ଜନୁାଗଡ଼ : କଳାହାଣ୍ଡି ଜିଲା ଜୁନାଗଡ଼ରେ ହୋଇଥିବା ଗଣଦୁଷ୍କର୍ମ ଓ ଭିଡିଓ ଭାଇରାଲ ମାମଲାରେ ନୁଆ ତଥ୍ୟ ସାମ୍ନାକୁ ଆସିଛି । ଶୁକ୍ରବାର ପୀଡ଼ିତା ଚାଞ୍ଚଲ୍ୟକର ବୟାନ ଦେଇଛନ୍ତି । ଲିଫ୍ଟ ଦେଇଥିବା ଯୁବକଙ୍କର କିଛି ଭୂମିକା ନ ଥିବା କହି ପୁଲିସ ଛାଡ଼ି ଦେଇଥିବା ଯୁବକହିଁ ମୁଖ୍ୟ ଅଭିଯୁକ୍ତ ବୋଲି ପୀଡ଼ିତା କହିଛନ୍ତି । ସେ ଲଲିନ୍ଦ୍ର ଶବର ବାଇକରେ ଲିଫ୍ଚ ନେଇ ଯାଉଥିଲେ । ରାସ୍ତାରେ ଯିବା ସମୟରେ ଲଳିନ୍ଦ୍ର ପାଖକୁ ବାରମ୍ବର ମୋବାଇଲରେ କଲ୍ ଆସୁଥିଲା । ଘଟଣା ସ୍ଥଳରେ ଲଳିନ୍ଦ୍ର ବାଇକର ଗତିକୁ ମନ୍ଥର କରିଦେଇଥିଲା । ଏହାପରେ ୬ ଜଣ ଦୁର୍ବୃତ୍ତ ତାଙ୍କୁ ଜଙ୍ଗଲକୁ ଉଠାଇ ନେଇଥିଲେ । ଜଙ୍ଗଲରେ ଲଳିନ୍ଦ୍ର ହିଁ ପ୍ରଥମେ ଦୁଷ୍କର୍ମ କରିଥିଲେ ବୋଲି ପୀଡ଼ିତା କହିଛନ୍ତି । ମୁଖ୍ୟ ଖଳନାୟକ ଲଳିନ୍ଦ୍ରକୁ କାହିଁକି ଛାଡ଼ି ଦିଆ ଯାଉଛି ବୋଲି ପୀଡ଼ିତା ପ୍ରଶ୍ନ କରିଛନ୍ତି । ଏହାସହିତ ଲଳିନ୍ଦ୍ର ସମେତ ସମସ୍ତ ଅଭିଯୁକ୍ତମାନଙ୍କୁ ଫାଶି ଦିଆଯାଉ ବୋଲି ସେ ଦାବି କରିଛନ୍ତି । ଲଳିନ୍ଦ୍ରକୁ ଛାଡି ଦିଆଗଲେ ସେ ଆତ୍ମହତ୍ୟା କରିବେ ବେଲି କହିଛନ୍ତି ।
ସୂଚାନା ଅନୁଯାୟୀ, ଗତ ୧୪ ତାରିଖ ଦିନ ଭବନୀପାଟଣାରୁ ଯୁବତୀ ଜଣଙ୍କ ଘରକୁ ଫେରୁଥିବାବେଳେ ବସ୍ ଫେଲ ହୋଇଯାଇଥିଲେ । ସେହି ବାଟରେ ଆସୁଥିବା ଜଣେ ଯୁବକଙ୍କୁ ଲିଫ୍ଟ ମାଗିଥିଲେ । ଉକ୍ତ ଯୁବକ ତାଙ୍କୁ ଲିଫ୍ଟ ଦେଇଥିଲେ। ସେ ଯୁବକଙ୍କ ସହିତ ବାଇକରେ ଫେରୁଥିବା ବାଟରେ ୪/୫ ଜଣ ଦୁର୍ବୃତ୍ତ ତାଙ୍କୁ ଛୁରି ଦେଖାଇ ଜଙ୍ଗଲକୁ ନେଇ ଯାଇ ଦୁଷ୍କର୍ମ କରିଥିଲେ । ଭିଡିଓ ଭାଇରାଲ ହେବାପରେ ପୀଡିତା ଜୁନାଗଡ଼ ଥାନାରେ ଲିଖିତ ଅଭିଯୋଗ କରିଥିଲେ । ଏହାପରେ ପୁଲିସ ତନାଘନା ଆରମ୍ଭ କରିଥିଲା । ତେବେ ଲିଫ୍ଟ ଦେଇଥିବା ବାଇକ ଚାଳକଙ୍କ ଏଥିରେ କୌଣସି ସମ୍ପୃକ୍ତି ନାହିଁ ବୋଲି ଏସପି ସ୍ପଷ୍ଟ କରିଥିଲେ ।
