ଶ୍ରୀନଗର : କାଶ୍ମୀର ଦୂରଦର୍ଶନରେ ଏକ ଆଲୋଚନା କାର୍ଯ୍ୟକ୍ରମର ସିଧା ପ୍ରସାରଣ ଚାଲିଥିବାବେଳେ ସେଥିରେ ଅଂଶଗ୍ରହଣ କରିଥିବା ବିଶିଷ୍ଟ ସାମାଜିକ କର୍ମୀ ତଥା ବିଦ୍ୱାନ୍ ରିତା ଯତୀନ୍ଦରଙ୍କ ମୃତ୍ୟୁ ଘଟିଛି। ଏଭଳି ଅଭାବନୀୟ ଘଟଣା ଦୂରଦର୍ଶନ ଅଧିକାରୀ ଓ ଦର୍ଶକଙ୍କୁ ଅଭିଭୂତ କରିଛି। ଛପନ ବର୍ଷୀୟା ରିତା ହେଉଛନ୍ତି ଜଣେ ଡୋଗ୍ରୀ ବିଦ୍ୱାନ୍। ଜାମ୍ମ୍ୁ-କାଶ୍ମୀର ଭାଷା, ସାହିତ୍ୟ, କଳା ଓ ସଂସ୍କୃତି ଏକାଡେମୀର ସଂପାଦିକା। ସୋମବାର ଦୂରଦର୍ଶନରେ ଏକ ଆଲୋଚନାଚକ୍ରରେ ସେ ସାମିଲ ହୋଇଥିଲେ। ଏହାର ସିଧା ପ୍ରସାରଣ ଚାଲିଥିବାବେଳେ ଷ୍ଟୁଡିଓରେ ରିତାଙ୍କୁ ହୃଦ୍ଘାତ ହୋଇଥିଲା। କେହି କିଛି ଅନୁଭବ କରିବା ପୂର୍ବରୁ ନିଜ ଆସନରେ ହିଁ ସେ ସ୍ଥିର ହୋଇଯାଇଥିଲେ। କିଛି ସମୟ ପରେ ଉପସ୍ଥାପକ ଏହା ଜାଣିବାବେଳକୁ ତାଙ୍କର ପ୍ରାଣବାୟୁ ଉଡ଼ିଯାଇଥିଲା। ଦର୍ଶକଙ୍କ ମଧ୍ୟରେ ଏହା ବିସ୍ମୟ ସୃଷ୍ଟି କରିଛି।
