ସମ୍ବଲପୁର: ସମ୍ବଲପୁର ଜିଲାରେ ଅପରାଧିକ କାର୍ଯ୍ୟକଳାପ କିଛି ଦିନ ହେଲା ବଢ଼ିଥିବାରୁ ସେହି ଅନୁସାରେ ପୁଲିସର ମୁଣ୍ଡବ୍ୟଥା ମଧ୍ୟ ବଢ଼ିଛି। ତେଣୁ ଅପରାଧୀଙ୍କ ଉପରେ ଅଙ୍କୁଶ ଲଗାଇବା ପାଇଁ ପୁଲିସ ଗଲା ୯ ତାରିଖରୁ ସ୍ୱତନ୍ତ୍ର ଅଭିଯାନ ଆରମ୍ଭ କରିଛି। ପୁଲିସ ସୂଚନାନୁଯାୟୀ, ୧୦ ଓ ୧୧ ତାରିଖ ରାତିରେ ଚଢ଼ଉ ସମୟରେ ୭ ଜଣ ଅଭିଯୁକ୍ତଙ୍କୁ ବିଭିନ୍ନ ଅପରାଧିକ କାର୍ଯ୍ୟରେ ସଂପୃକ୍ତି ଆଧାରରେ ଗିରଫ କରାଯାଇଛି। ବ୍ୟବସାୟୀ ଓ ସାଧାରଣ ଲୋକଙ୍କୁ ଭୟଭୀତ କରି ଟଙ୍କା ଦାବି କରି ୩ ଜଣ, ବେଆଇନ ନିଶା କାରବାର କରି ୩ ଜଣ ଓ ସଟ୍ଟା କାରବାରରେ ସଂପୃକ୍ତ ଜଣକୁ ଗିରଫ କରି ବୁଧବାର କୋର୍ଟ ଚାଲାଣ କରାଯାଇଛି। ଚଢ଼ଉ ଅଭିଯାନ ସମୟରେ ସଟ୍ଟା, ଜୁଆ ଓ ନିଶା କାରବାରରେ ସଂପୃକ୍ତ ୯ ଜଣଙ୍କୁ ପୁଲିସ ଗିରଫ କରିଛି। ଦାଦାବଟି ମାଗିବା ଅଭିଯୋଗରେ ଆମ୍ବେଦକର ନଗରର ଅକ୍ଷୟ କୁମାର ତନ୍ତୀ (୨୯), ସାହୁ କଲୋନୀର ବିନୋଦ ସ୍ୱାଇଁ (୨୫) ଓ କରମଟୁଲିର ସଞ୍ଜୟ ଖଡ଼ିଆ (୨୫)କୁ ଗିରଫ କରାଯାଇଛି। ଏହି ଘଟଣାରେ ଟାଉନ ଥାନାରେ ୪୨୫/୨୦୨୦ ଓ ୪୨୬/୨୦୨୦ ନମ୍ବର ମାମଲା ଏବଂ ଅଇଁଠାପାଲି ଥାନାରେ ୫୮୧/୨୦୨୦ ନମ୍ବର ମାମଲା ରୁଜୁ ହୋଇଛି।
ନିଶା କାରବାର ଅଭିଯୋଗରେ ମାନେଶ୍ବର ହାଟପଡ଼ାର ଜଗବନ୍ଧୁ ନାଗ (୨୪) ଓ ଶିଶିର ବେହେରା (୨୧) ଏବଂ ମୋତିଝରନର ସର୍ଫରାଜ ଅହମଦ (୨୪)କୁ ଗିରଫ କରାଯାଇଛି। ସେମାନଙ୍କ ନାମରେ ୨୪୯/୨୦୨୦ ଓ ୪୫୪/୨୦୨୦ ନମ୍ବର ମାମଲା ରୁଜୁ କରାଯାଇଛି। ଚେରୁଆପଡ଼ାର ଏକଲବ୍ୟ ରଣା (୨୭)କୁ ସଟ୍ଟା କାରବାର ଅଭିଯୋଗରେ ଗିରଫ କରାଯାଇ ତା ନାମରେ ୨୮୨/୨୦୨୦ ନମ୍ବର ମାମଲା ରୁଜୁ କରାଯାଇଛି। ବୁଧବାର ଗିରଫ ହୋଇଥିବା ୭ ଜଣଙ୍କୁ କୋର୍ଟଚାଲାଣ କରାଯାଇଛି ବୋଲି ଏସଡିପିଓ ତପନ କୁମାର ମହାନ୍ତି କହିଛନ୍ତି। ପୁଲିସ ସକ୍ରିୟତା ବୃଦ୍ଧି ପାଇଥିବା ସତ୍ୱେ ଜିଲାରେ ହତ୍ୟା, ଲୁଟ, ଛୁରାମାଡ଼ ଓ ନିଶା କାରବାର ବୃଦ୍ଧି ପାଉଥିବା ଲକ୍ଷ୍ୟ କରାଯାଉଛି।
