ସେରମ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ ପକ୍ଷରୁ ସ୍ୱଦେଶୀ ଜ୍ଞାନ କୌଶଳରେ କ୍ୟାନସର ପାଇଁ ଟିକା ପ୍ରସ୍ତୁତ କରାଯାଇଥିବା ଜଣାପଡିଛି । ବିଶେଷକରି ଏହି ଟିକା ମହିଳାମାନଙ୍କର ଜରାୟୁ ଗ୍ରୀବା କର୍କଟ, ପୁରୁଷଙ୍କ ଯୌନାଙ୍ଗ କର୍କଟ ଏବଂ ମୁଖଗହ୍ୱର କର୍କଟ ରୋଗ ପାଇଁ ପ୍ରତିଷେଧକ ରୂପେ କାର୍ଯ୍ୟକରିବ ବୋଲି ଜଣାପଡିଛି ।
ତେବେ ରାଜ୍ୟରେ ୯ ରୁ ୧୩ ବର୍ଷ ବୟସ୍କ ବାଳିକାମାନଙ୍କ ପାଇଁ ଏହି ଟିକାକରଣ ଖୁବ୍ ଶୀଘ୍ର ଆରମ୍ଭ ହେବ ବୋଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ପକ୍ଷରୁ ଟୁଇଟ୍ କରି ସୂଚନା ଦିଆଯାଇଛି ।
ସୂଚନା ଅନୁସାରେ ଏହି ଟିକା ଉପରେ ବିଶେଷଜ୍ଞ କମିଟି ଆଲୋଚନା ପରେ ଏହାକୁ ବ୍ୟବହାର କରିବା ପାଇଁ ମଞ୍ଜୁରୀ ମିଳିବ ।
ଏଥିପାଇଁ ସେରମ୍ ଇନ୍ଷ୍ଟିଚ୍ୟୁଟ୍ ପକ୍ଷରୁ ଗତ ୮ ତାରିଖରେ ଡିସିଜିଆଇଙ୍କ ନିକଟରେ ଆବେଦନ କରାଯାଇଛି । ଅନୁମତି ମିଳିବା ପରେ ୨୦୨୨ ଶେଷ ସୁଦ୍ଧା ଏହା ବଜାରରେ ଉପଲବ୍ଧ ହେବ । ସବୁ ବର୍ଗର ଲୋକଙ୍କୁ ଏହା କିପରି ସହଜରେ ଓ କମ୍ ଦାମରେ ଉପଲବ୍ଧ ହେବ ସେଥିପାଇଁ ଏହାକୁ ସ୍ୱଦେଶୀ ଟିକା ଭାବେ ଶୁଭାରମ୍ଭ କରାଯିବ । ପୂର୍ବରୁ ଏହି ଟିକାକୁ ନେଇ ୩ଟି ପର୍ଯ୍ୟାୟରେ କ୍ଲିନିକାଲ୍ ପରୀକ୍ଷା କରାଯାଇଛି ।
