କେନ୍ଦୁଝରଗଡ଼ : କେନ୍ଦୁଝର ସଦର ପଞ୍ଚାୟତ ସମିତି ପକ୍ଷରୁ ବୁଧବାର କାର୍ଯ୍ୟାଳୟ ସଭା ଗୃହରେ ଚତୁର୍ଥ ଅଧିବେଶନ ଅଧ୍ୟକ୍ଷା ଜ୍ୟୋର୍ତିମୟୀ ନାଏକଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ବିଭିନ୍ନ ଯୋଜନାରେ ଆସୁଥିବା ପାଣ୍ଠିର ସଦୁପଯୋଗ କରାଯାଇ କିଭଳି ପଞ୍ଚାୟତ ସମିତି ଅଧୀନ ସମସ୍ତ ୨୫ ପଞ୍ଚାୟତର ସର୍ବାଙ୍ଗୀନ ବିକାଶ ହୋଇପାରିବ ସେ ନେଇ ବିଡିଓ ବିକାଶ ଚନ୍ଦ୍ର ସାହୁ ସମସ୍ତ ନିର୍ବାଚିତ ପ୍ରତିନିଧିଙ୍କ ସହଯୋଗ କାମନା କରିଥିଲେ । ପାଇପ ଯୋଗେ ଘରକୁ ଘର ପାନୀୟଜଳ ଯୋଗାଣ ନେଇ ବହୁ ସଦସ୍ୟ ତୀବ୍ର ଅସନ୍ତୋଷ ବ୍ୟକ୍ତ କରିବା ସହ ପଞ୍ଚାୟତର ଅଧିକାଂଶ ଗ୍ରାମରେ ଏପର୍ଯ୍ୟନ୍ତ ପାଇପ ବିଛା ଯାଇନଥିବା ସଦସ୍ୟ- ସଦସ୍ୟା ଅଭିଯୋଗ କରିଥିଲେ। ସେହିଭଳି ପଦ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ କାର୍ଯ୍ୟରତ ଆୟୁଷ ଡାକ୍ତର ଅଶୋକ କୁମାର ସାହୁଙ୍କ ବଦଳି ହୋଇଥିବା ବେଳେ ତାଙ୍କୁ ତୁରନ୍ତ ରିଲିଭ କରିବାକୁ ସ୍ଥାନୀୟ ପଦ୍ମପୁର ସମିତିସଭ୍ୟ ବୈଠକରେ ଉପସ୍ଥିତ ସଦର ବିଧାୟକ ମୋହନ ଚରଣ ମାଝୀଙ୍କ ଦୃଷ୍ଟି ଆକର୍ଷଣ କରିଥିଲେ । ଏତଦ୍ ବ୍ୟତୀତ କୃଷି ବିକାଶ, ଯୋଗାଣ ଓ ସାମାଜିକ ସୁରକ୍ଷାର କାର୍ଯ୍ୟକାରୀତା ସମ୍ପର୍କରେ ବୈଠକରେ ବିସ୍ତୃତ ଭାବେ ଆଲୋଚନା ହୋଇଥିଲା । ପ୍ରାରମ୍ଭରେ ପଞ୍ଚାୟତ ସମିତି ଭାରପ୍ରାପ୍ତ ଗ୍ରାମପଞ୍ଚାୟତ ଉନ୍ନୟନ ଅଧିକାରୀ ସଞ୍ଜୟ କୁମାର ମହାନ୍ତ ପୂର୍ବ ବୈଠକର ବିବରଣୀ ପାଠ କରିଥିଲେ। ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ ଭାଗବତ ନାଏକ, ସଦର ପଞ୍ଚାୟତ ସମିତି ଅଧୀନ ୫ନଂ ଜୋନ ଜିଲାପରିଷଦ ସଦସ୍ୟ ରଥ ମୁଣ୍ଡା ଓ ୬ନଂ ଜୋନ ଜିଲାପରିଷଦ ସଦସ୍ୟ ଆଶିଷ ଚକ୍ରବର୍ତ୍ତୀ, ବ୍ଲକର ସମସ୍ତ ୨୫ ପଞ୍ଚାୟତର ସରପଞ୍ଚ ଓ ସମିତିସଭ୍ୟ, ସହକାରୀ ଯନ୍ତ୍ରୀ ଓ ବିଭିନ୍ନ ବିଭାଗର ଅଧିକାରୀ ଉପସ୍ଥିତ ରହି ନିଜ ନିଜ ବିଭାଗର ସମସ୍ତ ତଥ୍ୟ ପ୍ରଦାନ ସହ ଆଲୋଚନାରେ ଅଂଶଗ୍ରହଣ କରିଥିଲେ। ଶେଷରେ ପଞ୍ଚାୟତ ସମିତି ଉପାଧ୍ୟକ୍ଷ ଦିଲ୍ଲୀପ କୁମାର ବେହେରା ଧନ୍ୟବାଦ ଅର୍ପଣ କରିଥିଲେ।
Popular Categories
Previous article
Next article