ନୂଆଦିଲ୍ଲୀ: ନୂଆବର୍ଷ ପାଳନ କିଛି ଲୋକଙ୍କ ପାଇଁ ମହଙ୍ଗା ପଡିଛି । ନୂଆବର୍ଷ ଉତ୍ସବ ପାଳନ ବେଳେ ଅନେକ ଲୋକ ପ୍ରାଣ ହରାଇଥିବା ଖବର ବିଭିନ୍ନ ସ୍ଥାନରୁ ମିଳିଛି । ସେହିପରି ହିମାଚଳ ପ୍ରଦେଶ ମଣ୍ଡି ଜିଲାର ପରାଶରରେ ସଡକ ଦୁର୍ଘଟଣାରେ ଦୁଇ ଜଣ ଛାତ୍ର ପ୍ରାଣ ହରାଇଥିବା ଜଣାପଡିଛି । ନୂଆବର୍ଷ ପାଳିବା ପାଇଁ କିଛି ଛାତ୍ର ଏକ ମାରୁତି ଭ୍ୟାନ ଗାଡିରେ ଯାଉଥିବା ବେଳେ ଦୁର୍ଘଟଣାର ସମ୍ମୁଖୀନ ହୋଇଥିଲେ । ଗାଡିଟି ଭାରସାମ୍ୟ ହରାଇ ଖାଇକୁ ଓଲଟି ପଡିଛି । ଫଳରେ ଏହି ଦୁର୍ଘଟଣାରେ ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ ୪ ଜଣ ଆହତ ହୋଇଛନ୍ତି ।
ମିଳିଥିବା ସୂଚନା ଅନୁଯାୟୀ, ଏହି ଛାତ୍ରମାନେ ନୂଆବର୍ଷ ପାଳିବା ପାଇଁ ରବିବାର ଘରୁ ବାହାରିଥିଲେ । ସୋମବାର ସକାଳେ ପରାଶର ନିଟକରେ ଗାଡିଟି ଭାରସାମ୍ୟ ହରାଇ ଖାଇକୁ ଓଲଟି ପଡିଥିଲା । ଘଟଣାସ୍ଥଳରେ ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ ୪ ଜଣ ଆହତ ହୋଇଛନ୍ତି । ଆହତଙ୍କୁ ପ୍ରାଥମିକ ଚିକିତ୍ସା ପରେ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ଗାଡିରେ ଥିବା ସମସ୍ତ ଯାତ୍ରୀ ହିମାଚଳ ପ୍ରଦେଶ ମନାଲି ଅଞ୍ଚଳର ହୋଇଥିବା ବେଳେ ସେମାନେ ବିହାର ଓ ନେପାଳର ମୂଳ ବାସିନ୍ଦା ବୋଲି ପୁଲିସ କହିଛି । ଏହି ଘଟଣାର ତଦନ୍ତ ଜାରି ରହିଛି ।
