ନୂଆଦିଲ୍ଲୀ : ଲୋକପାଳ ନିଯୁକ୍ତି ପ୍ରସଙ୍ଗରେ ସୁପ୍ରିମକୋର୍ଟ କଠୋର ମନୋଭାବ ପୋଷଣ କରିଛନ୍ତି। ଫେବୃଆରୀ ମାସ ଶେଷ ସୁଦ୍ଧା ଏହି ପଦ ପାଇଁ ମନୋନୀତ ବ୍ୟକ୍ତିଙ୍କ ନାମ ତାଲିକା ପ୍ରଦାନ କରିବାକୁ ଲୋକପାଳ ଅନୁସନ୍ଧାନ କମିଟିକୁ ଗୁରୁବାର ନିର୍ଦେଶ ଦେଇଛନ୍ତି। ଏହି ପରିପ୍ରେକ୍ଷୀରେ ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗଇଙ୍କ ନେତୃତ୍ବାଧୀନ ପୀଠ ଅନୁସନ୍ଧାନ କାର୍ଯ୍ୟ ଶୀଘ୍ର ଶେଷ କରିବା ପାଇଁ ଲୋକପାଳ ଅନୁସନ୍ଧାନ କମିଟିକୁ ଆନୁଷଙ୍ଗିକ ଭିତ୍ତିଭୂମି ଓ ଲୋକବଳ ଯୋଗାଇଦେବାକୁ କେନ୍ଦ୍ର ସରକାରଙ୍କୁ ନିର୍ଦେଶ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ମାର୍ଚ୍ଚ ୭ତାରିଖକୁ ଧାର୍ଯ୍ୟ କରାଯାଇଛି। ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ ରଞ୍ଜନା ପ୍ରକାଶ ଦେଶାଇଙ୍କ ଅଧ୍ୟକ୍ଷତାରେ ଏହି କମିଟି ଗଠିତ ହୋଇଛି। ଲୋକପାଳ ନିଯୁକ୍ତି ମାମଲାର ଶୁଣାଣି ପାଇଁ ଗଠିତ ପୀଠରେ ଜଷ୍ଟିସ ଏଲ.ଏନ୍ ରାଓ ଓ ଜଷ୍ଟିସ ଏସ୍.କେ କାଉଲ ରହିଛନ୍ତି। ଶୁଣାଣିବେଳେ କେନ୍ଦ୍ର ସରକାରଙ୍କ ପକ୍ଷରୁ ଆଟର୍ଣ୍ଣି ଜେନେରାଲ କେ.କେ ବେଣୁଗୋପାଳ ଅନୁସନ୍ଧାନ କମିଟି ପାଇଁ ଭିତ୍ତିଭୂମିର ଅଭାବ ଥିବା ଦର୍ଶାଇଥିଲେ। ସେଥିପାଇଁ କାମ ଆଗେଇପାରୁ ନ ଥିବା ସେ ପୀଠକୁ ଜଣାଇଥିଲେ।
