ୱାଶିଂଟନ୍: ପ୍ରସିଦ୍ଧ ଗଣମାଧ୍ୟମ ବ୍ୟକ୍ତିତ୍ବ (ମିଡିଆ ମୁଗଲ) ରୁପର୍ଟ ମର୍ଡୋକ୍ ୯୨ ବର୍ଷ ବୟସରେ ପୁନର୍ବିବାହ କରିବାକୁ ଯାଉଛନ୍ତି। ବାନ୍ଧବୀ ଏଲେନା ଜୁକୋଭାଙ୍କ ସହିତ ତାଙ୍କର ନିର୍ବନ୍ଧ ସମ୍ପନ୍ନ ହୋଇଛି। ଏଲେନା ହେଉଛନ୍ତି ରୁଷିଆର ଜଣେ ଜୀବବିଜ୍ଞାନବିତ୍। ତାଙ୍କୁ ଏବେ ୬୭ବର୍ଷ। କିଛି ମାସ ଧରି ଉଭୟଙ୍କର ପ୍ରେମ ସମ୍ପର୍କ ରହିଆସିଛି। ଆସନ୍ତା ଜୁନ୍ରେ କାଲିଫର୍ଣ୍ଣିଆସ୍ଥିତ ମର୍ଡୋକ୍ଙ୍କ ଫାର୍ମହାଉସ୍ରେ ସେମାନଙ୍କର ବିବାହ ଉତ୍ସବ ଅନୁଷ୍ଠିତ ହେବ। ଏହା ହେବ ମର୍ଡୋକ୍ଙ୍କର ଷଷ୍ଠ ବିବାହ। ଏହା ପୂର୍ବରୁ ମର୍ଡୋକ୍ ଜଣେ ପୁଲିସ ଅଧିକାରୀ ଓ ଚୀନ୍ ଜନ୍ମିତ ବ୍ୟବସାୟୀଙ୍କୁ ପ୍ରେମ କରୁଥିଲେ। ପୂର୍ବରୁ ଅଷ୍ଟ୍ରେଲୀୟ ମହିଳା ପାଟ୍ରିସିଆ ବୁକର, ସ୍କଟଲାଣ୍ଡ ସାମ୍ବାଦିକା ଆନ୍ନା ମାନ୍ ଓ ୱେଣ୍ଡି ଡେଙ୍ଗ୍, ଆମେରିକୀୟ ମଡେଲ ଜେରି ହଲ୍ ପ୍ରମୁଖଙ୍କୁ ବିବାହ କରିଥିଲେ। ମର୍ଡୋକ୍ ଗତ ବର୍ଷ ଫକ୍ସ ଆଣ୍ଡ ନ୍ୟୁଜ୍ କର୍ପୋରେସନ୍ର ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ। ତାଙ୍କ ୪ ସନ୍ତାନଙ୍କୁ ନେଇ ଗଠିତ ଟ୍ରଷ୍ଟ ଦ୍ବାରା ଉକ୍ତ ଗଣମାଧ୍ୟମ ସଂସ୍ଥା ପରିଚାଳିତ ହେଉଛି। ଅପରପକ୍ଷରେ ଏଲେନା ପୂର୍ବରୁ କୋଟିପତି ରୁଷୀୟ ତୈଳ ବ୍ୟବସାୟୀ ଆଲେକଜାଣ୍ଡାର ଜୁକୋଭଙ୍କୁ ବିବାହ କରିଥିଲେ। ସେମାନଙ୍କର ଜଣେ ବିବାହିତ ଝିଅ ଅଛନ୍ତି।
Popular Categories
Previous article
Next article