ସମ୍ବଲପୁର : ଜନତାଙ୍କ ଗମନାଗମନର ସୁବିଧା ପାଇଁ ସମ୍ବଲପୁରର କଚେରୀ ଛକ ଠାରୁ ମହାନଦୀର ଅପରପାର୍ଶ୍ବରେ ଥିବା ଚାଉଁରପୁରକୁ ନଦୀ ଉପରେ ଦ୍ୱିତୀୟ ସେତୁ ନିର୍ମାଣ କରାଯାଇଛି। ଏହି ସେତୁ ନିର୍ମାଣ ଆରମ୍ଭ ସମୟରୁ ଏହି ସେତୁ ଉପରେ ଓ ତଳେ ବିଭିନ୍ନ ପ୍ରକାରର ଦୁର୍ଘଟଣା ଓ ଅଘଟଣ ମାନ ଘଟୁଥିବା ବେଳେ ବିଭିନ୍ନ ଦୁର୍ଘଟଣାରେ ୧୦ ରୁ ଉର୍ଦ୍ଧ ବ୍ୟକ୍ତିଙ୍କ ଅମୂଲ୍ୟ ଜୀବନ ଶେଷ ହୋଇ ସାରିଛି। ବିଗତ ଦିନରେ ଏହି ସେତୁ ଉପରୁ ଜଣେ ମହିଳା ଓ ତାଙ୍କର ଝିଅ ନିଖୋଜ ହୋଇଯାଇଥିବା ଘଟଣା ପରେ ବ୍ରହ୍ମ ମଣ୍ଡପ ପଣ୍ଡିତ ମହାସଭାର ପରାମର୍ଶକ୍ରମେ ବିଶ୍ୱ ହିନ୍ଦୁ ପରିଷଦ ଓ ସମ୍ବଲପୁର ନାଗରିକ କଲ୍ୟାଣ ସମିତି ଦ୍ୱାରା ସେତୁ ତଳେ ଶାନ୍ତି ହୋମ ଯଜ୍ଞ କରାଯାଇଛି।
ମଙ୍ଗଳବାର ପୂର୍ବାହ୍ନରେ ପଣ୍ଡିତ ମହାସଭାର ପଣ୍ଡିତ ମାନଙ୍କ ଦ୍ୱାରା କରାଯାଇଥିବା ଶାନ୍ତି ଓ ହୋମ ଯଜ୍ଞ କାର୍ଯ୍ୟକ୍ରମରେ କଲ୍ୟାଣ ସମିତିର ଗୋବିନ୍ଦ ଅଗ୍ରୱାଲ କର୍ତ୍ତା ଦାୟିତ୍ୱ ତୁଲାଇଥିଲେ। ପ୍ରାୟ ୨ ଘଣ୍ଟା ଧରି ବୈଦିକ ମନ୍ତ୍ରୋଚାରଣ ସହିତ ହୋମ ଯଜ୍ଞ କରାଯିବା ପରେ ପୂର୍ଣ୍ଣାହୁତି ଦିଆଯାଇ ସମସ୍ତଙ୍କର ମଙ୍ଗଳ କାମନା ସହିତ ସେତୁ ଉପରେ ଅଘଟଣ ନ ଘଟିବା ପାଇଁ ପ୍ରାର୍ଥନା କରାଯାଇଥିଲା। ଏହି ଅବସରରେ ରାଜୀବ ଶତପଥି, ଅରବିନ୍ଦ ନାୟକ, ନନ୍ଦ କିଶୋର ମିଶ୍ର, ପ୍ରଦୀପ ସୁପକାର, ବସନ୍ତ ସ୍ୱାଇଁ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମକୁ ପରିଚାଳନାରେ ସକ୍ରିୟ ସହଯୋଗ କରିଥିଲେ।
Comments are closed.