ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ ନିର୍ବାଚନ କମିଶନ ଆୟକର ବିଭାଗର ଦୁଇ ଜଣ ଅବସରପ୍ରାପ୍ତ ଅଧିକାରୀଙ୍କୁ ସ୍ୱତନ୍ତ୍ର ଖର୍ଚ୍ଚ ପର୍ଯ୍ୟବେକ୍ଷକ ନିଯୁକ୍ତି ଦେଇଛନ୍ତି। ସେହି ଦୁଇ ଜଣ ହେଉଛନ୍ତି ଗୋପାଳ ମୁଖାର୍ଜୀ ଏବଂ ଡି. ଡି. ଗୋୟଲ। କମିଶନ ଏକ ବିଜ୍ଞପ୍ତିରେ କହିଛନ୍ତି, ୧୯୮୦ ବ୍ୟାଚର ରାଜସ୍ୱ ଅଧିକାରୀ ଗୋପାଳ ମୁଖାର୍ଜୀଙ୍କୁ ଆନ୍ଧ୍ର ପ୍ରଦେଶ ଓ ତେଲେଙ୍ଗାନା ଏବଂ ୧୯୮୨ ବ୍ୟାଚର ରାଜସ୍ୱ ଅଧିକାରୀ ଡି. ଡି. ଗୋୟଲଙ୍କୁ ଅରୁଣାଚଳ ପ୍ରଦେଶ ଓ ନାଗାଲାଣ୍ଡର ସ୍ୱତନ୍ତ୍ର ଖର୍ଚ୍ଚ ପର୍ଯ୍ୟବେକ୍ଷକ ନିଯୁକ୍ତି ଦିଆଯାଇଛି। ଉଭୟ ମୁଖାର୍ଜୀ ଓ ଗୋୟଲଙ୍କ ଆୟକର ବିଭାଗ ଦ୍ୱାରା ଟିକସ ଠକେଇ ମାମଲାରେ ଚଢ଼ାଉ କରିବା ଏବଂ ଖାନତଲାସୀ କରିବା କ୍ଷେତ୍ରରେ ଅଭିଜ୍ଞତା ରହିଥିବା କମିଶନ କହିଛନ୍ତି। ପୂର୍ବରୁ କମିଶନ ଶୈଳେନ୍ଦ୍ର ହାଣ୍ଡା ଏବଂ ମଧୁ ମହାଜନଙ୍କୁ ଗୁଜୁରାଟ ଓ କର୍ଣ୍ଣାଟକ ପାଇଁ ସ୍ୱତନ୍ତ୍ର ଖର୍ଚ୍ଚ ପର୍ଯ୍ୟବେକ୍ଷକ ନିଯୁକ୍ତ କରିଥିଲେ।
