ଗଠନମୂଳକ ହେବା ଆବଶ୍ୟକ
ସଂସଦର ଶୀତକାଳୀନ ଅଧିବେଶନ ଆରମ୍ଭ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାଂସଦମାନଙ୍କୁ ଏକ ଗୁରୁତ୍ୱପୂର୍ଣ୍ଣ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ ସଂସଦରେ ‘ଡ୍ରାମା’ (ନାଟକବାଜି) ନ କରି ‘ଡେଲିଭରି’ (ଫଳପ୍ରଦ କାମ) ଉପରେ ଗୁରୁତ୍ୱ ଦିଆଯାଉ। ସଂସଦ ହେଉଛି ଦେଶ ଗଠନ ପାଇଁ ଆଲୋଚନାର ସ୍ଥାନ, ଏହା କୌଣସି ନାଟ୍ୟମଞ୍ଚ ନୁହେଁ। ପ୍ରଧାନମନ୍ତ୍ରୀଙ୍କ କହିବା କଥା ହେଲା, ବିରୋଧୀ ଦଳ ନିର୍ବାଚନ ପରାଜୟର ହତାଶା ଭାବରୁ ମୁକ୍ତ ହୋଇ ଗଠନମୂଳକ ଆଲୋଚନାରେ ଭାଗ ନେବା ଉଚିତ। ଜଣେ ସାଧାରଣ ନାଗରିକ ଭାବେ ଦେଖିଲେ ଏହି କଥାଟି ବେଶ୍ ଯୁକ୍ତିଯୁକ୍ତ ମନେହୁଏ। କାରଣ ଭୋଟରମାନେ ଚାହାନ୍ତି ସେମାନଙ୍କ ପ୍ରତିନିଧିମାନେ ସଂସଦରେ ହୋହଲ୍ଲା ନକରି ଜନହିତକର ଆଲୋଚନା କରନ୍ତୁ ଏବଂ ସରକାରଙ୍କୁ ଉତ୍ତରଦାୟୀ କରାନ୍ତୁ; କିନ୍ତୁ ମୁଦ୍ରାର ଅନ୍ୟ ପାର୍ଶ୍ୱଟି ମଧ୍ୟ ପ୍ରଣିଧାନଯୋଗ୍ୟ। ପ୍ରଧାନମନ୍ତ୍ରୀଙ୍କ ଏହି ମନ୍ତବ୍ୟ ଉପରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଓ ଅନ୍ୟ ବିରୋଧୀ ନେତାମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ସେମାନଙ୍କ ଯୁକ୍ତି ହେଲା- ବେକାରି ସମସ୍ୟା, ଦରଦାମ୍ ବୃଦ୍ଧି, ମଣିପୁର ହିଂସା ଏବଂ ନିର୍ବାଚନ ପ୍ରକ୍ରିୟାରେ ତ୍ରୁଟି ବିଷୟରେ ପ୍ରଶ୍ନ ଉଠାଇବା କ’ଣ ‘ଡ୍ରାମା’? ଯେତେବେଳେ ସରକାର ଗୁରୁତ୍ୱପୂର୍ଣ୍ଣ ବିଲ୍ଗୁଡ଼ିକୁ ବିନା ଆଲୋଚନାରେ ଗୃହୀତ କରାଇ ନିଅନ୍ତି ଏବଂ ବିରୋଧୀଙ୍କ ସ୍ୱରକୁ ଦବାଇ ଦିଅନ୍ତି, ସେତେବେଳେ ପ୍ରତିବାଦ କରିବା ଛଡ଼ା ଅନ୍ୟ ରାସ୍ତା କ’ଣ ବା ଥାଏ?
