ସମ୍ବଲପୁର : ସମ୍ବଲପୁରରେ ଦିନକୁ ଦିନ ନିଶା କାରବାର ବୃଦ୍ଧି ପାଉଥିବା ବେଳେ ବାରମ୍ବାର ଦାବି ପରେ ପୁଲିସ ପକ୍ଷରୁ ପଦକ୍ଷେପ ନେବାର ଆରମ୍ଭ ହୋଇଛି। ଏଭଳି ଏକ ଘଟଣାରେ ଗୁରୁବାର ଦିନ ସମୟରେ ପାଟ୍ରୋଲିଂ ସମୟରେ ବିପୁଳ ମାତ୍ରାରେ ନିଶା କଫ ସିରପ ଜବତ କରିଛି।
ପୁଲିସର ସୂଚନାନୁଯାୟୀ, ପାଟ୍ରୋଲିଂ ସମୟରେ ଖବର ପାଇ ପୁଲିସ ଚେକିଂ କରିଥିଲା। ଦୁର୍ଗାପାଲି ଛକ ଠାରେ ଚେକିଂ ସମୟରେ ବୁର୍ଲା ଅଞ୍ଚଳରୁ ସମ୍ବଲପୁର ସହରକୁ ବେଆଇନ ଭାବରେ ଏକ ଦାମୀକିଆ କାର ଯୋଗେ ୧୪ ଶହ ନିଶା କଫ ସିରପ ଚାଲାଣ ସମୟରେ ଧରା ପଡିଥିଲା। ଏଣୁ ଗାଡି ଚାଳକ ତଥା ବଡବଜାର ସୁନାରୀପଡା ନିବାସୀ ନିତ୍ୟାନନ୍ଦ ବିଶି (୩୭) ଓ ଭତରା ନିବାସୀ ସୁକାନ୍ତ ସାହୁ (୪୯) ଙ୍କୁ ଧରାଯାଇଥିଲା। ଅଭିଯୁକ୍ତ ମାନଙ୍କ ନିକଟରୁ ୧୪ ହଜାର ୫ ଶହ ଟଙ୍କା, ଗୋଟିଏ ଦାମୀକିଆ କାର, ୨ ମୋବାଇଲ ଫୋନ ସହିତ ନିଶା କଫ ସିରପ ଗୁଡିକୁ ଜବତ କରାଯାଇଛି। ଏ ନେଇ କ୍ଷେତରାଜପୁର ଥାନାରେ ଏକ ମାମଲା ରୁଜୁ କରାଯାଇ ଅଭିଯୁକ୍ତ ମାନଙ୍କୁ ଗିରଫ କରାଯାଇ ଅଦାଲତକୁ ଶୁକ୍ରବାର ଚାଲାଣ କରାଯାଇଛି। ଅପରପକ୍ଷରେ ନିତ୍ୟାନନ୍ଦ ବିଶିଙ୍କ ନାମରେ ବିଭିନ୍ନ ଥାନାରେ ୪ଟି ମାମଲା ରହିଥିବା ବେଳେ ସୁକାନ୍ତ ସାହୁଙ୍କ ନାମରେ ମଧ୍ୟ ଧନୁପାଲି ଥାନାରେ ୨ଟି ମାମଲା ରହିଛି। ଏହି ଘଟଣାର ଅଧିକ ତଦନ୍ତ ଜାରି ରହିଛି ବୋଲି ସମ୍ବଲପୁର ପୁଲିସ ସୂଚନା ଦେଇଛି।
