ନୂଆଦିଲ୍ଲୀ : ଦିଲ୍ଲୀର ଇନ୍ଦିରା ଗାନ୍ଧୀ ଆନ୍ତର୍ଜାତୀୟ ବିମାନ ବନ୍ଦରରେ ଯାଞ୍ଚ ସମୟରେ କଷ୍ଟମ ବିଭାଗ ପ୍ରାୟ ୩୦ ଲକ୍ଷ ଟଙ୍କା ମୂଲ୍ୟର ସୁନା ଜବତ କରିଛି । ଶୁକ୍ରବାର ଜଣେ ମହିଳାଙ୍କ ନିକଟରୁ ଏହି ସୁନା ଜବତ ହୋଇଛି । ସୁରକ୍ଷା ସଂସ୍ଥା ଆଖିରେ ଧୂଳି ଦେଇ ମହିଳା ଜଣଙ୍କ ନେଇ ଯାଉଥିବା ଛଅ ଖଣ୍ଡ ସୁନା ଏବଂ ଚାରୋଟି ସୁନା ତାର ଜବତ ହୋଇଛି। ତେବେ ମହିଳା ଜଣଙ୍କ ଧରା ନ ପଡିବା ପାଇଁ ନିଜ ଅନ୍ତବସ୍ତ୍ର ଏବଂ ହ୍ୟାଣ୍ଡ ବ୍ୟାଗରେ ଏହାକୁ ଲୁଚାଇ ରଖିଥିଲେ । ଜବତ ସୁନାର ପରିମାଣ ୭୯୪ ଗ୍ରାମ ହେବ ବୋଲି ଅନୁମାନ କରାଯାଉଛି।
ମସ୍କୋରୁ ଏଏସୟୁ-୨୩୨ ବିମାନରେ ଆସିଥିବା ଏହି ମହିଳାଙ୍କ ଜିନିଷ ପତ୍ର ଯାଞ୍ଚ ପରେ ଏହି ଛଅ ଖଣ୍ଡ ସୁନା ମିଳିଥିଲା । କିନ୍ତୁ ସୂଚନା ଅନୁସାରେ ଅଧିକ ସୁନା ନ ମିଳିବାରୁ ତାଙ୍କୁ ମହିଳା ଅଧିକାରୀମାନେ ସ୍ବତନ୍ତ୍ର ପ୍ରକୋଷ୍ଠକୁ ନେଇ ଯାଞ୍ଚ କରିଥିଲେ। ପରେ ତାଙ୍କ ଅନ୍ତବସ୍ତ୍ରରୁ ଚାରୋଟି ସୁନା ତାର ଜବତ କରିଥିଲେ । ପୂର୍ବରୁ ଏ ନେଇ କଷ୍ଟମ ବିଭାଗକୁ ଏକ ସୂଚନା ମିଳିଥିଲା । ତେଣୁ ଟର୍ମିନାଲ-୩ରେ କଷ୍ଟମ ଅଧିକାରୀ ମାନେ ମହିଳା ଜଣଙ୍କୁ ଧରି ଯାଞ୍ଚ କରିଥିଲେ।