ଏହି ବାଦ-ପ୍ରତିବାଦରୁ ଗୋଟିଏ କଥା ସ୍ପଷ୍ଟ ଯେ ଶାସକ ଓ ବିରୋଧୀ ଦଳ ପରସ୍ପରକୁ ବୁଝିବାରେ ବିଫଳ ହେଉଛନ୍ତି। ‘ଡେଲିଭରି’ ବା କାର୍ଯ୍ୟ ସମ୍ପାଦନ ନାଁରେ ସରକାର ଯଦି ଆଲୋଚନାକୁ ଏଡ଼ାଇ ଯିବେ, ତେବେ ତାହା ଗଣତନ୍ତ୍ର ପାଇଁ ଶୁଭଙ୍କର ନୁହେଁ। ସେହିପରି ବିରୋଧୀ ଦଳ ଯଦି କେବଳ ଗୃହକୁ ଅଚଳ କରିବାକୁ ଏକମାତ୍ର ଅସ୍ତ୍ର ଭାବେ ବ୍ୟବହାର କରିବେ, ତେବେ ସାଧାରଣ ଲୋକଙ୍କ ସମସ୍ୟାର ସମାଧାନ ହୋଇପାରିବ ନାହିଁ। ବିନା ତର୍କରେ ଆଇନ ଗୃହୀତ କରିବା ଯେତିକି କ୍ଷତିକାରକ, ପ୍ରତିଦିନ ସଂସଦକୁ ବନ୍ଦ ରଖିବା ମଧ୍ୟ ସେତିକି ନିରର୍ଥକ।
ଯଦି ସତରେ ‘ଡ୍ରାମା ବନ୍ଦ କରି କାମ କରିବା’କୁ ହେବ, ତେବେ ଉଭୟ ପକ୍ଷକୁ ନିଜର ଆଚରଣ ବଦଳାଇବାକୁ ପଡ଼ିବ। ସରକାରଙ୍କୁ ବୁଝିବାକୁ ହେବ ଯେ ପ୍ରଶ୍ନ ପଚାରିବା ବିରୋଧୀଙ୍କ ଅଧିକାର ଏବଂ ଏହାକୁ ନାଟକବାଜି କହି ଉଡ଼ାଇ ଦେବା ଠିକ୍ ନୁହେଁ। ଗୁରୁତ୍ୱପୂର୍ଣ୍ଣ ବିଲ୍ ଉପରେ ବିସ୍ତୃତ ଆଲୋଚନା ପାଇଁ ସରକାର ସମୟ ଦେବା ଦରକାର। ଅନ୍ୟପକ୍ଷରେ ବିରୋଧୀ ଦଳ ମଧ୍ୟ କେବଳ ପ୍ଲାକାର୍ଡ ଧରି ସ୍ଲୋଗାନବାଜି କରିବା ବଦଳରେ ତଥ୍ୟ ଭିତ୍ତିକ ତର୍କ ଜରିଆରେ ସରକାରଙ୍କୁ ଘେରିବା ଉଚିତ। ଏହି ପରିପ୍ରେକ୍ଷୀରେ ଜନସାଧାରଣଙ୍କ ଭୂମିକା ମଧ୍ୟ ଗୁରୁତ୍ୱପୂର୍ଣ୍ଣ। ଆମେ କେବଳ ଟିଭିରେ ରାଜନୈତିକ ଝଗଡ଼ା ଦେଖି ଖୁସି ହେବା ଅନୁଚିତ। ଯେଉଁ ନେତାମାନେ କେବଳ ପାଟିତୁଣ୍ଡ କରନ୍ତି, ସେମାନଙ୍କୁ ପ୍ରଶଂସା ନକରି, ଯେଉଁମାନେ ସଂସଦରେ ପ୍ରକୃତ ନୀତି ନିର୍ଦ୍ଧାରଣରେ ଭାଗ ନିଅନ୍ତି, ସେମାନଙ୍କୁ ଗୁରୁତ୍ୱ ଦେବା ଦରକାର। ଭୋଟରମାନେ ଯେବେ ନେତାଙ୍କୁ ପଚାରିବେ- ‘ଏହି ଅଧିବେଶନରେ ଆପଣ ଆମ ପାଇଁ କ’ଣ କଲେ?’ ସେବେ ଯାଇ ସଂସଦରେ ପରିବର୍ତ୍ତନ ଆସିବ। ଆଲୋଚନା ବିହୀନ ‘କାମ’ ଏବଂ ଫଳାଫଳ ବିହୀନ ‘ଡ୍ରାମା’- ଉଭୟ ଦେଶ ପାଇଁ କ୍ଷତିକାରକ।
