ସମାଜ ଡିଜିଟାଲ ଡେସ୍କ: ଉତ୍ତରାଖଣ୍ଡର ହରିଦ୍ଵାରସ୍ଥିତ ମନ୍ସା ଦେବୀ ମନ୍ଦିରରେ ରବିବାର ଦଳାଚକଟା ଘଟି ୬ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଛି। ଏହି ଘଟଣାରେ ଅନେକ ଶ୍ରଦ୍ଧାଳୁ ଆହତ ମଧ୍ୟ ହୋଇଛନ୍ତି। ସେମାନଙ୍କୁ ଉଦ୍ଧାର କରି ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି।
ରବିବାର ଛୁଟି ଦିବସ ଥିବାରୁ ମନ୍ଦିରରେ ଦର୍ଶନ ପାଇଁ ବହୁ ଶ୍ରଦ୍ଧାଳୁ ଏବଂ ପର୍ଯ୍ୟଟକଙ୍କ ଭିଡ଼ ହୋଇଥିଲା। ଶ୍ରଦ୍ଧାଳୁମାନେ ଶିଡ଼ି ଦେଇ ମନ୍ଦିରକୁ ଯାଉଥିବା ସମୟରେ ଠେଲାପେଲା ହେବାରୁ ଦଳାଚକଟା ଘଟିଥିଲା ବୋଲି ଗଡ଼ଓ୍ବାଲ ଡିଭିଜନ କମିସନର ବିନୟ ଶଙ୍କର ପାଣ୍ଡେ ସୂଚନା ଦେଇଛନ୍ତି।
ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁସ୍କର ସିଂହ ଧାମି ସାମାଜିକ ଗଣମାଧ୍ୟମ ଏକ୍ସ’ରେ ଏକ ପୋଷ୍ଟରେ କହିଛନ୍ତି, ଏସଡିଆରଏଫ, ସ୍ଥାନୀୟ ପୁଲିସ ଏବଂ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟରେ ଲାଗିଛନ୍ତି। ସ୍ଥାନୀୟ ପ୍ରଶାସନ ସହିତ ସେ ଯୋଗାଯୋଗରେ ରହି ପରିସ୍ଥିତି ଉପରେ ନଜର ରଖିଛନ୍ତି।
ଶ୍ରାବଣ ମାସରେ ହରିଦ୍ଵାରରେ ଶ୍ରଦ୍ଧାଳୁଙ୍କ ସଂଖ୍ୟା ପ୍ରତିବର୍ଷ ବୃଦ୍ଧି ପାଇଥିାଏ। ବିଶେଷକରି ହରି କି ପାଉରି ଏବଂ ମନ୍ସା ଦେବୀ ମନ୍ଦିରରେ ସର୍ବାଧିକ ଭିଡ଼ ହୋଇଥାଏ। କିନ୍ତୁ ଚଳିତ ଥର ପୂର୍ବବର୍ଷଗୁଡ଼ିକ ତୁଳନାରେ ଅଧିକ ଶ୍ରଦ୍ଧାଳୁଙ୍କ ସମାଗମ ହୋଇଛି। ତା’ ଛଡ଼ା ରବିବାର ଯୋଗୁ ଭିଡ଼ ବଢ଼ିବାରୁ ତାହାକୁ ନିୟନ୍ତ୍ରଣ କରିବା ସମ୍ଭବ ହୋଇନାହିଁ। ଯାହାଫଳରେ ଦଳାଚକଟା ଘଟିଛି ବୋଲି କୁହାଯାଉଛି।
