ସୁଆଣ୍ଡୋ : ଦେଶର ଶ୍ରେଷ୍ଠ ଦଶ ଜଣ ପାରା-ଆଥଲେଟିକ୍ସ ଭାବେ ଓଡିଶାରୁ ପୁରୀଜିଲା ସତ୍ୟବାଦୀର ଦୌଡରାଣୀ ଜୟନ୍ତୀ ବେହେରା ଚୟନ କମିଟି ଦ୍ୱାରା ମନୋନୀତ ହୋଇ ଦଳରେ ସାମିଲ ହୋଇଛନ୍ତି । ଓଡିଶାରୁ ସେ ହେଉଛନ୍ତି ପ୍ରଥମ ପାରା-ଆଥଲେଟ ଭାବେ ଜଣାଶୁଣା । ଦେଶ ତଥା ଦେଶ ବାହାରେ ଦୌଡ ପ୍ରତିଯୋଗିତାରେ ଜୟନ୍ତୀ ଅଂଶ ଗ୍ରହଣ କରି ନିଜର ଉତ୍କର୍ଷତା ପ୍ରଦର୍ଶନ କରିଆସିଛନ୍ତି । ଏହି ଖବର ପ୍ରଚାରିତ ହେବା ପରେ ରାଜ୍ୟର କ୍ରୀଡାପ୍ରେମୀଙ୍କ ମନରେ ଆନନ୍ଦ ଖେଳି ଯାଇଛି । ବିଗତ ଦିନରେ ପ୍ରଧାନମନ୍ତ୍ରୀ ନିକଟରୁ ଆଶୀର୍ବାଦ ପାଇଥିବା ବେଳେ ମୁଖ୍ୟମନ୍ତ୍ରୀଙ୍କ ତରଫରୁ ପୁରସ୍କୃତ ହୋଇଥିଲେ । ତାଙ୍କର ଗୁରୁ ବିଷ୍ଣୁ ସାରଙ୍କ ପ୍ରଚେଷ୍ଟା ଓ ଆଶୀର୍ବାଦ ଯୋଗୁଁ ସେ ଏତେ ବାଟ ଯାଇ ପାରିଛନ୍ତି ବୋଲି କହିଛନ୍ତି । ତାଙ୍କର ଲକ୍ଷ ଅଲମ୍ପିକସରେ ଖେଳି ଦେଶ ପାଇଁ ଗୌରବ ଆଣିବେ । ସତ୍ୟବାଦୀରେ ଏହି ଖବର ପରିପ୍ରେକ୍ଷୀରେ ସମସ୍ତେ ଜୟନ୍ତୀଙ୍କ ପ୍ରଶଂସା କରୁଥିବା ଜଣାପଡ଼ିଛି।
