ସମ୍ବଲପୁର-ପୁରୀ ଇଣ୍ଟରସିଟିକୁ ବଲାଙ୍ଗୀର ପର୍ଯ୍ୟନ୍ତ ସମ୍ପ୍ରସାରଣ ପାଇଁ କେନ୍ଦ୍ର ମନ୍ତ୍ରୀଙ୍କୁ ଭେଟିଲା ରେଳ ଉପଭୋକ୍ତା ସଂଘ

ରେଙ୍ଗାଲିକ୍ୟାମ୍ପ: ରେଳ ଉପଭୋକ୍ତା ସଂଘ ସଂଘ ,ବରଗଡ଼ର ଏକ ପ୍ରତିନିଧି ଦଳ ତା.୧/୩/୨୪ ଦିନ ସମ୍ବଲପୁରକୁ ଯାଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହିତ ସାକ୍ଷାତ କରି ସମ୍ବଲପୁର-ପୁରୀ ଇଣ୍ଟରସିଟି ଟ୍ରେନକୁ ବଲାଙ୍ଗୀର ପର୍ଯ୍ୟନ୍ତ ସମ୍ପ୍ରସାରିତ କରିବାକୁ ଅନୁରୋଧ କରିଥିଲା। ପୂର୍ବତଟ ରେଳପଥ କାର୍ଯ୍ୟାଳୟରେ ଏହାକୁ କାର୍ଯ୍ୟକାରୀ କରିବା ସମ୍ପର୍କରେ ଚାଲିଥିବା ଯୋଜନା ସମ୍ବନ୍ଧିତ ପତ୍ର ସହିତ ଏକ ନିବେଦନ ପତ୍ର ଦିଆଯାଇ ଏହା ଉପରେ ବିଶଦ ଆଲୋଚନା ହୋଇଥିଲା।

ଉକ୍ତ ପତ୍ରରେ ପୂର୍ବତଟ ରେଳପଥର ଏକ ବିଭାଗ (ପରିଚାଳନ ବିଭାଗ) ଅନ୍ୟ ଏକ ବିଭାଗ (ଯାନ୍ତ୍ରିକ ବିଭାଗ) କୁ ସମ୍ବଲପୁର-ପୁରୀ ଇଣ୍ଟରସିଟିକୁ ବଲାଙ୍ଗୀର ପର୍ଯ୍ୟନ୍ତ ସମ୍ପ୍ରସାରଣ କରିବାକୁ ପ୍ରସ୍ତାବ ଦେଇଛି। ତେଣୁ, ଲୋକଙ୍କ ସୁବିଧା ପାଇଁ ଏହି କାର୍ଯ୍ୟକୁ ତ୍ୱରାନ୍ୱିତ କରିବାକୁ ଶ୍ରୀଯୁକ୍ତ ପ୍ରଧାନଙ୍କୁ ନିବେଦନ କରାଯାଇଥିଲା।

କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହା ଉପରେ ଉପଯୁକ୍ତ ପଦକ୍ଷେପ ଗ୍ରହଣ କରାଯିବ ବୋଲି ଆଶ୍ୱାସନା ଦେଇଥିଲେ। ଏହି ପ୍ରତିନିଧି ଦଳରେ କାର୍ଯ୍ୟକାରୀ ସଭାପତି କୃଷ୍ଣ ଚନ୍ଦ୍ର ପଣ୍ଡା, ଉପ ସଭାପତି ସର୍ଦ୍ଦାର ପ୍ରିତମ ସିଂହ ଓ ସମ୍ପାଦକ କମଳ ଯୋଶୀ ରହିଥିଲେ। ବରଗଡ଼ ଜିଲା ବିଜେପି ସଭାପତି ଅଶ୍ଵିନୀ ଷଡ଼ଙ୍ଗୀଙ୍କ ପରାମର୍ଶକ୍ରମେ ଜିଲା ବିଜେପିର ପୂର୍ବତନ ସଭାପତି ତଥା ବର୍ତ୍ତମାନ ରାଜ୍ୟ କାର୍ଯ୍ୟକାରିଣୀ ସଦସ୍ୟ ଡ. ଅରୂପାନନ୍ଦ ସାହୁ ଏହି ସାକ୍ଷାତକାର କାର୍ଯ୍ୟକ୍ରମକୁ ନିଜର ବହୁମୂଲ୍ୟ ସମୟ ଦେଇ ସଫଳ କରାଇଥିଲେ।