ଇତିହାସ ରଚିଲା ଦକ୍ଷିଣ ଆଫ୍ରିକା

ସମାଜ ଡିଜିଟାଲ ଡେସ୍କ: ଟି-୨୦ ବିଶ୍ୱକପର ସୁପର ୮ ପର୍ଯ୍ୟାୟରେ ସୋମବାର ଦକ୍ଷିଣ ଆଫ୍ରିକା ୩ ୱିକେଟରେ ୱେଷ୍ଟଇଣ୍ଡିଜକୁ ପରାସ୍ତ କରିଛି। ଏହା ସହିତ ଏଡେନ ମର୍କରମଙ୍କ ନେତୃତ୍ୱାଧୀନ ଦକ୍ଷିଣ ଆଫ୍ରିକା ଚଳିତ ସିଜନରେ ଏକ ନୂଆ ଇତିହାସ ରଚିଛି। ଟି-୨୦ ବିଶ୍ୱକପ ସଂସ୍କରଣରେ କ୍ରମାଗତ ଭାବେ ୭ମ ବିଜୟ ହାସଲ କରି ଦଳ ଏହି କୀର୍ତ୍ତିମାନ ସ୍ଥାପନ କରିଛି।

ସୋମବାର ୱେଷ୍ଟଇଣ୍ଡିଜ ବିପକ୍ଷ ମ୍ୟାଚରେ ବିଜୟ ସହିତ ଦକ୍ଷିଣ ଆଫ୍ରିକା ୨ୟ ଦଳ ଭାବେ ଟି-୨୦ ବିଶ୍ୱକପ ସେମିଫାଇନାଲରେ ପ୍ରବେଶ କରିଛି। ପୂର୍ବରୁ ଇଂଲଣ୍ଡ ସେମିଫାଇନାଲରେ ନିଜ ସ୍ଥାନ ଦଖଲ କରିନେଇଛି। ସୋମବାର ମ୍ୟାଚରେ ୱେଷ୍ଟଇଣ୍ଡିଜ ପ୍ରଥମେ ବ୍ୟାଟିଂ କରି ୧୨୨ ରନ ସଂଗ୍ରହ କରିଥିଲା। ଦକ୍ଷିଣ ଆଫ୍ରିକା ୧୨୩ ରନର ବିଜୟଲକ୍ଷ୍ୟକୁ ୧୬.୧ ଓଭରରେ ହାସଲ କରିନେଇଥିଲା।

ଟି-୨୦ ବିଶ୍ୱକପରେ ପୂର୍ବରୁ କୌଣସି ଦଳ ଲାଗାତର ୭ଥର ବିଜୟ ହାସଲ କରି ନ ଥିଲେ। ମାତ୍ର ଚଳିତ ସିଜନରେ ଦକ୍ଷିଣ ଆଫ୍ରିକା ପ୍ରଥମ ଦଳ ଭାବେ ଏହି ଗୌରବ ଅର୍ଜନ କରିଛି। ପୂର୍ବରୁ ଶ୍ରୀଲଙ୍କା ଏବଂ ଅଷ୍ଟ୍ରେଲିଆ ଯୁଗ୍ମ ଭାବେ ୬ ଥର ଲେଖାଏ କ୍ରମାଗତ ବିଜୟ ହାସଲ କରିଥିଲେ। ଅଷ୍ଟ୍ରେଲିଆ ୨ଟି ବିଶ୍ୱକପ (୨୦୧୦ ଏବଂ ୨୦୨୧)ରେ ୬ ଥର ଲେଖାଏ କ୍ରମାଗତ ବିଜୟଲାଭ କରିଥିଲା। ୨୦୦୯ରେ ଶ୍ରୀଲଙ୍କା ୬ଥର ଲଗାତର ବିଜୟ ସହିତ ଏହି ରେକର୍ଡ କରିଥିଲା। ଦକ୍ଷିଣ ଆଫ୍ରିକା ୨୦୨୪ ଟି-୨୦ ବିଶ୍ୱକପରେ ଶ୍ରୀଲଙ୍କା, ନେଦରଲାଣ୍ଡ୍‌‌ସ, ବାଂଲାଦେଶ, ନେପାଳ, ଆମେରିକା, ଇଂଲଣ୍ଡ ଏବଂ ୱେଷ୍ଟଇଣ୍ଡିଜକୁ ହରାଇ ସାରିଛି।