାକୁ ନିର୍ଦେଶ ଦେଇଥିଲେ । ସୁପ୍ରିମକୋର୍ଟ ମଙ୍ଗଳବାର ନିଜ ରାୟରେ ପରିବର୍ତ୍ତନ କରି ଚୂଡ଼ାନ୍ତ ଏନଆରସି ତାଲିକା ଅଗଷ୍ଟ ୩୧ ସୁଦ୍ଧା ପ୍ରକାଶ କରିବାକୁ ନିର୍ଦେଶ ଦେଇଛନ୍ତି । ଏନଆରସିରେ ନାମ ହଟାଇବା ଓ ଅନ୍ତର୍ଭୁକ୍ତ କରିବାରେ ତ୍ରୁଟି ହୋଇଥିବାରୁ ଚୂଡ଼ାନ୍ତ ତାଲିକା ପ୍ରକାଶ ପାଇଁ ଆଉ କିଛି ସମୟ ଦେବାକୁ କେନ୍ଦ୍ର ଓ ରାଜ୍ୟ ସରକାର ସୁପ୍ରିମକୋର୍ଟଙ୍କୁ ଅନୁରୋଧ କରିଥିଲେ । ଏହି ଅନୁରୋଧ କ୍ରମେ ସୁପ୍ରିମକୋର୍ଟ ଏନଆରସି ଚୂଡ଼ାନ୍ତ ତାଲିକା ପ୍ରକାଶ ତାରିଖକୁ ଘୁଞ୍ଚାଇ ଦେଇଛନ୍ତି ।
ପୂର୍ବ ଶୁଣାଣିରେ ପ୍ରଧାନ ବିଚାରପତି ରଂଜନ ଗୋଗୋଇ ଏବଂ ଆର.ଏଫ ନରିମନଙ୍କ ପୀଠ ଆସାମ ଜାତୀୟ ନାଗରିକ ପଞ୍ଜିକାରେ କୌଣସି ନାଗରିକଙ୍କ ନାମ ସାମିଲ କରିବା ଓ ହଟାଇବା ପାଇଁ ଏନଆରସି ସଂଯୋଜକ ପ୍ରତୀକ ହାଜେଲାଙ୍କୁ ପୂର୍ଣ୍ଣ ସ୍ୱାଧୀନତା ଦେଇଥିଲେ ।
ପ୍ରକାଶ ଯେ ଏନଆରସିର ପ୍ରଥମ ତାଲିକା ୨୦୧୮ ଜୁଲାଇ ୩୦ରେ ପ୍ରକାଶ ପାଇଥିଲା। ଏଥିରେ ଆସାମର ୩.୨୯ କୋଟି ଲୋକଙ୍କ ମଧ୍ୟରୁ ୨.୮୯ କୋଟି ଲୋକଙ୍କ ନାମ ଥିଲା। ଏହି ତାଲିକାରେ ୪୦,୭୦,୭୦୭ ଲୋକଙ୍କ ନାମ ନଥିଲାବେଳେ ୩୭,୫୯,୬୩୦ ଜଣଙ୍କ ନାମ ଅସ୍ୱୀକାର କରାଯାଇଥିଲା।